U intervju «Biełaruś-1» pieršy namieśnik premjer-ministra Mikałaj Snapkoŭ raspavioŭ, što tam z darožnymi kartami pa intehracyi, paviedamlaje BiełTA.
«Na dadzieny momant kansensus znojdzieny pa ŭsich 28 sajuznych prahramach, my vyjšli na finišnuju pramuju. Ja vielmi spadziajusia, što prezidenty dźviuch krain padčas sustrečy 9 vieraśnia aceniać našu pracu: ci hatovyja prahramy da padpisańnia ŭ tym vyhladzie i ŭ tych kanstrukcyjach, u jakich jany na hety momant pradstaŭlenyja ŭradami», — skazaŭ Mikałaj Snapkoŭ.
Pavodle jaho słoŭ, pry pracy nad sajuznymi prahramami asnoŭny akcent byŭ zrobleny na ŭstojlivaści ekanamičnaha raźvićcia dziaržaŭ. «My nazirajem, nakolki ahresiŭnaje źniešniaje asiarodździe, nakolki aktyŭna raźvivajecca ŭnutrykrainavy abo ŭnutrybłokavy pratekcyjanizm.
Tamu łahična dźvium krainam, jakija ŭžo daŭno ŭ takim ekanamičnym sajuzie, jašče bolš abjadnać namahańni, materyjalnyja i intelektualnyja resursy dla ŭstojlivaha raźvićcia jak sumiesnaha, tak i, adpaviedna, kožnaj krainy asobna ŭziataj», — adznačyŭ namieśnik premjer-ministra.
«Kali kazać ab sajuznych prahramach u cełym jak ab kanstrukcyi, pa vialikim rachunku jany farmujucca na asnovie troch bazavych elemientaŭ: meta, kirunak i vynik. Meta va ŭsich adnolkavaja — stvareńnie roŭnych startavych umoŭ dla subjektaŭ haspadarańnia dźviuch krain. Miechanizmy — ŭnifikacyja zakanadaŭstva dźviuch krain nie na asnovie rasijskaj (jak u nas pryniata heta abmiarkoŭvać), a na asnovie lepšych praktyk u tym liku i tych, jakija na dadzieny momant jašče nie prymianiajucca ni ŭ Rasijskaj Fiederacyi, ni ŭ Respublicy Biełaruś», — upeŭnieny Mikałaj Snapkoŭ.
Havoračy ab pramysłovaj i ahrarnaj palitycy, pieršy vice-premjer ličyć važnym unifikavać dziaržavam łakalizacyju vytvorčaściaŭ rasijskaj i biełaruskaj pradukcyi.
«Heta paspryjaje vykanańniu daŭniaha daručeńnia Łukašenki pa impartazamiaščeńni. Treba taksama razumieć, što tut budzie mieć miesca ŭnutranaja kankurencyja, adpaviedna, jana budzie ruchać našych vytvorcaŭ raźvivacca, — padkreśliŭ jon. — Ahrarnaja palityka — najvažniejšy elemient, pakolki Rasija źjaŭlajecca asnoŭnym rynkam zbytu našaj małočnaj i miasnoj pradukcyi. Adzin z elemientaŭ — stvareńnie praviłaŭ abmiežavańnia pieramiaščeńnia tavaraŭ pamiž našymi krainami na dvaich. My bačym, što isnujučyja praviły Jeŭrazijskaha ekanamičnaha sajuza nie vielmi spracoŭvajuć. My ŭpeŭnienyja, što ŭ ramkach dvojki my zmožam znajści takija padychody, jakija buduć spraviadlivyja z punktu hledžańnia acenki vieterynarna-sanitarnych jakaściaŭ pradukcyi, jakaja budzie pieramiaščacca ŭ Rasiju i Biełaruś».
«Što tyčycca suvierenitetu, dla mianie zdajecca dziŭnaj palemika pa hetaj temie. Niezaležnaść była, jość i budzie. Dźvie krainy ŭžo daŭno pracujuć u ramkach Sajuznaj dziaržavy i vyznačyli pryjarytetam pierš za ŭsio budaŭnictva ekanamičnaha padmurka.
Da dźviuch dziaržaŭ vielmi pilna staviacca z boku trecich krain, siońnia my nazirajem ahresiŭny sankcyjny cisk na nas i Rasiju. Łahična, kali dźvie dziaržavy abjadnoŭvajucca ŭ namahańniach ekanamičnaha supracivu niezdarovym trecim siłam. Havorka idzie vyklučna ab vybudoŭvańni ekanamičnaj mocy dźviuch krain, tamu intelektualny patencyjał, materyjalnyja resursy, pryrodnyja mahčymaści — važnyja elemienty, jakija treba abjadnoŭvać, kab supraciŭlacca i raści», — źviarnuŭ uvahu pieršy vice-premjer.
Mikałaj Snapkoŭ taksama dadaŭ, što prahrama pa stvareńni adzinaha rynku hazu hatovaja.
«U asnovie karty — vyznačeńnie ŭ nastupnym hodzie adnaznačnych, zrazumiełych abodvum bakam pryncypaŭ i padychodaŭ funkcyjanavańnia abjadnanaha rynku hazu. Siońnia my kanstatujem, što naša cana na haz lepšaja pa paraŭnańni z usimi krainami SND i Jeŭrapiejskim sajuzam. Rynak vałacilny, tamu hetyja pryncypy pavinny sfarmavać pravilnaje reahavańnie cany va ŭmovach Sajuznaj dziaržavy z tym, kab u nas zachoŭvałasia najbolš kamfortnaja cana», — skazaŭ na zakančeńnie jon.
Ciapier čytajuć
Jakija harady najbolš paciarpieli ad palityčnych represij? Voś śpis10
Kamientary