Stała viadoma, chto stralaŭ u kadebešnika: 31-hadovy ajcišnik Andrej Zielcer
Jaho paznali na videa siabry. Mužčyna pracavaŭ viadučym analitykam słužby padtrymki EPAM Systems.
Jak raspaviali susiedzi, Andrej žyŭ razam z žonkaj u jaje kvatery na Jakuboŭskaha, 29. Hadavali małoha syna, vučnia pačatkovych kłasaŭ, jamu 8 hadoŭ. Dzie znachodziŭsia mały padčas stralaniny, nieviadoma.
U siužecie ATN, jaki pakazali padčas «Panaramy», adznačyli, što žančyna, jakaja była pobač z Andrejem Zielceram i zdymała jaho na videa, — jahonaja žonka. Pra jaje pakul ničoha nie viadoma.
Sam Zielcer skončyŭ kaledž biznesu i prava ŭ Minsku. Paśla pracavaŭ u JERAM.
«Andrej byŭ skrytny čałaviek, prahramavać asabliva nie ŭmieŭ, byŭ fryłansieram», — kaža pra jaho kaleha.
Viadoma, što jon cikaviŭsia tryjatłonam, a ŭ 2020 hodzie ŭdzielničaŭ u spabornictvach.
Taksama 17 žniŭnia Zielcer raźmiaściŭ u instahramie dopis z nacyjanalnym bieła-čyrvona-biełym ściaham: «8-y dzień baraćby za lepšuju budučyniu dla svajoj krainy. […] Bolš za 7000 ludziej zatrymana, niekalki zahinuła, pravaachoŭnyja orhany siarod biełaha dnia vykradajuć ludziej, nielehitymny prezident robić vyhlad, što ničoha nie adbyvajecca. Tavaryšy biełarusy, jak vašy dziady pieramahli ŭ vajnie? U ich taksama była bojazń vychodzić z domu? U ich taksama była bojazń adkazać fašystam? Dumaju, strach byŭ. Ale jany niejak zmahalisia sa svaim stracham, inačaj b my ciapier chadzili pad fašysckimi znamionami. Čaho baiciesia ciapier?»
Pry hetym Zielcer maje dva akaŭnty ŭ Instagram. U adnym ź ich jość fotazdymki strelby. Nie vyklučana, što jon stralaŭ mienavita ź jaje.
Ciapier čytajuć
Maldyvy, Zanzibar i Italija: kudy paniesła adpačyvać prychilnikaŭ Łukašenki13
Kamientary