Cichanoŭskuju i Łatušku padazrajuć u prysvajeńni ŭłady. A raniej takija spravy zavodzili?
Śledčy kamitet zajaviŭ, što zavioŭ čarhovuju kryminalnuju spravu suprać palitykaŭ Śviatłany Cichanoŭskaj i Paŭła Łatušku. Hetym razam ich padazrajuć u samavolnym prysvajeńni ŭłady (art.382 Kryminalnaha kodeksa). U paraŭnańni z papiarednimi pretenzijami siłavikoŭ heta davoli drobnaja sprava, pa jakoj pahražaje da dvuch hod źniavoleńnia, tak što pa hetym artykule Cichanoŭskuju i Łatušku navat nie zmahli b utrymlivać u SIZA da suda. Nazva artykuła choć i hučyć ekzatyčna, ale takija spravy zavodzili i raniej, praŭda,i fihuranty nie byli takimi miedyjnymi.
U čym sens pretenzijaŭ?
Cichanoŭskaja i Łatuška, adznačaje SK, «pa ŭzhadnieńni ź inšymi ŭdzielnikami zmovy stvaryli psieŭdaorhany dziaržaŭnaj ułady i pradstaŭnictva Biełarusi za miažoj, viali pieramovy z zamiežnymi dziaržavami i mižnarodnymi arhanizacyjami». Tak śledstva acaniła vizity palitykaŭ na Zachad, pieramovy pa sankcyjach i mahčymaj padtrymcy, jakuju Biełaruś atrymaje ŭ vypadku pieramohi demakratyčnych siłaŭ.
Farmuloŭka artykuła 382 hučyć jak samavolnaje prysvajeńnie zvańnia ci ŭłady słužbovaj asoby. Złačynstva, pavodle kryminalnaha zakona, pasiahaje na aŭtarytet dziaržaŭnaj ułady.
Viadomyja vypadki, kali spravy pa art. 382 KK zavodzili na niesumlennych biznesmienaŭ i ich supracoŭnikaŭ, jakija vydavali siabie za siłavikoŭ ci čynoŭnikaŭ, kab vyviedać u kankurentaŭ patrebnuju infarmacyju. Tak što nahody byvajuć bolš prazaičnyja, čym abmierkavańnie piataha pakieta sankcyj ź ES.
Na fonie inšych kryminalnych spravaŭ, jakija zaviali na Łatušku i Cichanoŭskuju, pakarańnie pa apošniaj — najmienšaje (hramadskija pracy, abo štraf, abo chimija ci kałonija da dvuch hod). Vyhladaje, što SK usimi siłami starajecca prademanstravać, što sprabuje spynić dziejnaść apazicyjnych ruchaŭ. Adnak ni Cichanoŭskaja, ni Łatuška nie źbirajucca źmianiać svaje płany i pierakanańni.
Nahadajem, što Śviatłanu Cichanoŭskuju i Paŭła Łatušku ŭklučyli ŭ śpis datyčnych da terarystyčnaj dziejnaści. Suprać Cichanoŭskaj zaviali spravu ab padrychtoŭcy terakta.
Hienprakuratura zajaŭlała, što patrabuje jaje ekstradycyi pa spravie ab arhanizacyi masavych biesparadkaŭ i sprobie zachopu administratyŭnych budynkaŭ. Taksama suprać Cichanoŭskaj zaviali spravu ab stvareńni ekstremisckaha farmiravańnia i ab zmovie z metaj zachapić dziaržaŭnuju ŭładu.
Na Paŭła Łatušku zaviali spravy ab zmovie z metaj zachapić dziaržaŭnuju ŭładu, stvareńnie ekstremisckaha farmiravańnie i zakliki da dziejańniaŭ, jakija niasuć škodu nacyjanalnaj biaśpiecy.
«Vy chacieli, kab tam adny durni pracavali?» Jak biełaruskija siłaviki sprabujuć padmanuć Interpał
Abjadnańnie byłych siłavikoŭ apublikavała zapis razmovaŭ supracoŭnikaŭ biełaruskaha biuro Interpał i Hienprakuratury, ź jakoha vynikaje, što ŭ štab-kvatery Interpała admovilisia zadavolić zajaŭku na mižnarodny vyšuk Śviatłany Cichanoŭskaj i navat vynieśli papiaredžańnie Biełarusi: nie vykarystoŭvać miechanizmy mižnarodnaj palicyi dla pieraśledu palityčnych apanientaŭ.
Ciapier čytajuć
Siłaviki masava zatrymlivajuć udzielnikaŭ konkursu homielskaha treš-błohiera16
Kamientary