Ci zmoža Rasija pakryć usie straty Biełarusi ad sankcyj? Adkazvaje ekanamist
Ekanamist Kaciaryna Barnukova ŭ intervju prahramie «Tok» parazvažała, jak Rasija budzie pavodzić siabie va ŭmovach sankcyjnaha cisku na Biełaruś — ci pakryje ŭsie vydatki partnioraŭ, ci budzie dapamahać abyjści ambiežavańni na zachodnich rynkach?
«Rasija zmoža pakryć usie straty Biełarusi ad sankcyj, — ličyć ekśpiert. — Ale pytańnie, ci zachoča. Rasija vielmi vialikaja kraina ŭ paraŭnańni ź Biełaruśsiu. Dla jaje 2-3, navat 5 miljardaŭ dalaraŭ u hod — nie samyja vialikija hrošy, z adnaho boku. A ź inšaha, u Rasii jość nie tolki Biełaruś.
Pa-pieršaje, jość unutranyja prablemy. Pa-druhoje, u Rasii šmat zamiežnych intaresaŭ, kudy taksama ŭkładvajucca hrošy. Tak što ŭsio zaležyć ad palityčnaj voli. Pakul ja baču, što hrošaj dajecca roŭna stolki, kolki treba».
Kaciaryna źviartaje ŭvahu, što pakul u Biełarusi biełaja pałasa — my majem vialikuju ekspartnuju vyručku, i Rasija nie daje bolš kredytaŭ, choć ułady praciahvajuć prasić.
«Rasija zajaviła, što daść 650 miljonaŭ na nastupnyja paŭtara hoda. Heta ŭsio, što my pačuli, — praciahvaje Barnukova. — Tamu
vialikaha žadańnia pakryvać usie straty, pakul ja nie baču. Hrošy dajuć roŭna na padtrymańnie štanoŭ, kab nie adbyłosia kałapsa,
jaki moža pryvieści da niepažadanych nastupstvaŭ — naprykład, buntaŭ».
Ekśpiert ličyć, što Rasija nie budzie davać hrošy dla pavyšeńnia ŭzroŭnia žyćcia ŭ Biełarusi.
«Adna sprava, kali ty kažaš, što kali vy zaŭtra nie daście nam miljard, u nas budzie valutny kryzis, jak u 2011 hodzie. Inšaja sprava, kali ty kažaš, što nam treba padniać zarobki nastaŭnikam i miedykam. Na heta adkažuć:
«Nu što ž, pasiadziać vašyja nastaŭniki i miedyki biez padjoma zarobkaŭ, u Rasii ž siadziać, i vašy pacierpiać».
Ci patrapiać rasijskija kampanii pad abmiežavańni, kali buduć dapamahać biełaruskim padsankcyjnym pradpryjemstvam?
«Jany adnaznačna hetaha bajacca, — kaža surazmoŭca. — My bačym heta na prykładzie kampanii «Transnafta», jakaja ŭsimi siłami admaŭlaje pastaŭki na «Naftan». Jašče adzin važny momant — nie fakt, što rasijskija kampanii zachočuć dapamahać biełaruskim. Kali my biarem, naprykład, MAZ ci Biełaruśkalij, to ŭ ich jość pramyja kankurenty ŭ Rasii (KAMAZ i Urałkalij — zaŭv. NN), i jany mohuć być zadavolennyja hetaj drennaj situacyjaj. Kali da Urałkalija pryjduć i skažuć: pasuńciesia troški ŭ partach, kab ekspartavać biełaruski kalij (Litva abiacaje zakryć šlach dla Biełaruśkalija sa śniežnia — zaŭv. NN), jany mohuć adkazać pa-roznamu. Treba razumieć, što Rasija — heta nie adna dziejučaja asoba, u ich mohuć być roznyja intaresy, jakija mohuć być nie ŭ adnym kirunku ź biełaruskimi».
Razam z tym, ekśpiert źviartaje ŭvahu na roznaje staŭleńnie da našych krainaŭ: što dazvolena Rasii, nie dazvolać Biełarusi, prosta ŭ siłu pamiera i značnaści našych krain dla Zachadu.
«Ja nie dumaju, što Zachad pojdzie na surjoznaje abvastreńnie antyrasijskich sankcyj, tolki tamu, što jany vyrašać dapamahčy biełaruskim partnioram. Zachad nie choča lišni raz tykać pałkaj Rasiju», — padsumoŭvaje Kaciaryna Barnukova.
Hutarku całkam hladzicie ŭ YouTube — pra abvał zarobkaŭ u Biełarusi, što budzie z rublom i kali sankcyi ŭdarać usurjoz.
Ciapier čytajuć
Maładoj mamie z Navahrudka dali 6 hadoŭ za karupcyju. Jana dakazała svaju nievinavataść — ale kali ŭžo adsiedzieła1
Kamientary