«Zabrali paśla narady ŭ dyrektara». Što viadoma pra zatrymańnie topaŭ na MTZ?
Za chabary zatrymany top-mieniedžary MTZ i BiełAZ. MUS paviedamlaje pra siemiarych fihurantaŭ spravy. Što pra heta viadoma?
Pa infarmacyi «Našaj Nivy», siarod zatrymanych na MTZ — dva namieśniki dyrektara i hałoŭny technołah. Pryjšli pa ich 29 kastryčnika.
«Ich zatrymali na pracy, paśla narady ŭ dyrektara», — raskazvajuć na zavodzie.
Jašče adnaho topa paśla adpuścili.
Jak piša MUS, słužbovych asob zavodaŭ uziali za atrymańnie chabaru ŭ asabliva bujnym pamiery. Chabary pieradavalisia ŭ vyhladzie najaŭnych hrošaj i nieruchomaści dla taho, kab tendar na pastaŭku darahoha abstalavańnia vyjhraŭ patrebny bok i svoječasova atrymaŭ apłatu.
Maskiravałasia ŭsio pad fiktyŭnyja damovy zajmu i kupli-prodažu nieruchomaści. U fihurantaŭ spravy kanfiskavali 100 tysiač dalaraŭ.
Rabočyja MTZ kažuć, što zatrymanym prypisvajuć, što pry zakupcy abstalavańnia łabiravali intaresy zamiežnaj kampanii, rabili zadańnie na zakupku pad peŭnyja charaktarystyki.
Inšaja viersija — što nahodaj vizitu siłavikoŭ stali straty i bardak na Aršanskim instrumientalnym zavodzie (jon uvachodzić u chołdynh MTZ). Nibyta darahim atrymałasia abstalavańnie dla hidravuzła.
«Raniej stanki rabiŭ Barysaŭ, lepš i tańniej. Pieranieśli vytvorčaść u Oršu — stała ŭ razy pavolniej i daražej», — tłumačać hetu viersiju.
Kamientary