Syna śviatara z Harodni asudzili na try z pałovaj hady kałonii za raspalvańnie varožaści
U Haradzienskim abłasnym sudzie 8 śniežnia zaviaršyŭsia praciahły razhlad kryminalnaj spravy Andreja Aŭsijeviča. Dahetul jaho vinavacili u abrazie pradstaŭnika ŭłady pa art. 369 Kryminalnaha kodeksa i art 361 KK (zakliki da dziejańniaŭ, skiravanych na pryčynieńnie škody nacyjanalnaj biaśpiecy Respubliki Biełaruś). Paśla praciahłaha pierapynku ŭ pracesie Aŭsijeviču vysunuli novaje abvinavačvańnie — raspalvańnie rasavaj, nacyjanalnaj, relihijnaj albo inšaj sacyjalnaj varožaści (č. 1 art. 130 KK), paviedamlajuć pravaabaroncy.
Dziaržabvinavaŭca paličyła, što jaho kamientaryi ŭ Telegram-kanale pra dalejšy los supracoŭnikaŭ milicyi padpadajuć pad dziejańnie artykuła ab raspalvańni rasavaj, nacyjanalnaj, relihijnaj albo inšaj sacyjalnaj varožaści abo (č. 1 art. 130 KK — da piaci hadoŭ pazbaŭleńnia voli).
Spravu razhladaje sudździa Mikałaj Račynski, dziaržabvinavaŭca — prakuror Ludmiła Hierasimienka.
U jakaści paciarpiełaha vystupaje supracoŭnik milicyi, učastkovy Maksim Čartkoŭ.
Pavodle abvinavačvańnia, u minułym hodzie Andrej Aŭsijevič ŭ kamientaryjach ŭ telehram-kanale «Hrodna 97%» publična abraziŭ pradstaŭnika ŭłady, miascovaha ŭčastkovaha Maksima Čartkova.
Aŭsijeviču vysunuli abvinavačvańnie ŭ «pahrozie prymianieńnia hvałtu ŭ dačynieńni da supracoŭnika orhanaŭ unutranych spraŭ». Jaho ŭziali pad vartu ŭ traŭni. Pry hetym prakuratura i śledstva ŭžo mieli na rukach zaklučeńnie ekśpiertaŭ ab tym, što ŭ publičnym mierkavańni Andreja Aŭsijeviča jość niehatyŭnyja acenki, ale niama nijakich padstavaŭ śćviardžać, što jon pahražaŭ supracoŭnikam milicyi.
Ale śledstva nie tolki nie prysłuchałasia da ekśpiertaŭ, a naohuł pierakvalifikavała spravu na «terarystyčny» artykuł (publičnyja zakliki da ździajśnieńnia aktu teraryzmu, nakiravanaha na pryčynieńnie škody nacyjanalnaj biaśpiecy). Kali spravu pieradali ŭ prakuraturu, tam taksama praihnaravali vysnovy linhvistaŭ i nakiravali jaje ŭ sud.
Padčas sudovaha pracesu ekśpiert paćvierdziŭ vysnovy ekśpiertyzy i śviedčyŭ na karyść padsudnaha. Była pryznačanaja jašče adna ekśpiertyza, ale i jana zaśviedčyła adsutnaść pahrozaŭ z boku Aŭsijeviča. Tym nie mieniej, paśla pierakvalifikacyi złačynstva na inšaje — «raspalvańnie varožaści», — Aŭsijeviča ŭsio adno asudzili.
Sudździa Račynski zadavoliŭ prapanovu dziaržabvinavaŭcy Ludmiły Hierasimienka i vynies prysud: 3,5 hoda pazbaŭleńnia voli ŭ kałonii ahulnaha režymu.
Ciapier čytajuć
Zakinutuju siadzibu Bahdanovičaŭ pierarobiać u bucikovy hatel FOTY7
Kamientary