Novy padvid amikrona raspaŭsiudžvajecca pa Jeŭropie. Jašče bolš zarazny za prosta amikron
Vielmi zarazny štam kavida, jaki nazyvajuć amikron, ličać adkaznym amal za ŭsie apošnija zachvorvańni na karanavirus u śviecie. Ale ž zaraz navukoŭcy rehistrujuć u niekatorych krainach dadatkovy ŭzdym kavidu, jaki źviazvajuć z padvidam amikrona.
Hety padvaryjant virusa nazyvajuć BA.2, u toj čas jak samaja raspaŭsiudžanaja forma amikrona viadomaja siarod navukoŭcaŭ jak BA.1. Zhodna sa statystykaj, u Danii BA.2 užo sustrakajecca čaściej za BA.1, piša Guardian.
Voś što viadoma pra novuju niebiaśpieku.
Padvaryjant-nievidzimka
Pavodle źviestak na 25 studzienia varyjant BA.1 byŭ adkazny za 98,8% ciapierašnich vypadkaŭ kavidu, ale BA.2 chutka nahaniaje jaho. Jak śviedčyć Trevar Bedfard, virusołah z ZŠA, na 28 studzienia novy padvaryjant adkazvaŭ prykładna za 82% vypadkaŭ chvaroby ŭ Danii, 9% zachvorvańniaŭ u Brytanii i 8% — u ZŠA.
Padvid BA.1 lahčej adsočvać, čym minułyja štamy kavidu. Heta źviazana z tym, što ŭ hetym padvaryjancie adsutničaje adzin z troch metavych hienaŭ, jakija ŭličvajucca pry vyjaŭleńni kavidu mietadam PŁR-testa. Tamu ekśpierty aŭtamatyčna adnosiać da amikrona ŭsie vypadki kavidu, padčas jakich fiksujecca adsutnaść hetaha hiena.
U varyjanta BA.2, jaki časam nazyvajuć padvaryjantam-nievidzimkaj, niama takoj charaktarystyki, jak adsutny hien. Tamu navukoŭcy adsočvajuć hety štam takim ža čynam, jak i minułyja varyjanty, u tym liku jak i štam delta. Dla hetaha vykarystoŭvajucca adkrytyja bazy danych ź infarmacyjaj pra virusnyja hienomy — naprykład, resurs GISAID.
Jak i ŭ vypadkach ź inšymi štamami kavidu, chvarobu možna adsačyć i z dapamohaj ekspres-testaŭ na kavid. Ale ž taki test nie daść adkaz na pytańnie pra toje, jaki ŭ vas štam kavidu.
Bolš zarazny?
Samy raspaŭsiudžany na siońnia varyjant amikrona BA.1 ličać vielmi zaraznym, ale ž jość źviestki, što BA.2 pieradajecca jašče lahčej. Ekśpierty z Danii nazyvajuć i kankretnyja ličby — zhodna ź imi, novy padvid pieradajecca ŭ paŭtara razy chutčej za kłasičny amikron.
Tym nie mienš, pakul niama śviedčańniaŭ, što vakcyny, jakija isnujuć zaraz, mienš efiektyŭnyja suprać VA.2. Taksama vierahodna, što kavid, vyklikany novym padvaryjantam, prachodzić nie bolš ciažka, čym chvaroba ad zvyčajnaha amikrona.
Kali čałaviek užo pierachvareŭ na kavid, vyklikany štamam BA.1, ci abaronieny jon ad novaha padvida amikrona? Hetym pytańniem zacikavilisia ŭ Danii, dzie ŭ rehijonach, što raniej adznačylisia vialikaj kolkaściu vypadkaŭ BA.1, paźniej fiksavaŭsia rost chvarobaŭ, źviazanych z BA.2.
Pakul nieviadoma, ci zdolny imunitet ad kłasičnaha amikrona abaranić ad novaha padvida virusa. Kali takoj abarony nie budzie, heta moža vyklikać novy ŭsplesk vypadkaŭ chvaroby.
Kamientary