Minabarony RB: «Biełaruś i Rasija vyrašyli praciahnuć sumiesnuju pravierku sił reahavańnia»
«Z-za vajennaj aktyŭnaści la miežaŭ i abvastreńnia na Danbasie Biełaruś i Rasija vyrašyli praciahnuć sumiesnuju pravierku sił reahavańnia», — takaja zajava ministra abarony Biełarusi apublikavanaja na sajcie viedamstva. Pry hetym dziaržaŭnaje ahienctva BiełTA pieršapačatkova nie ŭklučyła hety skaz u paviedamleńnie pra padviadzieńnie vynikaŭ vučeńniaŭ.
Voś što havorycca ŭ tekście, apublikavanym na sajcie Ministerstva abarony RB.
«U suviazi z narastańniem vajennaj aktyŭnaści la źniešnich miežaŭ Sajuznaj dziaržavy i abvastreńniem situacyi na Danbasie, prezidentami Respubliki Biełaruś i Rasijskaj Fiederacyi pryniata rašeńnie pravierku sił reahavańnia Sajuznaj dziaržavy praciahnuć.
U jaje chodzie buduć staranna prapracavany etapy abarony Sajuznaj dziaržavy, jakija nie byli achopleny z takoj stupieńniu detalizacyi navučalnymi pytańniami papiaredniaha pieryjadu pravierki.
Zachad admaŭlajecca ŭsprymać paznačanyja Rasijaj «čyrvonyja linii» ŭ architektury biaśpieki Jeŭropy, jakija aktualnyja i dla biełarusaŭ. My bačym, jak idzie adkidańnie asnovatvornaha pryncypu niepadzielnaści biaśpieki.
Z usiaho vyšejskazanaha łahičnaja adna vysnova — u Jeŭropie vielmi mocna zapachła poracham. Jaje metanakiravana padšturchoŭvajuć da vajny», — na sajcie Minabarony cytujecca zajava ministra Chrenina.
Źviartaje ŭvahu, što ŭ paviedamleńni dziaržaŭnaha ahienctva BiełTA pra padviadzieńnie vynikaŭ vučeńniaŭ ab «padaŭžeńni pravierki bojehatoŭnaści» spačatku ničoha nie havaryłasia.
Raniej Viktar Chrenin padvodziŭ papiarednija vyniki vučeńniaŭ.
Siarod inšaha, jon kanstatavaŭ,
— što vučeńni paćvierdzili zdolnaść Uzbrojenych sił Biełarusi i Rasii sumiesna vyrašać zadačy ŭzbrojenaj abarony Sajuznaj dziaržavy,
— pytańni zabieśpiačeńnia pierahrupoŭki vojskaŭ u takich maštabach adpracoŭvalisia ŭpieršyniu,
— u Respubliki Biełaruś i Rasijskaj Fiederacyi usia infrastruktura hatovaja, a jurydyčnyja aśpiekty ŭrehulavany,
— dasiahnuty nieabchodny ŭzrovień apieratyŭnaj sumiaščalnaści. Minimalny čas patrabujecca na bajavoje zładžvańnie, a taksama na roznyja ŭviazki i ŭzhadnieńnia,
— vučeńni pradastavili mahčymaść stvaryć hrupoŭku avijacyi i spa, abstalavanuju samymi sučasnymi sistemami ŭzbrajeńnia.
«Mety vučeńniaŭ «Sajuznaja rašučaść — 2022» dasiahnutyja. U cełym orhany vajennaha kiravańnia, vojski i siły aceńvaju jak «paśpiachova spravilisia z zadačami» — kanstatavaŭ Viktar Chrenin.
Kamientary