Ukraincy siomy raz nanieśli ŭdar pa aeraporcie Čarnabajeŭka. Situacyja ŭžo sparadziła dziasiatki miemaŭ
Čarnabajeŭka — siało, u jakim znachodzicca mižnarodny aeraport Chiersona. Padobna, što dla rasijskich vojskaŭ — heta adziny dastupny aeradrom na poŭdni Ukrainy, kudy jany mohuć pierakidvać vajennyja samaloty i viertaloty z Kryma. Taksama praz Čarnabajeŭku prachodzić čyhunka Chierson — Mikałajeŭ i trasa Je58 z Rastova-na-Donie da Adesy. Hetym tłumačycca važnaść Čarnabajeŭki dla ŭzbrojenych siłaŭ RF.
Ministerstva abarony Rasii paviedamiła ab tym, što aeraport u Čarnabajeŭcy znachodzicca pad ichnym kantrolem 27 lutaha. U hety ž dzień ukraincy nanieśli pa im udar Bajraktarami, adnak rasijskija vajskoŭcy znoŭku raźmiaścili svaju techniku na tym ža miescy. 7 sakavika ŭkrainskija vojski źniščyli tam 30 viertalotaŭ, 16-ha — jašče kala siami.
18 sakavika ŭkrainskija vajskoŭcy źniščyli va ŭsio toj ža Čarnabajeŭcy kamandny punkt 8 armii Paŭdniovaj vajskovaj akruhi RF, pry hetym zahinuŭ rasijski hienierał Andrej Mardvičoŭ.
Litaralna dva dni tamu na svajoj staroncy ŭ facebook Alaksiej Arastovič — savietnik Ofisa prezidenta Ukrainy — napisaŭ
«Tolki nie śmiejciesia. Ale my znoŭ ułupili im u Čarnabajeŭcy. Šosty raz».
Uładzimir Zialenski vykazaŭ upeŭnienaść, što Čarnabajeŭka ŭvojdzie ŭ historyju jak miesca, dzie rasijskija kamandziry pakazali svaju niazdatnaść.
Infarmacyju pra siomy naniesieny ŭdar paviedamiŭ siońnia, nie ahučvajučy padrabiaznaściaŭ, Arastovič.
Fienomien Čarnabajeŭki aktyŭna abmiarkoŭvajecca ŭ sacyjalnych sietkach. Karystalniki nie razumiejuć, čamu rasijskija vajskoŭcy raźmiaščajuć techniku ŭ miescy, dzie jana nie abaronienaja ad udaru ŭkraincaŭ. Hetaja źjava sparadziła ŭžo dziasiatki miemaŭ.
Kamientary