«Mnie pahražali fizičnaj raspravaj». Skandał u muzyčnaj śfiery — što nie padzialili Tabolič i Lesley Knife?
Na afišy kancerta pamiaci Alaksandra Kulinkoviča ŭ Varšavie minus adno proźvišča: na jaho nie dajedzie Uładzisłaŭ Navažyłaŭ, lidar Gods Tower, viadomy jak Lesley Knife. Pryčyna — u bojazi Navažyłava za svaju biaśpieku, bo jamu namiaknuli, što źjaŭleńnie pobač z Alesiem Taboličam i jaho hurtom Znich moža skončycca kiepska.
Datelefanavalisia abodvum muzykam, kab vyśvietlić, što adbyvajecca.
Navažyłaŭ: Drennych ludziej treba bajkatavać
U Fejsbuku pra svoj niaŭdzieł u kancercie Uładzisłaŭ Navažyłaŭ paviedamlaje łakanična: «Daražeńkija maje, ŭsie, z kim mieŭsia ŭbačycca ŭ Varšavie. Zdaryłasia tak, što ja nie zmahu vystupić na kancercie pamiaci Kulinkoviča, jość važkija na toje nahody».
Ale za hetym intelihientnym paviedamleńniem staić surjozny kanflikt.
«Mnie stała viadoma, što mnie pastupili pahrozy fizičnaj raspravy ad muzykaŭ Znich u Varšavie pry sustrečy. Tamu ja vyrašyŭ nikudy nie jechać: svajo zdaroŭje i niarvovyja kletki daražejšyja. I ŭvohule, ja liču tak: drennych ludziej treba bajkatavać, a heta vielmi kiepskija ludzi. Nie chaču mieć ź imi ničoha ahulnaha», — prakamientavaŭ «Našaj Nivie» Navažyłaŭ.
Lesley Knife kaža, što varožaść da Gods Tower i pastajannyja napadki z boku Taboliča ciahnucca ŭžo dva hady. U čym ich pryčyna — jon nie razumieje.
«U mianie jość błoh. I niejak jašče ŭ 2019-m ja apublikavaŭ tam hutarku z Kanapackaj. Tabolič zładziŭ isteryku, kab ja jaje vydaliŭ. Ale heta moj błoh, i takaja hutarka darahaja mnie dla historyi. Paśla hetaha my doŭha nie razmaŭlali naohuł. A kali ja vychodziŭ z žodzinskaj turmy z Pamidoravym, to Tabolič nas navat sustrakaŭ — zdavałasia, što my prymirylisia», — zhadvaje Navažyłaŭ.
Skrynšot: jutub-kanał Lesley Knife
Tabolič: Kazaŭ, što my ledź nie kadebešniki, jabaćki i hetak dalej
Aleś Tabolič usie pahrozy sa svajho boku i ad inšych udzielnikaŭ Znich admaŭlaje, nazyvajučy takuju pryčynu nie vystupać «chajpam».
«Nijakich pahroz nie było, chacia jon i kazaŭ u svoj čas, što Tabolič i Znich — ledź nie kadebešniki i jabaćki. Mnie i ciapier u Varšavie mnohija pryhadvajuć: «O, jabaćka, pracavaŭ u sałonie tatuiroŭki «U lisicy». Ale ja, miž inšym, byŭ kandydatam u kandydaty i z krainy źjechaŭ. Ja lublu praŭdu: kali ty na 100% viedaješ, što ja — jabaćka ci supracoŭnik KDB — raskažy-pakažy, a nie zajmajsia łuchtoj i panosam u sacsietkach.
Navažyłaŭ — prosta bajaźliviec, jaki baicca adkazać za svaje słovy pa-mužčynsku. Baicca, što jašče lapnie nie toje, što treba. Ale niaŭžo jon dumaje, što maleńki Tabolič, 174 santymietry rostam, moh by adłupić takoha zdaraviaka?»
Tabolič śćviardžaje, što nijakich pretenzij da kaleh nie maje i navat sam prapanoŭvaŭ arhanizataram kampramis: vystupić i adrazu pajechać dadomu, nijak nie pierasiakajučysia z Navažyłavym.
«My jaho čapać nie budziem i razmaŭlać nie budziem. U nas niama da jaho ničoha. Heta na jaho sumleńni. Kali b ja aficyjna skazaŭ, što voś pryjedzie Navažyłaŭ i my ź im budziem razborki rabić, tady inšaja sprava. A tut jon prosta chajpuje pierad svaimi».
Usie pretenzii z boku Taboliča Navažyłaŭ prakamientavaŭ ścipła: «Heta niejkaja ch**nia».
Kancert, pryśviečany 50-hodździu z dnia naradžeńnia lehiendy biełaruskaha pank-roku Alaksandra Kulinkoviča, niaźmiennaha lidara hurta Neuro Dubel, projdzie ŭ Varšavie 18 maja.
Najlepšyja chity hurta musili vykanać dzieviać zorak biełaruskaj alternatyŭnaj sceny: Lavon Volski, Juryj Stylski («Daj Darohu!»), Dzianis Tarasienka («RSP»), Znich, Aleś Dzianisaŭ (Dzieciuki), Alaksandr Pamidoraŭ, «Źmiaja», Anastasija Špakoŭskaja (Naka), Lesley Knife (Gods Tower).
Ale ciapier biez apošniaha.
Abnoŭlena. Paźniej stała viadoma, što na kancercie nie vystupić i hurt Znich. Pra heta sa spasyłkaj na arhanizataraŭ paviedamiła Biełaruskaja rada kultury.
Čytajcie taksama:
«Jany nie prajšli adbor». Arhanizatary vystavy «Art-Minsk» prakamientavali, čamu źniali karciny dziasiatkaŭ mastakoŭ
Kiravać Muziejem Janki Kupały pastavili čałavieka z Muzieja Vialikaj Ajčynnaj
-
U Muziei Volnaj Biełarusi pakažuć 19 aryhinalnych litahrafij Napaleona Ordy
-
Cyrulnik i piśmieńnik Siarhiej Kalenda: «Jość ludzi, jakija kažuć: «Paśla takoj knihi ja b nie pajšoŭ da vas stryhčysia»
-
Na dziaržaŭnym telebačańni prahučała «Kupalinka» — jaje vykanaŭ sierbski ijeramanach, jaki šmat hadoŭ žyvie ŭ Biełarusi
Kamientary