HUR Ukrainy: Rasija płanuje padarvać žyłyja budynki ŭ Mazyry, kab uciahnuć Biełaruś u vajnu
Hałoŭnaje ŭpraŭleńnie raźviedki Ukrainy paviedamlaje, što pavodle ich źviestak, Rasija nibyta pasprabuje ŭciahnuć Biełaruś u vajenny kanflikt z Ukrainaj praz šerah pravakacyj u dačynieńni da infrastrukturnych abjektaŭ i mirnaha nasielnictva.
Z hetaj metaj u horad Mazyr prybyli dyviersijnyja hrupy pad vyhladam cyvilnych hramadzian. U ich skład uvachodziać supracoŭniki Hałoŭnaha raźviedvalnaha ŭpraŭleńnia Rasijskaj Fiederacyi i najomniki pryvatnych vajennych kampanij, havorycca ŭ paviedamleńni.
Pavodle HUR, u płanach hetych hrup nibyta praduhledžanaja arhanizacyja sieryi teraktaŭ u Biełarusi na manier scenaryja, vykarystanaha Rasijaj padčas raspalvańnia vajny ŭ Čačni, kali arhanizavali šerah teraktaŭ u Razani.
HRU płanuje pravieści sieryju artyleryjskich i rakietnych udaraŭ pa Mazyrskim NPZ, abjektach cyvilnaj infrastruktury i žyłym masivie. Padčas abstrełu taksama buduć znosić žyłyja budynki, balnicy i škoły, śćviardžaje Hałoŭnaje ŭpraŭleńnie raźviedki Ukrainy.
«Heta, na dumku kramloŭskich kurataraŭ «śpiecapieracyi», stvoryć dla Łukašenki hetak zvany «kazus beli». Heta značyć, farmalnuju padstavu dla raźviazvańnia vajny. Ličycca, što ŭ hetym vypadku ŭ Łukašenki nie zastaniecca mahčymaści paźbiehnuć udziełu ŭ vajnie», — paviedamlaje HUR.
Taksama adznačajecca, što aficery US RB užo nibyta pačali evakuacyju svaich siemjaŭ z Mazyra.
Razam z tym telehram-kanał «Biełaruski Hajun» paviedamlaje, što im ničoha nie viadoma ni pra płany ŭzryvaŭ u Mazyry, ni pra evakuacyju.
Što tyčycca pryjezdu ŭ horad kadravikoŭ HRU i PVK, to taksama niama nijakaj infarmacyi pra heta.
Ciapier čytajuć
«Ludziej prymušali dumać, što ničoha nikoli nie źmienicca». Chto taki antykamunist Łasła Krasnaharkai, jaki atrymaŭ Nobieleŭskuju premiju pa litaratury?99
Kamientary