Spadarožnikavyja zdymki rasijskaj avijabazy ŭ Krymie pakazvajuć, kolki Rasija straciła
Spadarožnikavyja zdymki rasijskaj avijabazy ŭ Krymie, na jakoj niekalki dzion tamu zdarylisia vybuchi, całkam supiarečać aficyjnaj zajavie Rasii ab tym, što nivodny samalot nie byŭ stračany ŭ vyniku vybuchaŭ, piša WSJ.
Zialenski ŭ videazvarocie pozna ŭviečary ŭ sieradu zajaviŭ, što Rasija straciła dzieviać bajavych samalotaŭ u Krymie.
Spadarožnikavyja zdymki, apublikavanyja Planet Labs PBC i Maxar Technologies pakazvajuć avijabazu ŭ Navafiodaraŭcy da i paśla vybuchaŭ u aŭtorak. Na paźniejšych zdymkach vidać niekalki paškodžanych abo razburanych samalotaŭ.
Sajt Oryx, jaki praviaraje źniščanuju techniku z dapamohaj fatahrafij i videa, pryjšoŭ da vysnovy, što byli źniščanyja čatyry źniščalniki Su-30SM, a taksama piać udarnych samalotaŭ Su-24M i samalot-raźviedčyk Su-24MR.
Mahčyma, i inšyja samaloty byli paškodžanyja askołkami, što taksama robić ich nieprydatnymi dla vykarystańnia.
Ministerstva abarony Rasii zajaviła, što vybuchi byli vyklikanyja vybucham bojeprypasaŭ, i što nijakaha abstrełu bazy nie było. Pavodle rasijskaha ministerstva, samaloty, dysłakavanyja tam, nie paciarpieli.
Ukrainskija aficyjnyja asoby paviedamili amierykancam, što pradstaŭlenaja ZŠA zbroja i abstalavańnie nie vykarystoŭvalisia ŭ Krymie.
Vybuchi padniali maralny duch Ukrainy, bo raniej Krym ličyŭsia niedasiahalnym dla ŭkrainskaj zbroi. Ukrainskija aficyjnyja asoby praciahvajuć kpić z Rasii ŭ suviazi ź incydentam.
«Instytut vyvučeńnia vajny» zajaviŭ u svajoj spravazdačy, što rasijskija aficyjnyja asoby, padobna, byli źbityja z pantałyku tym, jak ukraincy nanieśli ŭdar tak hłyboka za linijaj frontu.
Ukraina zajaŭlaje, što Rasija abstrelvaje jaje terytoryju z najbujniešaj u Jeŭropie atamnaj AES. Zialenski ŭ svajoj pramovie zaklikaŭ chaŭruśnikaŭ uzmacnić sankcyi suprać Rasii ŭ adkaz na jadzierny šantaž.
Maskva, u svaju čarhu, abvinavaciła Ukrainu ŭ naniasieńni ŭdaru pa jadziernym abjekcie, nazvaŭšy hetyja dziejańni formaj «jadziernaha teraryzmu».
Choć ekśpierty MAHATE acanili, što niepasrednaj pahrozy jadziernaj biaśpiecy niama, situacyja «moža źmianicca ŭ luby momant».
Tym časam Ministerstva abarony Biełarusi abvierhła paviedamleńni ab hučnych vybuchach i jarkich uspyškach na aeradromie ŭ Ziabraŭcy Homielskaj vobłaści. Pa słovach pradstaŭnikoŭ Ministerstva abarony Biełarusi, u sieradu ŭviečary ŭ ruchaviku abstalavańnia ŭźnik pažar, i piersanał patušyŭ jaho. Adnak toje, što raskazvajuć žychary navakolnych nasielenych punktaŭ, nie supadaje ź viersijaj biełaruskaha Minabarony.
Čytajcie taksama: «Pračnulisia ad vybuchaŭ i społachaŭ, dumali — vajna». Što kažuć žychary Homiela pra zdareńnie ŭ Ziabraŭcy
Na fonie vajennych dziejańniaŭ sudna, jakoje pavinna dastavić hruz zbožža ŭ Efiopiju, adpraviłasia va Ukrainu ŭ čaćvier u ramkach pahadnieńnia z Rasijaj i Turcyjaj ab adnaŭleńni ekspartu ŭkrainskaha zbožža.
Čakajecca, što sudna zahruzić 23 000 ton zbožža.
Dvanaccać sudoŭ, jakija pieravoziać bolš za 375 000 ton zbožža, pakinuli Ukrainu z 1 žniŭnia, paviedamlaje AAN.
Pamierła palitźniavolenaja Alena Pankova. Paŭhoda nazad jaje asudzili za ŭdzieł u pratestach7
Kamientary