U Biełarusi raspracavali novuju strukturu małoha biznesu. Pra heta paviedamiŭ ministr ekanomiki Alaksandr Čarviakoŭ na naradzie Łukašenki z kiraŭnictvam Savieta Ministraŭ
Jak dałažyŭ padčas narady ministr ekanomiki Alaksandr Čarviakoŭ, dla ŭdaskanaleńnia pradprymalnickaj dziejnaści padrychtavany prajekt zakona. Jaho meta — «pavysić uzrovień udziełu hramadzian u finansavańni dziaržaŭnych vydatkaŭ za košt uviadzieńnia prostych umoŭ i stymułaŭ dla arhanizacyi i maštabavańnia svajoj spravy».
Zakonaprajektam prapanujecca zamacavać novuju strukturu małoha biznesu.
Jana budzie składacca z troch katehoryj: samazaniatyja, indyvidualnyja pradprymalniki i jurydyčnyja asoby (mikra— i małyja pradpryjemstvy). U lik samazaniatych uvojduć asoby, jakija samastojna viaduć prafiesijnuju dziejnaść (kraŭcy, pierakładčyki, niani, dyzajniery, repietytary i hetak dalej), ramieśniki i ŭładalniki ahraekasiadzib.
«Siońnia hetyja katehoryi nie ŭličvajucca ŭ pradprymalnickaj dziejnaści. Ale dola takich hramadzian składaje 15% ad zaniatych u mikrabiznesie. Heta kala 100 tysiač čałaviek, — rastłumačyŭ Alaksandr Čarviakoŭ. — Samazaniatyja zmohuć zajmacca lubymi vidami dziejnaści, akramia zabaronienych, ich vyznačyć urad. U lik zabaronienych uvojduć handal, transpartnyja pasłuhi, techabsłuhoŭvańnie aŭtatranspartu, realizacyja padakcyznych tavaraŭ i tavaraŭ, jakija padlahajuć markiroŭcy, licenzavanaja dziejnaść, pasrednickija pasłuhi».
Ułady chočuć taksama stvaryć sistemu ekanamičnych i administracyjnych stymułaŭ, kab indyvidualnyja pradprymalniki bolš aktyŭna stanavilisia jurydyčnymi asobami. Jak zajaviŭ ministr, heta budzie rabicca «nie pa žorstkim scenaryi, a evalucyjna» i dapamoža paźbiehnuć ryzyk (sychod častki mikrabiznesa ŭ cień, prablemu zaniataści, rost sacyjalnaj napružanaści).
Taksama z 2023 hoda dla indyvidualnych pradprymalnikaŭ płanujecca całkam vyklučyć prymianieńnie sproščanaj sistemy padatkaabkładańnia.
U jakaści asnoŭnaha padatkovaha režymu płanujecca vykarystoŭvać padachodny padatak z pavieličeńniem jaho staŭki z 16 da 20%, a z 2024 — da 25%. Skaracić pieralik vidaŭ dziejnaści dla vypłaty adzinaha padatku i pavialičyć jaho staŭki ŭ paŭtara—try razy. Adnačasova z hetym dla mikraarhanizacyj zachoŭvajecca mahčymaść vykarystańnia sproščanaj sistemy padatkaabkładańnia: 6% ad vyručki», — raspavioŭ Alaksandr Čarviakoŭ.
Samazaniatym prapanujecca płacić padatak na prafiesijny dachod — 10% ad vyručki.
Jon uklučaje ŭ siabie adličeńni ŭ fond sacyjalnaj abarony. Taki ž padatak buduć vypłačvać uładalniki ahraekasiadzib. Dla ramieśnikaŭ zachoŭvajecca prava vybaru: abo padatak na prafiesijny dachod, abo ramiesny zbor, heta značyć, 2 bazavyja vieličyni na hod.
Kamientary