«Ukraina niasie ciažkija straty, Rasija ździajśniaje podźvihi, Kijeŭ ukidaje fejki pra pieramohu». Jak rasijskija prapahandysty raskazvajuć pra adstupleńnie z Charkaŭskaj vobłaści

«Viesti niedieli» («Rasija 1»)

Dźmitryj Kisialoŭ raskazaŭ ab adstupleńni ŭ samym pačatku svajoj prahramy: jon padkreśliŭ, što minuły tydzień «byŭ adnym z najbolš ciažkich» z pačatku vajny i što «asabliva ciažka pryjšłosia na Charkaŭskim kirunku, dzie pad naciskam pieraŭzychodziačych sił praciŭnika sajuznyja vojski byli vymušanyja pakinuć raniej vyzvalenyja nasielenyja punkty».

Pry hetym viadučy zajaviŭ, što ŭkrainskaja armija niasie ciažkija straty — a rasijskaj hrupoŭcy ŭdałosia stabilizavać abstanoŭku i paźbiehnuć akružeńnia. U repartažy, dzie padrabiazna raspaviadałasia pra nastup na Kupiansk, padkreślivałasia, što ŭkrainskija vajskoŭcy ŭ tym liku abstrelvali žyłyja kvartały i što ich padraździaleńniami, u asnoŭnym, kirujuć zachodnija najmity.

Taksama ŭ «Viestiach niedieli» padkreślivałasia, što ŭ Chiersonskaj vobłaści ŭkrainskija vojski «nie zmahli zamacavać byccam by dasiahnutyja ŭ pačatku nastupu pośpiechi» (i z hetaj pryčyny nibyta pačali «teror hramadzianskaha nasielnictva»), a ŭ samaabvieščanaj «ŁNR» rasijskija vajskoŭcy praciahvajuć nastupalnyja dziejańni.

Taksama Kisialoŭ zajaviŭ, što ŭ iznoŭ zaniatych nasielenych punktach ukrainskija vajskoŭcy pravodziać «filtracyju», a «nieanacysty» pahražajuć zabivać mirnych ludziej, asabliva tych, chto paśpieŭ atrymać rasijski pašpart. «Usio heta vielmi horka», — reziumavaŭ viadoŭca.

«Itohi niedieli» (NTV)

U «Itohach niedieli» Irada Ziejnałava padrabiazna nie spyniałasia na adstupleńni, adnak u pieradačy byŭ pakazany bryfinh aficyjnaha pradstaŭnika Minabarony RF Ihara Kanašenkava, dzie jon abjaŭlaje ab «apieracyi pa zhortvańni i arhanizavanym pierakidańni iziumska-bałaklejskaj hrupoŭki dla naroščvańnia namahańniaŭ na danieckim kirunku».

U repartažy ź miesca padziej padkreślivałasia, što bai ŭ Charkaŭskaj vobłaści praciahvajucca, «ale samaha horšaha — zapavietnaha dla Ukrainy akružeńnia sajuznych siłaŭ — tak i nie zdaryłasia».

Pry hetym, pavodle zajavy karespandenta, «Ukraina-amierykana-jeŭrapiejskaja hrupoŭka USU» znachodzicca ŭ niavyhadnym stanoviščy, bo zanadta mocna raściahnutaja ŭzdoŭž linii frontu. Heta, zrešty, nie pieraškadžaje Kijevu «ŭkidvać fejki pra pieramohu», adznačyŭ karespandent.

U «Itohach niedieli» taksama padkreślili, što rasijskaja hrupoŭka praciahvaje paśpiachovyja dziejańni na danieckim kirunku.

«Voskriesnoje vriemia» (Pieršy kanał)

U vynikovaj prahramie Pieršaha kanała ab adstupleńni amal nie zhadvali. «Raźlutavanyja bai ŭsie apošnija dni: likvidacyja rešty bajevikoŭ, jakija panieśli vielizarnyja straty pry sprobie praryvu da Chiersonu, vyzvaleńnie ŭ DNR važnych stratehičnych punktaŭ, pierahrupoŭka vojskaŭ», — tak viadučy pačaŭ apovied pra apošnija padziei.

Pieršy kanał pakazaŭ vytrymki z bryfinhu Kanašenkava, dzie jon kazaŭ pra vialikija straty ŭkrainskaj armii — jahonaja abjava ab «pierahrupavańni» pakazanaja nie było. Paśla hetaha pačaŭsia repartaž «pra podźvihi bajcoŭ i kamandziraŭ padčas pierahrupavańnia vojskaŭ, pra jakoje ŭžo havaryłasia».

Nijakich detalaŭ pra sutnaść «pierahrupavańnia» karespandent nie pryvioŭ, tolki paŭtaryŭšy aficyjnaje vyznačeńnie Minabarony pra «apieracyju pa zhortvańni i arhanizavanym pierakidańni iziumska-bałaklejskaj hrupoŭki».

• 4
• 0
• 100
• 19
• 2
• 4
• 10
• 0