Va Ukrainie zahinuŭ mabilizavany ajcišnik banka. Jamu naležała adterminoŭka, ale jaho zabrali ŭ armiju i praz dva tydni adpravili na vajnu
Supracoŭnik «Rajfajzienbanka» Cimur Izmajłaŭ, jakoha mabilizavali niahledziačy na «broń», zahinuŭ va Ukrainie pad minamiotnym abstrełam, paviedamiŭ jahony advakat Kanstancin Jarochin, piša meduza.io.
Izmajłavu było 33 hady. Jon byŭ adnym z klučavych IT-śpiecyjalistaŭ u banku, supravadžaŭ sistemu «Mir». Jaho mabilizavali 23 vieraśnia, užo 7 kastryčnika jon trapiŭ u zonu bajavych dziejańniaŭ, a 13 kastryčnika zahinuŭ.
«Padadziena bolš za siem skarhaŭ. Padadzieny pazoŭ. Padadzienyja zvaroty na ŭsie haračyja linii. Publikacyi ŭ ŚMI i t.d. i taki vynik», — napisaŭ Jarochin u svaim telehram-kanale.
Advakat zajaŭlaje, što Izmajłavu naležyła adterminoŭka ad pryzyvu pa miescy pracy jak ajcišniku ź sistemna značnaha banka. 23 vieraśnia Minabarony zajaŭlała, što supracoŭnikaŭ IT-śfiery, apierataraŭ suviazi, ŚMI i bankaŭ nie buduć pryzyvać u ramkach mabilizacyi. Śpisy ź imionami tych, u kaho jość «broń», Centrabank adpraviŭ u Hienštab 28 vieraśnia, ale jany dahetul nie dajšli da vajenkamata, śćviardžaje abaronca. U Minabarony i vajennaj prakuratury Jarochinu zajavili, što nie vałodajuć danymi ab mabilizavanym supracoŭniku «Rajfajzienbanka».
Raniej siastra Cimura Izmajłava Hanna paviedamlała telehram-kanału «Ostorožno, novosti», što jaje brata zaprasili ŭ vajenkamat dla «ŭdakładnieńnia dakumientaŭ» jašče 18 vieraśnia, za try dni da abviaščeńnia mabilizacyi. Tam jamu ŭručyli pozvu na vučebnyja zbory na 22 vieraśnia, a na nastupny dzień zabrali vajenny bilet i mabilizavali.
Pavodle jaje słoŭ, u toj momant, kali Cimura mabilizavali, u siamji nie było času na zbor dakumientaŭ, jakija paćviardžajuć jaho prava na «broń». «Na siońniašni dzień usie dakumienty, jakija paćviardžajuć jaho prava na adterminoŭku, u nas jość. — raspaviadała jana 3 kastryčnika. — Kali my źjavilisia ŭ vajenkamat z hetymi dakumientami, vajskovy kamisar u ahresiŭnaj maniery rastłumačyŭ nam, što hetyja dakumienty ničoha nie značać, što «ničoha my zrabić nie možam» i što raz jon užo mabilizavany, to jon budzie słužyć».
Ciapier čytajuć
Łukašenka znajšoŭ niezvyčajnyja słovy dla spačuvańnia Chamieniei: «vierałomnaja ataka»27
Kamientary