Pres-sakratara A1 asudzili za «finansavańnie ekstremisckaha farmavańnia», jakoha nie isnavała

Paśla taho, jak byłomu pres-sakrataru A1 Mikałaju Bredzielevu abviaścili prysud — čatyry hady kałonii, siłaviki vyrašyli raskryć padrabiaznaści spravy.

Zhodna z hetaj infarmacyjaj, jamu zakidali art. 361-2 (finansavańnie dziejnaści ekstremisckaha farmiravańnia) za toje, što Anton Matolka na svaim kanale pijaryŭ A1 i byŭ znajomy z Bredzielevym. Adbyvałasia heta ŭ pieryjad sa žniŭnia pa śniežań 2020 hoda. Praŭda, tut jość dva niuansy.

Pieršy ŭ tym, što na toj momant kanał «MotolkoPomohi» nie byŭ pryznany ani ekstremisckim farmiravańniem (kanał pryznali takim 17 sakavika 2022 hoda), ani navat ekstremisckimi materyjałami (jon źjaviŭsia ŭ hetym śpisie 20 sakavika 2021 hoda).

Heta značyć, što faktyčna zakonu nadali zvarotnuju siłu. 

U ciapierašnim biełaruskim zakanadaŭstvie pad «ekstremisckuju» patraplaje lubaja dziejnaść, krytyčnaja ŭ dačynieńni da ŭłady Alaksandra Łukašenki.

U samich rekłamnych dopisach niama ničoha kryminalnaha — tam błohier raskazvaje pra novyja prajekty A1 i čas ad času trochu «nakidvaje» na kankurentaŭ kampanii.

Takim čynam, byccam by A1 finansavała «ekstremista» Matolku. 

Pavialičyć

Druhi niuans — nivodnaja z damovaŭ, apublikavanych u kanale siłavikoŭ, nie była padpisanaja asabista Bredzielevym. Matolka zaklučaŭ kantrakt z PR-kampanijaj «Siete Studyja», jakaja, ułasna kažučy, i była naniataja dla pijaru A1.

Pavialičyć

Pakolki sud byŭ zakrytym, detali jaho nieviadomyja.

Michaił Kiryluk, pravavy daradca Narodnaha antykryzisnaha kiraŭnictva, emacyjna prakamientavaŭ hetu spravu:

«Hałoŭnaja reč u tym, što Mikałaja Bredzieleva ŭvohule nie musili zatrymlivać. Niama roźnicy ŭ pravavym sensie, pryznanaja niejkaja supolnaść ekstremisckim farmiravańniem ci nie, — heta palityčny pieraśled.

I sam hety zakon nie pravavy. Zakanadaŭstva, datyčnaje ekstremisckich farmiravańniaŭ, stvoranaje vyklučna dla pieraśledu praciŭnikaŭ dziejnaj ułady. Jano supiarečyć Kanstytucyi i mižnarodnym pravavym aktam u halinie pravoŭ čałavieka, jakija Biełaruś padpisała, i luby mižnarodny sud apraŭdaŭ by Bredzieleva».

Nahadajem, Mikałaja Bredzieleva zatrymali 10 śniežnia 2021 hoda. Padčas zatrymańnia jaho katavali, a paśla vykłali jahonyja intymnyja fota ŭ praŭładnyja kanały. 

Heta nie pieršy vypadak, kali zakonam faktyčna nadajuć zvarotnuju siłu. Artykuł 361-1 (stvareńnie ekstremisckaha farmiravańnia abo ŭdzieł u im) nie raz vykarystoŭvali, kab adpravić u kałoniju žurnalistaŭ.

Tak, fryłansiera Andreja Kuźniečyka asudzili na 6 hod kałonii ŭzmocnienaha režymu za supracu z «Radyjo Svaboda». Žurnalista zatrymali 25 listapada 2021 hoda, miedyja pryznali ekstremisckim farmiravańniem tolki praź miesiac paśla hetaha (23 śniežnia).

Hałoŭredu «BiełaPAN» Irynie Leŭščynaj prysudzili 4 hady kałonii. Jaje aryštavali 18 žniŭnia 2021-ha, ahienctva pryznali ekstremisckim farmiravańniem tolki 1 listapada.

3 listapada 2021 hoda ŭ toj ža śpis unieśli «Biełsat». Žurnalistku Irynu Słaŭnikavu, jakuju zatrymali za paru dzion da hetaha, asudzili ŭ tym liku pa artykule 361-1 na 5 hod kałonii.

Pad hety artykuł padhaniajuć i prysudy aktyŭnym hramadzianam. Tak, u sakaviku minułaha hoda zatrymali maci piaci dziaciej Volhu Załatar. Siarod abvinavačańniaŭ — stvareńnie čataŭ «Ždanovičy siońnia», «Ždanoviči 2020 — kłub lubitielej piesien Coja», jakija pryznali ekstremisckimi farmiravańniami tolki praz 7 miesiacaŭ paśla aryštu žančyny (u śpis MUS čaty ŭnieśli 22 kastryčnika 2021-ha).

Byłomu pres-sakrataru A1 Mikałaju Bredzielevu prysudzili 4 hady kałonii

• 3
• 0
• 0
• 8
• 3
• 3
• 79
• 0