ZŠA razhladajuć mahčymaść zabarony abo abmiežavańnia vykarystańnia hazavych plit

Fiederalny ŭrad ZŠA moža razhledzieć pytańnie ab zabaronie hazavych plit z-za rostu zakłapočanaści z nahody ŭździejańnia pryboraŭ na zdaroŭje, paviedamlaje Bloomberg. Pradstaŭnik Kamisii ZŠA pa biaśpiecy spažyvieckich tavaraŭ, Ryčard Tramka-małodšy, nazvaŭ hazavyja plity «schavanaj niebiaśpiekaj» i skazaŭ, što ahienctva razhledzić šerah varyjantaŭ, u tym liku abmiežavańnie vytvorčaści abo impartu hazavych plit i/abo ŭviadzieńnie standartaŭ, kali ad ich treba pazbaŭlacca. Siońnia kala 35% chatnich haspadarak u ZŠA majuć hazavyja plity.

Navukoŭcy apošnija 40 hadoŭ papiaredžvali, što hetyja piečy mohuć vykidvać škodnyja dla zdaroŭja ŭzroŭni zabrudžvalnych rečyvaŭ, takich jak dyjaksid azotu, uharny haz, mietan i bienzoł. Roznyja daśledavańni, što pakazvajuć niebiaśpieku hazavych plit dla zdaroŭja — ad sardečna-sasudzistych prablem da raku, — pačynajuć upłyvać na hramadskaje mierkavańnie i vyklikajuć zaniepakojenaść ludziej z nahody patencyjnaj niebiaśpieki.

Tak, zusim niadaŭna my pisali pra daśledvańnie ŭ Kalifornii, jakoje vyjaviła, što ŭzrovień bienzołu, jaki mohuć vyłučać hazavyja plity, paraŭnalny z kolkaściu bienzołu ad pasiŭnaha kureńnia. A ŭ minułym miesiacy čarhovaje daśledavańnie pakazała, što hazavyja plity mohuć być adkaznyja za kožny vośmy vypadak dziciačaj astmy ŭ ZŠA.

Hazavyja plity taksama paharšajuć stan ekałohii: štohod jany vykidvajuć tak šmat mietanu, što hetyja vykidy parnikovych hazaŭ ekvivalentnyja 500 000 aŭtamabilaŭ z hazavym ruchavikom. Bolš za try čverci hetych vykidaŭ adbylisia, kali plita navat nie vykarystoŭvałasia.

Baraćba z hazavymi plitami ŭ ZŠA nabyvaje ŭsio bolš maštabny charaktar. Ruch za poŭnuju zabaronu padklučeńnia pryrodnaha hazu da budynkaŭ pryvioŭ da taho, što ŭ 2019 hodzie kalifarnijski horad Bierkli staŭ pieršym horadam u śviecie, jaki zabaraniŭ hazavyja padklučeńni ŭ novych budynkach. Zaraz dziasiatki amierykanskich haradoŭ rušać uśled, u tym liku Ńju-Jork, dzie histaryčny zakonaprajekt ab zabaronie novych hazavych padklučeńniaŭ ustupić u siłu dla małych budynkaŭ užo sioleta. A ŭ vieraśni minułaha hoda Kalifornija stała pieršym štatam, jaki zakanadaŭča zaćvierdziŭ pastupovuju admovu ad vykarystańnia pryrodnaha hazu, u pryvatnaści dla vodanahravalnikaŭ, da 2030 hoda.

Niadziŭna, što vytvorcy pryrodnaha hazu zmahajucca z hetym zubami i paznohciami. Halina kaardynuje namahańni pa padtrymcy zakanadaŭcaŭ, što prasoŭvajuć zakony, jakija nie dazvalajuć haradam i miastečkam zabaraniać pryrodny haz: 20 štataŭ (jakija składajuć kala traciny ahulnaha vykarystańnia pryrodnaha hazu ŭ ZŠA) pryniali takija «abarončyja» zakony z 2020 hoda.

Gizmodo raspaviadaje, što hazavaja pramysłovaść u svaim zmahańni za žyćcio zajšła tak daloka, što navat nabiraje ŭpłyvovych ludziej u instahramie, kab jany paetyčna vykazvalisia pra svaje hazavyja plity. A amierykanskija ekołahi abvinavačvajuć hazavych vytvorcaŭ u tym, što mienavita apošnija stajać za niezadavolenaściu i sudovymi pazovami niekatorych pradstaŭnikoŭ restarannaj industryi ŭ dačynieńni da miascovych zabaronaŭ na haz.

«Isnuje pamyłkovaje mierkavańnie, što, kali vy chočacie pryhatavać ježu z vytančanaj kuchni, heta treba rabić na hazie, — skazaŭ vyšejzhadany Tramka. — Heta staranna dahledžany mif».

• 18
• 0
• 6
• 8
• 10
• 0
• 5
• 0