Vy časta dasyłajecie važnyja imejły, ale raptam uspaminajecie, što nie dałučyli patrebny fajł? Dapamoža funkcyja admieny adpraŭki ŭ Gmail
Adzin z samych vializnych niedachopaŭ Gmail, aproč haniebnaj adsutnaści biełaruskaj movy ŭ naładach interfiejsu, — heta zanadta karotki pramiežak času dla admieny adpraŭki lista, ustalavany pa zmaŭčańni na piać siekund.
Funkcyja «Admianić adpraŭku» (Undo Send) u Gmail dazvalaje vam adklikać list, jaki vy tolki što adpravili. Pa zmaŭčańni ŭ vas jość tolki piać siekund, kab admianić adpraŭku lista, jaki vy mahli adpravić pamyłkova, pierš čym jon budzie dastaŭleny atrymalniku.
Paśla taho, jak vy naciskajecie knopku adpraŭki, na ekranie źjaŭlajecca apaviaščeńnie «Vaša paviedamleńnie adpraŭlena» (Message sent). U desktop-viersii opcyja źjavicca ŭnizie źleva, a na mabilnym telefonie — u pravym nižnim kucie.
Heta apaviaščeńnie taksama źmiaščaje knopku «Admianić» (Undo), jakaja dazvalaje spynić adpraŭku elektronnaha lista i adredahavać jaho pierad paŭtornaj adpraŭkaj abo poŭnaściu vydalić.
Vy možacie źmianić standartnuju piacisiekundnuju zatrymku adpraŭki ŭ naładach. Voś jak heta zrabić:
- Spačatku adkryjcie Gmail u nastolnym braŭziery — jak ni dziŭna, ale heta adziny sposab atrymać poŭnaje mieniu naład.
- Zatym naciśnicie na značok «Nałady» (vyjava šaściareńki ŭ pravym vierchnim kucie) i pierajdzicie da «Prahladzieć usie nałady» (See all settings).
- Znajdzicie punkt «Admianić adpraŭku» (Undo Send).
- Naciśnicie na mieniu, jakoje źjavicca, vy navat zmožacie vybrać varyjant: 5, 10, 20 abo 30 siekund zatrymki. Raim stavić na maksimum: hulać dyk hulać.
- Paśla taho, jak vy abrali svoj varyjant, prakrucicie staronku ŭ samy niz i nie zabudźciesia nacisnuć knopku «Zachavać źmieny» (Save changes).
Choć heta i zrazumieła, ale varta adznačyć, što kali elektronny list užo byŭ dastaŭleny ŭ paštovuju skryniu atrymalnika (naprykład, raniej ci ŭžo paśla 30-siekundnaj zatrymki), to, naturalna, vy ŭžo nie zmožacie adklikać jaho nazad. Akramia taho, niekatoryja paštovyja klijenty, naprykład, Outlook, mohuć nie padtrymlivać funkcyju «Admianić adpraŭku», tamu budźcie aściarožnyja i nie śpiašajciesia. I hałoŭnaje — pamiatajcie, što navat pamyłkova adpraŭleny list nie admienić zaŭtrašniaha ŭzychodu sonca i chutkaj parazy złačynnych tyraničnych režymaŭ:)
Ciapier čytajuć
Zahinuŭ biełaruski dobraachvotnik Alaksiej Łazaraŭ12
Kamientary