Jak stała viadoma «Našaj Nivie», apošni vialiki biełaruski bank z zachodnim kapitałam moža trapić u ruki «Rasnafty».
Miesiac tamu ŭ zachodniaj presie paviedamlałasia pra mahčymaść abmienu aŭstryjskich aktyvaŭ rasijskaha ŚbierBanka ŭ Jeŭropie na aktyvy bankaŭskaj hrupy Raiffeisen u Rasii. U abiedźviuch arhanizacyj «padviśli» aktyvy ŭ varožych jurysdykcyjach.
Aŭstryjskaje vydańnie Der Standard vykazvała zdahadku, što pad abmien moža trapić i biełaruskaja dačka «Rajfajziena» — Pryjorbank. Heta, adnak, była hipatetyčnaja infarmacyja. Jak raskazali «Našaj Nivie» ludzi z bankaŭskaha siektara, ździełka pa apisanaj schiemie naŭrad ci adbudziecca: takaja apieracyja zaskładanaja dla ažyćciaŭleńnia.
Zamiest hetaha Raiffeisen Bank International sprabuje prosta pradać svaje aktyvy ŭ Rasii, a razam z hetym, pa našaj infarmacyi, — i ŭ Biełarusi.
Rasijskija aktyvy hrupy Raiffeisen Bank International uklučanyja ŭ adpaviedny śpis i nie mohuć być pradadzienyja biez zhody Uładzimira Pucina, a kanjunktura vymahaje vialikaj źnižki, što ŭpłyvaje na asoby intarasantaŭ.
«Samy imavierny kandydat na kuplu — struktury Ihara Siečyna (kiraŭnika «Rasnafty»). U «Rasnafty» jość svoj bank «VBRR». Uzbujnicca za košt «Rajfajziena», jašče i ź vialikim dyskontam, — pryvabny varyjant dla «Rasnafty».
Biełaruski Pryjorbank idzie pryčepam da rasijskaj dački aŭstryjskaj hrupy i budzie pradadzieny toj ža kampanii, jakaja kupić rasijski aktyŭ, paasobku jany nie razhladajucca», — paviedamili «Našaj Nivie» surazmoŭcy ŭ bankaŭskich kołach.
Terminy i ŭmovy ŭhody pakul nie paviedamlajucca.
Pry hetym biełaruski Pryjorbank z 15 maja spyniaje dalaravyja apieracyi pa svaim karespandenckim rachunku ŭ amierykanskim Sicibanku.
Pieravieści dalary zaraz možna tolki praz armianski, azierbajdžanski, kazachstanski i kitajski banki, jakija prymajuć płaciažy tolki ŭ bok rezidentaŭ svaich krain.
Akramia taho, z 1 červienia Pryjorbank uvodzić kaśmičnuju miesiačnuju kamisiju ŭ 750 rubloŭ za absłuhoŭvańnie tych rachunkaŭ, na jakich na kaniec miesiaca znachodzicca bolš za 50 tysiač dalaraŭ ci jeŭra.
Pryjorbank — treci pa pamiery bank Biełarusi. 87,74% jahonych akcyj naležyć aŭstryjskaj Raiffeisen Group.
Sam bank da pośpiechu pryvioŭ jaho zasnavalnik i šmathadovy kiraŭnik Siarhiej Kaściučenka. U lipieni 2022 hoda łukašenkaŭcy asudzili jaho da 3 hadoŭ pazbaŭleńnia voli. Za vychad na volu jon byŭ vymušany vypłacić bolš za 10 miljonaŭ dalaraŭ. Paśla vyzvaleńnia jon pakinuŭ krainu.
Ihar Siečyn — asabisty siabar Uładzimira Pucina, u minułym jaho kaleha pa KDB, a padčas jahonaha prezidenctva — šmathadovy kiraŭnik rasijskaj karparacyi «Rasnafta», adzin z samych bahatych i ŭpłyvovych ludziej Rasii.
«Rasnafcie» ŭ Rasii naležyć bank «VBRR», što rasšyfroŭvajecca jak «Usierasijski bank raźvićcia rehijonaŭ», jaki absłuhoŭvaje spravy kampanii.
Acanić ciapierašni abjektyŭny košt biełaruskaha Pryjorbanka prablematyčna ŭ turbulentnych umovach vajny, sankcyj i łukašenkaŭskich represij. Zvyčajna banki ŭ Biełarusi i śviecie pradajucca pa canie blizkaj ci mienšaj za sumu ŭłasnaha kapitału.
Parytetbank byŭ pradadzieny za 50 miljonaŭ pry ŭłasnym kapitale 46 miljonaŭ dalaraŭ, ale heta vyniatak z praviłaŭ — za bank redka dajuć bolš, čym składaje jaho ŭłasny kapitał.
Fransabank u 2021-m vykupili za 27 miljonaŭ rubloŭ, Idejabank — za 50 miljonaŭ.
Ułasny kapitał Pryjorbanka vahajecca pamiž 400 i 450 miljonami dalaraŭ. Adnak u siońniašnich umovach dyskont moža skłaści da 80%, skazali «Našaj Nivie» ludzi z bankaŭskaha siektara.
Pryjorbank — apošni vialiki bank z zachodnim kapitałam u Biełarusi. Jość jašče BSB-Bank i Ceptarbank, jakija majuć bienieficyjaraŭ u Šviejcaryi, ale pa fakcie kirujucca biełarusami praz svaje jurydyčnyja asoby ŭ alpijskaj kanfiederacyi.
Alaksandr Łukašenka navat u pieryjad tak zvanaha bałansavańnia miž Rasijaj i Zachadam błakavaŭ sproby inšych zachodnich bankaŭ pryjści ŭ Biełaruś. U vypadku prodažu Pryjorbanka ŭ krainie zastanucca vialikija banki tolki abo dziaržaŭnyja, abo z rasijskim kapitałam. Siarod apošnich — ŚbierBank, BiełVEB, Biełhazprambank i Alfa-bank.
Čytajcie taksama:
Dziaržbanki pierastali publikavać hadavuju finansavuju spravazdačnaść
Staŭki pa valutnych depazitach u biełaruskich bankach rezka źmianilisia proci minułaha hoda
Kamientary