Štučny intelekt u ofisie nie dadaje rabotnikam ščaścia

Štučny intelekt pieraviarnuŭ situacyju na pracoŭnym rynku, bo prynios z saboj strach i ŭ niejkich śfierach užo masavyja zvalnieńni. Novaje daśledavańnie pakazvaje, što niehatyŭnyja nastupstvy na hetym nie zakančvajucca. Hrupa daśledčykaŭ vyrašyła vyjavić emacyjanalny ŭpłyŭ ŠI na psichiku čałavieka na pracoŭnym miescy, znajšoŭšy dokazy, jakija pakazvajuć na ryzyku pavyšanaj psichičnaj niestabilnaści.

Daśledavańnie, apublikavanaje ŭ Journal of Applied Psychology, vykarystoŭvaje prykład taho, jak «dahetul rucinnyja dziejańni nakštałt pošuku druhoha mierkavańnia ab prapanavanym rašeńni dla klijenta zaraz mohuć być vykananyja amal imhnienna (i bolš dakładna) sistemaj ŠI». Takim čynam, jak kažuć aŭtary, bolš častaje ŭzajemadziejańnie sa ŠI moža pryvieści da macniejšaha pačućcia sacyjalnaj addalenaści ad kaleh, što, imavierna, pavialičyć pačućcio adzinoty.

Dla daśledavańnia było praviedziena ažno čatyry ekśpierymienty ŭ čatyroch krainach: u ZŠA, na Tajvani, u Indaniezii i ŭ Małajzii. Supracoŭnikaŭ padzialili na dźvie hrupy i adnoj zahadali paźbiahać luboha vykarystańnia štučnaha intelektu na praciahu troch dzion, a druhoj — jak maha čaściej uzajemadziejničać ź im. Pradstaŭniki druhoj hrupy ŭ Indaniezii i Małajzii sutyknulisia ŭ vyniku z rostam pačućcia adzinoty i biessańniu.

Ekśpierymient na Tajvani, jaki achapiŭ 166 inžynieraŭ bijamiedyčnaj kampanii, pakazaŭ pavieličeńnie spažyvańnia ałkaholu paśla pracy ŭ druhoj hrupie (jakaja karystałasia ŠI), adnak z takimi ž uzroŭniami adzinoty i biessani, jakija demanstravała pieršaja hrupa.

Gizmodo pry hetym zaŭvažaje, što ŭ vynikach daśledavańnia jość ahavorka, što reakcyja na vykarystańnie ŠI vahajecca ŭ zaležnaści ad arhanizacyi, što moža pavialičyć uzrovień biessani, adzinoty i spažyvańnia ałkaholu. Tym nie mienš supracoŭniki, jakija vykarystoŭvali ŠI, akazalisia bolš usprymalnymi i bolš karysnymi dla svaich kaleh, choć u daśledavańni adznačajecca, što heta moža być adkazam na paviedamleńni ab roście adzinoty i na patrebu ŭ sacyjalnym uzajemadziejańni.

Takim čynam, kampanii pavinny harantavać, što ich supracoŭniki nie ŭzajemadziejničajuć vyklučna i tolki sa ŠI, jak havorycca ŭ daśledavańni, a ŭklučeńnie ŠI ŭ rabočyja pracesy moža źmianić pryjarytety sacyjalnaha ŭzajemadziejańnia na pracoŭnym miescy. Daśledčyki papiaredžvajuć, što štodzionnaje ŭzajemadziejańnie sa «štučnym kaleham» moža pryvieści da pavieličeńnia patreby ŭ siabroŭstvie, a taksama da pačućcia adzinoty.

• 2
• 0
• 1
• 1
• 1
• 1
• 1
• 0