«Natalla Ivanaŭna, vy možacie prosta adčynić nam varoty nočču». Prakopjeŭ źviarnuŭsia da Kačanavaj
Vadzim Prakopjeŭ vyrašyŭ zapisać zvarot da staršyni Savieta Respubliki Natalli Kačanavaj, kab pasprabavać schilić jaje da pieramoŭ.
Zvarot palityka apublikavaŭ telehram-kanał Nexta.
«Vielmi chutka, Natalla Ivanaŭna, žyćcio prymusić vas zrabić vielmi składany vybar. My ŭsie nazirajem za zdaroŭjem Łukašenki, i, niahledziačy na toje, što jon maje dostup da samych lepšych daktaroŭ, my razumiejem, što niešta nie tak (…) Jość vialikaja imaviernaść, što jamu nie pazdarovicca jašče bolš i zdarycca znakamity scenar, pry jakim vy budziecie na čale hetaj uładnaj kanstrukcyi.
Ja dapuskaju, što vy pazbaŭleny taho ŭzroŭniu sadyzmu, jaki jość u vašaha šefa. Ja dapuskaju, što, niahledziačy na addanuju słužbu rejchu, vy nie ŭdzielničali asabista i nie addavali zahady katavać ludziej na Akreścina», — kaža Prakopjeŭ.
Jon miarkuje, što ŭ takim vypadku Kačanava moža źviarnucca da Kramla pa dapamohu, ale zaścierahaje jaje ad hetaha.
«Vy možacie ŭvajści ŭ historyju jak čałaviek, jaki staŭ mahilščykam biełaruskaj dziaržaŭnaści, a možacie stać narodnym hierojem. Ja dapuskaju, što vy ŭ padručnik historyi chacieli b uvajści nie jak čałaviek, jaki kančatkova skončyŭ ź biełaruskaj dziaržaŭnaściu.
I dla hetaha, Natalla Ivanaŭna, ja prašu vas padumać nad prapanovaj. Heta prapanova nazyvajecca kruhły stoł. Z historyi Polščy my viedajem, što takoje mahčyma».
«Vy možacie być tym čałaviekam, jaki vyratuje krainu, — praciahvaje Prakopjeŭ. — Usio, što vam treba zrabić, — pavieryć, što za nami taksama jość siła. Za miažoj jość paŭmiljona biełarusaŭ, i mnohija ź ich navučanyja vajskovaj spravie.
Zamiest taho, kab čakać, kali ruskija praviaduć śpiecapieracyju i padpaŭzuć da vas sa zbrojaj ci «Navičkom», vy možacie prosta adčynić nam varoty. Nočču. Ja dumaju, što Valer Sachaščyk i mnohija inšyja aficery zrobiać usio, kab tranzit prajšoŭ mirna».
Palityk ličyć, što pra taki scenar nie rana havaryć.
«Ja liču, što vy znojdziecie sposab nam padmirhnuć, Natalla Ivanaŭna».
Prakopjeŭ zaŭvažaje, što nie maje nadziei na damovu z Łukašenkam, jaki nie prymie nijakich umoŭ ad Jeŭropy.
«Natalla Ivanaŭna, ja liču, što ŭ vas jość varyjant uziać niekalki dziejnych siłavikoŭ u saŭdzielniki, bo ja vieru, što siarod siłavikoŭ jość nievialikaja kolkaść [ludziej], niepramytaja ruskim śvietam, hatovaja abaraniać nacyjanalnuju dziaržavu».
«My vas nie kiniem na razarvańnie ruskim. Kali łaska, dumajcie», — takimi słovami Prakopjeŭ skončyŭ svoj zvarot.
Nahadajem, siońnia Minski haradski sud daŭ palityku zavočna 25 hadoŭ źniavoleńnia va ŭmovach uzmocnienaha režymu, ź ich 5 hadoŭ turmy. Jaho abvinavacili ŭ zmovie, adnym z vynikaŭ jakoj staŭ nibyta padpał doma Aleha Hajdukieviča ŭ červieni 2021 hoda.
Ciapier čytajuć
Ich Zareckaja: deputat-jabaćka Aleh Navicki kinuŭ biełaruskich inviestaraŭ na miljony dalaraŭ. Detali schiemy2
Kamientary