«Rakieta trapiła roŭnieńka ŭ kabiniet». Ukraincy źniščyli rasijskaha pałkoŭnika, jaki kiravaŭ zmahańniem z padpollem na akupavanych terytoryjach

U Rasii aficyjna paćvierdzili hibiel pałkoŭnika ŭnutranaj słužby RF Siarhieja Pastavałava. Paviedamleńnie ab pachavańni, jakoje adbyłosia 21 červienia, apublikavali ŭ telehram-kanale palicyi Varoniežskaj vobłaści Rasii.

Pastavałaŭ u mirny čas pracavaŭ namieśnikam načalnika ŭpraŭleńnia MUS Varoniežskaj vobłaści, dzie jon kuryravaŭ upraŭleńnie pa achovie hramadskaha paradku, darožnaj palicyi rehijona, kanvojnuju słužbu i ekśpiertny centr. Vosieńniu 2022 hoda Pastavałaŭ byŭ nakiravany ŭ akupavanuju Chiersonskuju vobłaść, dzie jaho pryznačyli namieśnikam načalnika ŭpraŭleńnia MUS.

Pavodle infarmacyi telehram-kanała «7ch7», 53-hadovy Siarhiej Pastavałaŭ trapiŭ pad abstreł 10 červienia. Pałkoŭnik znachodziŭsia ŭ adnym z budynkaŭ bazy adpačynku na Arabackaj Strełcy ŭ Hieničaskim rajonie padčas vizitu vice-premjera, ministra pramysłovaści i handlu RF Dzianisa Manturava.

«RIA Novosti» pisali pra ŭdar pa pansijanacie rakietami Storm Shadow i adnaho čałavieka, jaki zahinuŭ.

Jak vyśvietliłasia paźniej, udar byŭ naniesieny pa plažnym pansijanacie Chalet Thermal u siale Ščaśliŭcavie na Arabackaj Strełcy, što vyklikała vialiki pažar.

Rasijski prapahandyscki telehram-kanał Rybar padaŭ hetuju ataku jak «praciah udaraŭ pa hramadzianskich abjektach». A pansijanat Rybar nazvaŭ punktam «časovaha raźmiaščeńnia dla evakujavanych z zony padtapleńnia žycharoŭ».

Ale, jak vyśvietliłasia, heta chłuśnia. Tam byli nie mirnyja žychary, a vajskoŭcy.

Pavodle infarmacyi krynicy «7ch7», siarod ich byŭ i Pastavałaŭ, pachavańnie jakoha pavinna było prajści paśla identyfikacyi pareštkaŭ.

«Siońnia ŭ Varoniežy raźvitvajucca z pałkoŭnikam Pastavałavym, — piša ŭ svaim telehram-kanale vajenkar «Trynaccaty», rasijski bajec, jaki vajuje ŭ Chiersonskaj vobłaści. — Rakieta patrapiła roŭnieńka ŭ jaho kabiniet. Jaho zabojstva, dumaju, naŭprost źviazanaje z tym, što jon nanosiŭ prykmietnuju škodu ŭkrainskim špijonam i ždunam [ukraincy, jakija čakajuć vyzvaleńnia svajoj ziamli] u rehijonie, aktyŭna ŭdzielničajučy ŭ intehracyi Chiersonskaj vobłaści».

Budynak pansijanata ŭvachodzić u kompleks niedabudavanaj kliniki adnaŭlenčaha lačeńnia prafiesara Uładzimira Kaziaŭkina, jaki byŭ zaniaty pad patreby rasijskaj armii vosieńniu 2022 hoda paśla adstupleńnia rasijskaj armii z Chiersona i abviaščeńnia Hieničaska «časovaj stalicaj» Chiersonščyny. Hety kompleks ujaŭlaje saboj novy «ŭradavy kvartał».

Jak paviedamili Centru žurnalisckich rasśledavańniaŭ miascovyja žychary, paśla ŭdaru zaharelisia dva korpusy, zasielenyja čynoŭnikami z Rasii i miascovymi kałabarantami. Ahulnaja kolkaść paciarpiełych nieviadomaja.

Čytajcie jašče:

Ukraincy rakietnym udaram źniščyli načalnika štaba 35-j armii

Ministr abarony Rasii Siarhiej Šajhu ŭpieršyniu ź vieraśnia 2022 hoda raskazaŭ pra rasijskija straty

U Novaj Tavałžancy zabity rasijski pałkoŭnik, kiraŭnik apieratyŭnaj hrupoŭki «Biełharad»

• 82
• 0
• 5
• 2
• 3
• 6
• 7
• 0