Va Ukrainu pa Dniapry pryniesła cieła tapielca-biełarusa — «Radyjo Svaboda»
Pra trahičny vypadak, jaki zdaryŭsia niekalki dzion tamu, daviedałasia «Radyjo Svaboda» z krynic va ŭkrainskim Čarnihavie. Vypadak uskosna paćvierdziła i miascovaja palicyja.
Trahiedyja zdaryłasia niekalki dzion tamu. Na terytoryi Biełarusi ŭ Dniapry pry niavyśvietlenych abstavinach patanuŭ čałaviek. Płyńniu raki jahonaje cieła adniesła va Ukrainu, jak miarkuje surazmoŭca «Svabody» ŭ Čarnihavie. Tam jaho znajšli 27 červienia.
«Čarnihaŭskija pamiežniki dastali z Dniapra cieła biełarusa. Jon, jak miarkujecca, patanuŭ kala biełaruskaha haradskoha pasiołka Łojeŭ. Reč u tym, što miaža pamiž Ukrainaj i Biełaruśsiu prachodzić tam pa farvatary Dniapra. Tak z płyńniu cieła mužčyny apynułasia na ŭkrainskaj terytoryi», — havoryć krynica.
Pa słovach ukrainskaha surazmoŭcy, zahinuły hramadzianin Biełarusi žyŭ u Łojevie i pracavaŭ tam na paromie, jaki štodzień pieravozić ludziej i techniku z pravaha bieraha Dniapra na levy. Parom chodzić pa maršrucie Łojeŭ — Abakumy.
U palicyi Čarnihaŭskaj vobłaści pryznajuć, što ŭ morhu abłasnoha centra sapraŭdy jość cieła mužčyny, jakoha dastali z raki, adnak jahonaha hramadzianstva nie nazyvajuć.
«U nas u Čarnihaŭskaj vobłaści jość fakt vyjaŭleńnia cieła ŭ race. Ale asoba zahinułaha nie vyznačanaja. Peŭny čas cieła moža być u morhu. Na hety momant cieła čałavieka prachodzić jak nieapaznanaje», — patłumačyła ŭ razmovie sa «Svabodaj» presavaja aficerka palicyi Čarnihaŭskaj vobłaści Natalla Słabieniak.
Paśla pačatku rasijskaha ŭvarvańnia va Ukrainu pamiežnyja pierachody ź Biełaruśsiu spynili pracu, miaža z ukrainskaha boku zaminavanaja. Mahčymy varyjant viarnuć cieła zahinułaha z Ukrainy ŭ Biełaruś — zrabić heta praz Polšču.
Ciapier čytajuć
Zahinuŭ biełaruski dobraachvotnik Alaksiej Łazaraŭ12
Kamientary