Siarod tych, chto nabraŭ maksimalny bał dla pastupleńnia, — zorka TikTok ź vioski i kazachstaniec, jaki za dva hady vyvučyŭ historyju Biełarusi na 100 bałaŭ. Voś kudy sioleta pastupajuć čatyrochsotbalniki.
Univiersitet kultury: zorka tyktoku ź vioski
Volha Druščyc maje siaredni bał atestata 10, jana atrymała pa 100 bałaŭ na centralizavanych ekzamienach pa biełaruskaj movie, historyi Biełarusi i na CT pa hramadaznaŭstvie. Dziaŭčyna skončyła škołu ŭ vioscy Staroje Siało Žabinkaŭskaha rajona. U jaje kłasie zhodna sa śpisam značyłasia ŭsiaho piać vučniaŭ, ale Volha nie mahła naviedvać zaniatki praz prablemy sa zdaroŭjem — jana ŭvieś čas była na chatnim navučańni.
Volha aktyŭna viadzie błoh u TikTok, publikuje videa, u jakich žartuje sa svajho redkaha hienietyčnaha zachvorvańnia. Najbolš papularnaje videa nabrała šeść miljonaŭ prahladaŭ.
@dochka_bossa_3.0 a potom jeho pieriedieržiš, i ono płavajet v čaje #riekomiendacii #riek #triendy ♬ original sound - Dave & Goody
Jość i bolš surjoznyja videa, u jakich dziaŭčyna raspaviadaje pra samu chvarobu i pra toje, čamu jaje ruki vyhladajuć nie tak, jak va ŭsich.
@dochka_bossa_3.0 Otviet polzovatielu @thespaikhg #riekomiendacii #riek #fyp #triendy ♬ Aesthetic - Tollan Kim
Volha pierakładaje na biełaruskuju movu i śpiavaje pieśni ruskamoŭnych śpievakoŭ i śpiavačak, naprykład, «Zaparožac» Manietački, «Salut, Viera» Valeryja Mieładze, «Vaśmikłaśnica» hurta «Kino» i inšyja.
Abituryjentka padała dakumienty ŭ Biełaruski dziaržaŭny ŭniviersitet kultury i mastactvaŭ na śpiecyjalnaść «sacyjalna-kulturny mieniedžmient i kamunikacyi» (prafilizacyja «mieniedžmient rekłamy i hramadskich suviaziej»). Vučycca dziaŭčyna płanuje na zavočnym. Jana kaža, što hałoŭnym padčas vybaru budučaj prafiesii dla jaje była mahčymaść pracavać dystancyjna.
Linhvistyčny ŭniviersitet: chłopiec z Kazachstana, jaki za dva hady vyvučyŭ historyju Biełarusi, i vypusknica lidskaj himnazii
Adzin z tych, chto atrymaŭ 400 bałaŭ, — Raman Košman, vypusknik mahiloŭskaj siaredniaj škoły № 5. Jon naradziŭsia ŭ Kazachstanie i pražyŭ tam 16 hadoŭ. Skončyŭ dzieviać kłasaŭ u Ałmaty i ŭ 2021 hodzie razam z mamaj i bratami pierajechaŭ u Biełaruś. Cikava toje, što adzin z pradmietaŭ, jaki chłopiec zdavaŭ (i atrymaŭ zapavietnuju sotniu), — heta historyja Biełarusi, jakuju Raman vyvučaŭ tolki dva hady. Darečy, u mahiloŭskaj škole jaho ciapier ličać bieź pierabolšvańnia hierojem, bo chłopiec z Kazachstana staŭ pieršym u historyi navučalnaj ustanovy vučniem, jaki zmoh tak bliskuča zdać CT.
Pastupać Raman vyrašyŭ na pierakładčycki fakultet Minskaha dziaržaŭnaha linhvistyčnaha ŭniviersiteta. Jon raspaviadaŭ, što pieršapačatkova vybiraŭ nie VNU, a pradmiety, jakija jaho cikaviać (ruskaja i anhlijskaja movy, historyja Biełarusi), a ŭžo potym hladzieŭ, kudy ź imi voźmuć. U MDŁU, akramia anhlijskaj movy, Raman płanuje vyvučać ispanskuju i dumaje pra tureckuju.
Pastupać u linhvistyčny ŭniviersitet płanuje i vypusknica lidskaj himnazii №1 Ksienija Sabatkoŭskaja. Ksienija zdavała centralizavany ekzamien pa hramadaznaŭstvie i ruskaj movie. Jašče 100 bałaŭ atrymała, zavajavaŭšy dypłom 1 stupieni (absalutny) na zaklučnym etapie respublikanskaj alimpijady pa anhlijskaj movie.
BDMU: budučy stamatołah, jakaja piače tarty, i jašče adna vydatnica ź Lidy
Milena Vaśko vučyłasia spačatku ŭ mazyrskaj škole № 11, a potym u Mazyrskim dziaržaŭnym abłasnym licei. Jašče ŭ dziaviatym kłasie dziaŭčynka vyrašyła, što choča być stamatołaham. Pastupić u BDMU na biudžet — zadača davoli składanaja, tamu ŭ dziasiatym kłasie Milena admoviłasia ad bolšaści chobi i volny čas pryśviačała vyvučeńniu chimii, bijałohii i ruskaj movy. A kali rabiłasia zusim ciažka i chaciełasia adpačyć ad zaniatkaŭ, jana išła na kuchniu piačy tarty.
Vynik — 300 bałaŭ na ekzamienach i teściravańni. Abituryjentka adznačyła, što ŭ hetym hodzie testy stali lahčejšyja, tamu i samy vysoki vynik atrymać nie tak składana, jak raniej. Jana ličyć, što heta matyvuje.
Mara dziaŭčyny amal što spraŭdziłasia: jana padała dakumienty na stamatałahičny fakultet Biełaruskaha dziaržaŭnaha miedycynskaha ŭniviersiteta.
U mieduniviersitet idzie taksama Palina Dyčak ź Lidy (u hetym horadzie sioleta rossyp stabalnikaŭ). Jana zdała na 100 bałaŭ centralizavanyja ekzamieny pa ruskaj movie i chimii, a paźniej atrymała maksimalny vynik na CT pa bijałohii. Dziaŭčyna źbirajecca na lačebny fakultet. Sioleta BDMU skončyŭ jaje brat.
BDUIR: prahramist, jaki chvalujecca, i vučań hoda Minskaj vobłaści
Raman Kandracienia skončyŭ himnaziju ŭ Hancavičach. Jaho «kalekcyja» składajecca sa 100 bałaŭ pa matematycy, fizicy i ruskaj movie. Z VNU mary jon vyznačyŭsia daŭno — Biełaruski dziaržaŭny ŭniviersitet infarmatyki i radyjoelektroniki. Ale nie moh vyznačycca z fakultetam. U vyniku abraŭ fakultet kampjutarnych sistem i sietak BDUIR. U adroźnieńnie ad mienš paśpiachovych abituryjentaŭ, chłopiec chvalavaŭsia nie pra toje, ci projdzie jon na biudžet, a pra toje, kab pravilna aformić i padać dakumienty ŭ VNU. Tamu na ŭsialaki vypadak pryjšoŭ u pryjomnuju kamisiju ŭ adzin ź pieršych dzion ustupnaj kampanii.
Uładzisłaŭ Kazieła skončyŭ salihorskuju siaredniuju škołu № 4. Jon zdavaŭ ruskuju movu, matematyku i fiziku. Ale ž u svajoj škole chłopiec staŭ zorkaj jašče da ŭstupnaj kampanii: u kancy 2022 hoda jon atrymaŭ tytuł «Vučań hoda Minskaj vobłaści».
Dakumienty Uładzisłaŭ vyrašyŭ padać u Biełaruski dziaržaŭny ŭniviersitet infarmatyki i radyjoelektroniki na fakultet kampjutarnych sistem i sietak, śpiecyjalnaść — «infarmatyka i technałohija prahramavańnia». U intervju BiełTA chłopiec kazaŭ, što letam płanuje pačać vyvučać vyšejšuju matematyku i praciahvać prahramavać, kab padčas vučoby ŭ VNU jamu było lahčej.
U hety ŭniviersitet źbiraŭsia taksama Dzianis Kahukin z Połacka. Chłopca cikavić prahramnaja inžynieryja.
BDU: prykładnaja matematyka i žurfak
Mark Mackievič z Navapołacka pastupaje na fakultet prykładnoj matematyki i infarmatyki ŭ BDU. Jon nabraŭ maksimalnyja bały na CT pa ruskaj movie i matematycy. Plus 100 bałaŭ aŭtamatam pa fizicy (za dypłom respublikanskaj alimpijady).
Abituryjent zachaplajecca prahramavańniem, źjaŭlajecca vypusknikom dźviuch źmien Nacyjanalnaha dziciačaha technaparka.
Anhielina Łaško, jakaja skončyła himnaziju № 1 Lidy, svaje 100-balnyja siertyfikaty atrymlivała z ruk staršyni Kamiteta dziaržaŭnaha kantrolu Hrodzienskaj vobłaści Anatola Darožki (na Hrodzienščynie vyrašyli arhanizavać śviata dla najlepšych abituryjentaŭ).
U honar taho, što dziaŭčyna pryniesła dakumienty na žurfak BDU (śpiecyjalnaść «infarmacyja i kamunikacyja»), u telehram-kanale fakulteta źjaviŭsia śviatočny post. Anhielina raspaviała, što zaŭsiody cikaviłasia historyjaj Biełarusi i ruskaj movaj — i mienavita hetyja pradmiety (plus hramadaznaŭstva) joj treba było zdavać dla pastupleńnia.
***
Sioleta paviedamlałasia pra 11 čatyrochsotbalnikaŭ. Aproč zhadanych vyšej, maksimalny bał nabrała vypusknica klimavickaj siaredniaj škoły № 1 Alina Chartnik.
Ciapier čytajuć
Novym śpikieram Kaardynacyjnaj rady, chutčej za ŭsio, stanie Arciom Bruchan3
Kamientary