Astrafizik (i pa sumiaščalnictvie hitaryst Queen) Brajan Mej staŭ suaŭtaram pieršaha ŭ śviecie 3D-atłasa pavierchni asteroida
Lehiendarny rokier, jaki svajho času pakinuŭ navuku, kab stać adnym z zasnavalnikaŭ Queen, apublikavaŭ daviednik pra asteroid Benu — kalaziamny kamień vahoj 85 miljonaŭ ton, jaki krucicca pobač z nami vakoł Sonca.
76-hadovy Mej źjaŭlajecca suaŭtaram atłasa razam z Dante Łaŭreatam (Dante Lauretta), navukoŭcam-płanietołaham z Univiersiteta Aryzony i hałoŭnym daśledčykam NASA ŭ misii OSIRIS-REx. Atłas nazyvajecca Bennu 3-D: Anatomy of an Asteroid i pradajecca jak «pieršy ŭ śviecie poŭny (i stereaskapičny) atłas asteroida».
Jašče ŭ 2019-m Brajan Mej dałučyŭsia da kamandy, jakaja vyvučaje Benu. Choć asteroid maje nievialiki šaniec sutyknucca ź Ziamloj ciaham nastupnych 300 hadoŭ, jon źjaŭlajecca kalaziamnym — i tamu patencyjna niebiaśpiečnym — abjektam. Z pryčyny taho, što Benu maje nienulavy šaniec sutyknucca ź Ziamloj, jon pastajanna znachodzicca pad nahladam Centra vyvučeńnia kalaziamnych abjektaŭ NASA.
Jak piša The Universe Space Tech, niekalki hadoŭ tamu OSIRIS-Rex ažyćciaviła pasadku kaśmičnaha aparata na pavierchniu hetaha niabiesnaha cieła, jaki ŭziaŭ uzor i ciapier viazie jaho na našu płanietu. Čakajecca, što karabiel vierniecca na Ziamlu z uzorami 24 vieraśnia hetaha hoda. Darečy, heta nie pieršy materyjał asteroida, jaki maje patrapić na Ziamlu. Raniej uzory ŭžo dastavili japonskija aparaty «Chajabusa-1» i «Chajabusa-2». Adnak kapsułu OSIRIS-Rex navukoŭcy ŭsio roŭna čakajuć ź nieciarpieńniem.
Mej daŭno cikavicca stereaskapičnaj fatahrafijaj i niadaŭna apublikavaŭ knihu Stereoscopy Is Good For You: Life in 3-D. Jak raspaviadaje Amateur Photographer, Mej ciahaŭ z saboj svaju ŭłasnuju stereakamieru ŭ turach Queen, stvarajučy 3D-vyjavy momantaŭ hurta na scenie i za kulisami. Ciapier takaja ž technałohija prymianiajecca dla dalokaha asteroida. Drukavanaje vydańnie atłasa budzie ŭklučać 120 ilustracyj, 50 map i 80 stereaskapičnych zdymkaŭ abjekta.
Jak viadoma, Brajan Mej rabiŭ pierapynak u vyvučeńni fiziki ŭ Imperial College London, kab stvaryć hurt Queen razam z Fredzi Merkjury i Rodžeram Tejłaram. Siarod inšych Mej napisaŭ dla hurta takija suśvietna viadomyja chity, jak « We Will Rock You», «I Want It All» i «Hammer to Fall». U 2006 hodzie rokier viarnuŭsia ŭ vyšejšuju škołu, kab zaviaršyć svaju doktarskuju dysiertacyju pa mižpłanietnym pyle.
Gizmodo raspaviadaje, što Mej častkova pryśviaciŭ svaju dysiertacyju Queen i adznačyŭ, što danyja, sabranyja infračyrvonym astranamičnym spadarožnikam (IRAS) padčas padarožža Queen pa Paŭdniovaj Amierycy ŭ 1983 hodzie, značna palepšyli razumieńnie astranomami Zadyjakalnaha (abo Mižpłanietnaha) vobłaka pyłu. Mižpłanietnaje vobłaka pyłu składajecca z kaśmičnaha pyłu — drobnych čaścic, jakija pranizvajuć prastoru pamiž płanietami ŭ płanietnych sistemach, padobnych da Soniečnaj. Hetaja sistema čaścic vyvučałasia na praciahu mnohich hadoŭ z metaj zrazumieć jaje pryrodu, pachodžańnie i suviaź z bujniejšymi kaśmičnymi ciełami.
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1010
Kamientary