«Samy hłyboki ŭdych»: zachaplalnaje i trahičnaje padarožža ŭ śviet frydajvinhu

Padčas prahladu dakumientalnaha filma «Samy hłyboki ŭdych», jaki nahladna raskryvaje tajamnicu i pahrozu marskich hłybiń, ciažka nie ŭspomnić pra katastrofu batyskafa «Tytan», jakaja adbyłasia dva miesiacy tamu.

Ale ž film Netflix zaprašaje hledačoŭ pahruzicca ŭ hłybiniu razam z amatarami vostrych adčuvańniaŭ, nie pryviazanymi da sudna: jaho temaj źjaŭlajecca frydajvinh — ekstremalny vid sportu, u jakim udzielniki apuskajucca na hłybiniu na niekalki chvilin biez akvałanha. U frydajvieraŭ jość tolki hidrakaścium i zatyčki dla nosa (pra akulary nie moža być i havorki, bo cisk pavietra moža pryvieści da razryvu kryvianosnych sasudaŭ u vačach).

Stužka apaviadaje nie tolki pra sport — heta chutčej historyja kachańnia ŭ kantekście ekstremalnaha sportu. U centry siužeta — čempijonka Italii Alesija Ziekini i irłandski dajvier Styvien Kinan, jakija paznajomilisia na spabornictvach 2017 hoda na Bahamach, pačali razam treniravacca i ŭ ich zaviazaŭsia karotki raman. Pamiž hałoŭnymi hierojami jość vyraznaja piaščota i ramantyka — jakaja datyčyć jak ich lubovi da sportu, tak i adno da adnaho.

Pakazvajučy dzivosnyja padvodnyja kadry i videazapisy z padarožžaŭ Alesii i Styviena, režysiorka Łaura MakHan raspaviadaje pra dvuch šukalnikaŭ pryhod, pierš čym piarojdzie da trahiedyi, jakaja ŭzrušyła supolnaść frydajvieraŭ.

MakHan naŭmysna ŭtojvaje peŭny materyjał, kab uvieś čas trymać hledačoŭ u napruzie (choć film pryśviečany tamu, što napružana samo pa sabie).

Stužka pačynajecca z taho, što daje ŭjaŭleńnie pra ryzyki, ŭłaścivyja frydajvinhu. Zahłybleńnie adbyvajecca adnosna biesprablemna: prykładna praz 30 mietraŭ paśla apuskańnia dajvier ŭvachodzić u stan «volnaha padzieńnia», kali jaho prosta ciahnie ŭniz pad dziejańniem siły ciažaru. Ale prablemy pačynajucca, kali treba padniacca nazad da pavierchni. Vy pavinny vyžyć, prapłyvajučy skroź cisk vady, i apošnija 10 mietraŭ — samyja niebiaśpiečnyja. My nazirajem, jak ekśpierty praryvajucca skroź pavierchniu i tut ža hublajuć prytomnaść — pakutlivaja i tryvožnaja źjava, raspaŭsiudžanaja ŭ hetym vidzie sportu.

Hałoŭnaja supierzdolnaść frydajvieraŭ — zatrymlivać dychańnie na varjackuju kolkaść času. I pry hetym vytrymlivać tony cisku vady i faktyčna apuskacca ŭ samyja ciomnyja hłybini akijanu. Dla kahości heta hučyć jak katavańnie, ale dla ich heta — samy vialiki zapał.

My daviedajemsia pra samaje niebiaśpiečnaje miesca dla dajvinhu na ziamli — Błakitnuju dzirku ŭ jehipieckim Dachabie. Pahružeńnie ŭ Błakitnuju dzirku ličycca bolš niebiaśpiečnym, čym uzychodžańnie na Evierest. Tolki adna žančyna — rasijskaja frydajvierka Natalla Małčanava, — paśpiachova ździejśniła apuskańnie. Stać druhoj žančynaj, jakaja nyrnie ŭ Błakitnuju dzirku, viadoma ž, — meta hałoŭnaj hieraini Alesii.

U treciaj častcy filma MakHan splataje razam emacyjnuju i trahičnuju historyju, jakaja nikoha nie pakidaje abyjakavym. Dzivosnyja kadry inšapłanietnaha padvodnaha śvietu, jakija niamnohija z nas kali-niebudź ubačać na svaje vočy, padmacoŭvajuć uražańnie. «Samy hłyboki ŭdych» dakumientuje nie tolki niekatoryja z samych niebiaśpiečnych i niemahčymych rečaŭ, jakija moža zrabić čałaviek, ale i hłybokija suviazi, jakija naradžajucca ŭ samych niečakanych miescach i abstavinach.

Čytajcie jašče:

Jakoje voziera ŭ Biełarusi najbolš prydatnaje dla dajvinhu?

U Kitai nabirajuć papularnaść dajviery-rusałki

Netflix vypuściŭ dakumientalny mini-sieryjał «Jak stać tyranam» — čamu treba hladzieć

• 4
• 0
• 0
• 0
• 5
• 0
• 1
• 0