Instagram zrobić Reels bolš praciahłymi dla kankurencyi z TikTok i YouTube?
Limit praciahłaści moža być pavialičany z troch chvilin da dziesiaci. Internet-resursy ŭsio bolš padobnyja adzin da adnaho.
Praciahvajecca bitva troch jokadzun: Instagram, YouTube i TikTok — zmahajucca za ŭvahu karystalnikaŭ. Jany ŭsio bolš pazyčajuć adzin u adnaho funkcyjanał i tym samym stanoviacca ŭsio bolš padobnymi.
Pavodle słoŭ aŭtarytetnaha mabilnaha raspracoŭščyka Alesandra Pałuca, Instagram byccam źbirajecca značna pavialičyć maksimalnuju praciahłaść Reels-videa. Siońnia ćviordy limit dla ich składaje try chviliny, ale skrynšoty, vystaŭlenyja Pałuca, śviedčać pra mahčymy chutki skačok ažno da 10 chvilin. Heta faktyčna pieraŭtvaryła b cukierbierhaŭskuju sacsietku ŭ niešta kštałtu mini-YouTube.
Hety krok taksama dazvolić Instagram nie adstać ad adnaho z hałoŭnych kankurentaŭ TikTok, bo apošni ŭžo dazvalaje karystalnikam raźmiaščać videa praciahłaściu da dziesiaci chvilin. Zdajecca, što TikTok i Instagram patrapili ŭ niejki ŭraboras mimikryi: adzin resurs rehularna dadaje funkcyi, pačatkova dadadzienyja kankurentam.
Tak, zusim niadaŭna my paviedamlali, što TikTok dadaŭ opcyju stvareńnia tekstavych publikacyj, dzie karystalniki mohuć dzialicca svaimi historyjami, vieršami, tekstami piesień i inšym piśmovym kantentam. A ŭ minułym hodzie kitajskaja sacsietka dadała novuju funkcyju pad nazvaj «Fotarežym», jakaja dazvoliła dzialicca nie tolki videarolikami, ale taksama i fotazdymkami razam z podpisami daŭžynioj da 2200 simvałaŭ.
Tym časam, pakul TikTok i Instagram zmahajucca za dolu piraha ŭ halinie daŭžejšych videa, YouTube ruchajecca ŭ procilehłym kirunku. Jon imkniecca zavajavać lepšyja pazicyi ŭ prastory karotkich videa, niadaŭna dadaŭšy nabor instrumientaŭ dla videastvaralnikaŭ i skrolinh-stužku dla pošuku muzyki ŭ styli TikTok. Časy, kali vy mahli lohka apisać Instagram jak sacsietku dla fotazdymkaŭ, TikTok — jak sacsietku dla karotkich videa, a YouTube — jak płatformu dla doŭhich videa, prajšli. Vidać, što ŭsie jany chočuć być «usim u adnym fłakonie».
Vydańnie Engadget źviarnułasia da Meta pa kamientar adnosna pierachodu da doŭhafarmatnaha videakantentu. Kampanija paćvierdziła, što vyjavy, jakija pratačylisia ŭ internet, realnyja, ale ŭjaŭlajuć saboj pakul tolki «ŭnutrany pratatyp», jaki na hety momant nie testujecca.
Kamientary