Dazvoł na pastajannaje pražyvańnie za miažoj nie abaviazkovy, ale dla čaho jon? I što, kali nie afarmlać jaho? Tłumačyć adździeł mihracyi
U Pałažeńni ab paradku vyjezdu na pastajannaje pražyvańnie za miažoj hramadzian Biełarusi havorycca, što achvotnyja pakinuć krainu majuć źviarnucca z adpaviednaj zajavaju ŭ padraździaleńni pa hramadzianstvie i mihracyi. Z dakumienta niezrazumieła, ci abaviazkovaje takoje patrabavańnie i što budzie, kali hramadzianin praihnaruje jaho.
Pałažeńnie svajoj pastanovaju zaćvierdziŭ urad, i jano ŭstupiła ŭ siłu 20 listapada. U im prapisanyja abaviazki hramadzian, jakija chočuć aformić vyjezd dla pastajannaha pražyvańnia za miežami Respubliki Biełaruś.
Čytaču «Našaj Nivy» ŭ adnym ź minskich adździełaŭ pa hramadzianstvie i mihracyi skazali, što takaja pracedura nie abaviazkovaja, a za jaje ihnaravańnie nie praduhledžana adkaznaści.
Pa słovach supracoŭnicy mihracyjnaj słužby, rašeńnie ab dazvole na pastajannaje pražyvańnie za miažoju spatrebicca hramadzianinu Biełarusi, kali jon, naprykład, «u Polščy, Litvie, Łatvii zachoča aformić PMŽ» i biełaruski dakumient budzie śviedčyć ab adsutnaści na radzimie niavykananych abaviazkaŭ.
Akramia taho, dazvoł na pastajannaje miesca žycharstva vyrašaje inšyja pytańni, pieradusim majomasnaha charaktaru, zapeŭnili čytača «Našaj Nivy» ŭ adździele pa mihracyi i hramadzianstvie.
Naprykład, kali hramadzianin Biełarusi z dazvołam na PMŽ zachoča viarnucca na nabytaj za miažoj mašynie, to jon budzie mieniej płacić za prachodžańnie miažy. Kali ž takoha dazvołu ŭ jaho niama, to taki padatak budzie «šalona vialikim».
«Niekatoryja hramadzianie tolki dziela hetaha afarmlajuć dazvoł na PMŽ. U takim vypadku jany stanoviacca nierezidentami Respubliki Biełaruś i padatak płaciać minimalny — nie taki, jak rezidenty», — cytuje słovy surazmoŭnicy čytač.
Jana nahadała, što ŭletku vyjšaŭ inšy ŭkaz, zhodna ź jakim hramadzianie Biełarusi pavinny «dać źviestki» ab najaŭnaści dazvołu na pražyvańnie ŭ inšych krainach. Jany zanosiacca ŭ «rehistracyjny resurs» i, kali hramadzianin Biełarusi pierasiakaje miažu, to pahraničniki bačać jaho ŭ takoj bazie. Kali tam ich niama, to ŭ jaho zapytajuć, ci maje jon dazvoł na pražyvańnie ŭ inšaj krainie i ci infarmavaŭ jon pra toje adpaviednyja słužby.
«Hetaje pałažeńnie takoha patrabavańnia nie praduhledžvaje», — adznačyła supracoŭnica mihracyjnaj słužby.
Juryst pravaabarončaha centra «Viasna» Pavał Sapiełka ŭ kamientary Svabodzie adznačyŭ, što ničoha niečakanaha i rezkaha pastanova nie ŭvodzić. Faktyčna, padobnyja normy raniej užo byli ŭ zakonie.
Pavodle jaho słoŭ, «havorki ab niejkich dazvołach nie idzie, hety praces datyčyć mienavita afarmleńnia dakumientaŭ — pierš za ŭsio pašparta, u jaki ŭnosiacca adpaviednyja adznaki»
U Pałažeńni ab paradku vyjezdu za miažu na pastajannaje pražyvańnie adznačajecca, što niezaležna ad pryniataha rašeńnia jano zanosicca ŭ aŭtamatyzavanuju infarmacyjnuju sistemu «Hramadzianstva i mihracyja».
Zajava pa dazvoł na PMŽ budzie razhladacca nie mieniej za 35 dzion. Za hety čas zajaŭnika pravierać, ci maje jon abmiežavańni na vyjezd, ci jość u jaho niepahašanyja pravaparušeńni, a taksama ci vykananyja im abaviazki pierad padatkovymi orhanami, u vajenkamatach, sacyjalnych słužbach.
U Pałažeńni zapisana, što vajenkamat ciapier budzie davać svaju zhodu na pastajannaje pražyvańnie za miažoj dla hramadzian, jakija nie słužyli ŭ vojsku pa stanie zdaroŭja ci zaličanyja ŭ zapas.
U vypadku stanoŭčaha rašeńnia ŭ pašparcie pastaviać štamp. A kali hramadzianin vierniecca nazusim damoŭ, adznaku anulujuć sa dnia rehistracyi pa miescy žycharstva.
«Naša Niva» — bastyjon biełaruščyny
PADTRYMAĆHladzicie taksama:
Nijakich DNŽ u blizkich svajakoŭ i palihraf. Dla dypłamataŭ uviali novyja praviły pryjomu na słužbu
Amierykancy dabilisia vyzvaleńnia Juryja Ziankoviča. Jon byŭ prysudžany da 11 hadoŭ źniavoleńnia18
Kamientary