Va Ukrainie Alaksieju Tałaju pahražaje da 15 hadoŭ turmy abo pažyćciovaje

Dziejnaść biełaruskaha paralimpijca Alaksieja Tałaja pa niezakonnym pieramiaščeńni ŭkrainskich dziaciej z časova akupavanaj terytoryi Ukrainy źjaŭlajecca pradmietam rasśledavańnia kryminalnaj spravy, piša «Radyjo Svaboda».

Jak paviedamili «Svabodzie» ŭ sakrataryjacie Upaŭnavažanaha Viarchoŭnaj rady Ukrainy ŭ pravach čałavieka, dziejnaść Alaksieja Tałaja rasśledujecca pavodle dvuch pieršych častak artykułu 438 Kryminalnaha kodeksa Ukrainy — parušeńnie zakonaŭ i zvyčajaŭ vajny. Hetyja kryminalnyja pravaparušeńni karajucca pazbaŭleńniem voli na termin ad 8 da 15 hadoŭ abo pažyćciovym źniavoleńniem.

U toj ža čas u sakrataryjacie ŭkrainskaha ambudsmiena źviarnuli ŭvahu, što prymusovaje pieramiaščeńnie dziaciej padpadaje pad try artykuły Rymskaha statuta Mižnarodnaha kryminalnaha suda — hienacyd u vyhladzie departacyi abo hvałtoŭnaha pieramiaščeńnia nasielnictva, złačynstva suprać čałaviečnaści i vajennaje złačynstva.

Spravu rasśleduje Hałoŭnaje śledčaje ŭpraŭleńnie Słužby biaśpieki Ukrainy. Jaje zaviali 21 sakavika 2022 hodu pavodle faktaŭ rasiejskich vajennych złačynstvaŭ va Ukrainie. U joj utrymlivajucca fakty zabojstva i rasstrełaŭ mirnych žycharoŭ Maryupala i inšych haradoŭ Ukrainy.

Dziejnaść Tałaja razhladajecca jak adzin ź vialikaj kolkaści epizodaŭ u kantekście supraćpraŭnaha pieramiaščeńnia ŭkrainskich dziaciej na časova akupavanuju terytoryju Ukrainy i dalejšuju departacyju ŭ Rasieju, Biełaruś, a taksama prymusovaha nadańnia im rasiejskaha hramadzianstva i pieradačy pad apieku i ŭsynaŭleńnie ŭ siemji rasiejskich hramadzian.

U sakrataryjacie Upaŭnavažanaha Viarchoŭnaj rady Ukrainy ŭ pravach čałavieka dadali, što dadatkova nakiravali śledčym materyjały ab bolš za 2000 identyfikavanych dziaciej, jakich ź vieraśnia 2022-ha da traŭnia 2023 hodu pieravieźli ŭ dziciačy centr «Dubrava» ŭ Minskaj vobłaści.

«U kampietentnyja orhany taksama nakiravali infarmacyju pra tak zvanaje «azdaraŭleńnie» dziaciej z akupavanaj terytoryi Ukrainy ŭ Respublicy Biełaruś, da jakoha byli załučanyja biełaruskija vysokija adkaznyja asoby, spartoŭcy, u pryvatnaści paralimpijec Alaksiej Tałaj, hienieralny dyrektar rasiejskaha «dabračynnaha fondu» «Povieŕ v siebia», i niepasredna staršynia biełaruskaha Čyrvonaha Kryža Dźmitryj Šaŭcoŭ», — adznačajecca ŭ adkazie na aficyjny zapyt «Svabody».

Na pytańnie, ci zjaŭlajecca Alaksandr Łukašenka fihurantam hetaj kryminalnaj spravy, u sakrataryjacie Ŭpaŭnavažanaha Viarchoŭnaj rady Ukrainy ŭ pravach čałavieka nie adkazali.

U toj ža čas adznačyli, što pieramovy ab viartańni dziaciej va Ukrainu pravodziać tolki z Rasiejaj.

«Upaŭnavažany adpaviedna svajoj kampietencyi i mandatu jość adzinym kamunikacyjnym kanałam miž ambudsmienami Rasiei i Ukrainy. Ale navat niahledziačy na heta, viartańnie departavanych i prymusova pieramieščanych dziaciej adbyvajecca vielmi marudna i składana praź nievykanańnie Rasiejaj damoŭlenaściaŭ, a taksama stałaje źniapraŭdžańnie rasiejskim bokam faktaŭ departacyi dziaciej», — adznačajecca ŭ adkazie na zapyt «Svabody».

Ciapier va Ukrainu zmahli viarnuć 387 dziaciej, u toj čas, jak ahulnaja kolkaść niezakonna vyviezienych dziaciej pieravysiła 19 tysiač.

• 14
• 0
• 1
• 2
• 0
• 1
• 1
• 0