«Jany patrabujuć śpisy ŭsich klijentaŭ». Dyrektar polskich kursaŭ, kudy tydzień tamu pryjšli siłaviki, raskazaŭ pra składany maralny vybar
Dyrektar adnoj z pryvatnych škoł polskaj movy ŭ Minsku, supracoŭnicu jakoj zatrymlivali na minułym tydni, raskazaŭ «Radyjo Svaboda» niekatoryja padrabiaznaści spravy.
Fota ilustracyjnaje
«Spyniajcie rekłamu, spyniajcie dziejnaść, pišycie zajavu na likvidacyju»
Jak raskazaŭ «Radyjo Svaboda» vykładčyk polskaj movy, na minułym tydni ŭ Minsku zakryli prynamsi dźvie pryvatnyja škoły polskaj movy.
Zdymki vizitu ludziej u formie ŭ adnu z ustanoŭ apublikavaŭ telehram-kanał, blizki da siłavikoŭ.
Jak raskazaŭ «Radyjo Svaboda» dyrektar adnoj z polskich škoł u Minsku Siarhiej, supracoŭnicu navučalnaj ustanovy zatrymlivali na minułym tydni. Surazmoŭca miarkuje, što heta byŭ HUBAZiK. U jaje patrabavali statut i inšyja dakumienty škoły.
Da taho ž siłaviki nastojvali, kab im vydali śpisy navučencaŭ polskich kursaŭ za apošnija hady. Takich źviestak škoła nie pieradała. Na doŭhi termin ich nie zachoŭvajuć. Aktualnyja śpisy znachodziacca ŭ dyrektara škoły, jaki pracuje z-za miažy. Toj apynuŭsia ŭ składanaj maralnaj situacyi: abo padstavić klijentaŭ škoły, abo svaich supracoŭnikaŭ.
«Z adnaho boku, [siłaviki] cisnuć na supracoŭnikaŭ, kab jany heta ŭsio vydali. I ja nie viedaju, što ź imi zrobiać, kali jany hetaha nie pakažuć. Z druhoha boku, supracoŭniki cisnuć na mianie, bo bajacca za siabie i za svajo žyćcio. Z treciaha boku, ja razumieju, što kali my vydadzim źviestki sotniaŭ, kali nie tysiač ludziej, dla ich heta moža skončycca prafiłaktyčnaj razmovaj, a mo i čymści horšym», — razvažaje Siarhiej.
Padčas vizitu siłaviki prapanoŭvali dobraachvotna zakryć kursy.
«Chutčej za ŭsio, ichniaj metaj było zapałochvańnie. «Spyniajcie rekłamu, spyniajcie dziejnaść, pišycie zajavu na likvidacyju». Pačali havaryć, što tolki dakumientaŭ budzie dosyć, kab usich pazakryvać, tamu, maŭlaŭ, davajcie sami, bo inšym razam pryjduć ludzi bolš surjoznyja i ŭ maskach», — pierakazvaje słovy siłavikoŭ surazmoŭca.
Jon kaža, što im nie pakinuli vybaru — škołu buduć zakryvać. Supracoŭniki bajacca pracavać dalej pad takim ciskam. Ale firma ciapier u składanym finansavym stanoviščy. Ciažka adrazu raźličyć rabotnikaŭ pierad zvalnieńniem, apłacić arendu pamiaškańnia. Pieravieźci škołu ŭ Polšču taksama nie tak prosta. Składana budzie płacić zarobki vykładčykam, kali jany buduć zastavacca ŭ Biełarusi.
«Zaraz my ŭ patavaj situacyi. Nieviadoma, što rabić», — pryznajecca Siarhiej.
«Vydalili navat nazvu kursu «Dla pastupleńnia za miažu»
Ciaham apošnich miesiacaŭ u ichniuju škołu niekalki razoŭ prychodzili pradstaŭnicy adździeła adukacyi, raskazaŭ dyrektar.
«Jany kazali, što chadzili pa ŭsich polskich kursach u rajonie. Pytalisia, pavodle jakich padručnikaŭ my vučym, jak prachodziać zaniatki, kolki hrup. Adskanavali sabie statut škoły i inšyja dakumienty», — raskazvaje Siarhiej.
Ciaham apošnich hadoŭ u škołu pryjšoŭ list, peŭna, ź Ministerstva adukacyi, kab firma prypyniła rekłamu adukacyi za miažoj.
«My ŭsio vydalili, navat nazvu kursu «Dla pastupleńnia za miažu». My pierastali rekłamavać «kartu palaka». Ale naš sajt i sajty jašče kala 30 arhanizacyj zabłakavali, bo jany, na ichniuju dumku, nie adpaviadajuć, bo nibyta tam jość rekłama adukacyi za miažoj», — raskazvaje Siarhiej.
Ichniaja škoła polskaj movy kaliści była vielmi vialikaj. Padčas karanavirusu kolkaść studentaŭ źmienšyłasia. Novaja chvala popytu pačałasia ŭ kancy 2020 hoda. U apošnija hod-paŭtara znoŭ pajšoŭ spad prykładna na 20%, bo daviałosia prybrać častku rekłamy, da taho ž paśla adjezdu dyrektara ź Biełarusi pierarvałasia supracoŭnictva ź niekatorymi bujnymi klijentami, raskazaŭ surazmoŭca.
Ciapier čytajuć
Andrej Švied, architektar represij, pryznačany staršynioj Viarchoŭnaha suda22
Kamientary