Biełaruś zajaviła pra biesprecedentny cisk z boku Rasii na pieramovach pa nafcie
Biełaruski bok «hatovy ŭ luby čas» adnavić pieramovy pa ŭmovach pastavak nafty «dla dasiahnieńnia ŭzajemaprymalnych vynikaŭ».
Biełaruś zajaviła pra biesprecedentny cisk z boku Rasii na pieramovach ab pastaŭkach nafty. Jak paviedamlałasia raniej, pieramovy zaviaršylisia biezvynikova, i biełaruskaja delehacyja 31 śniežnia adpraviłasia damoŭ.
Jak paviedamili ŭ pres-słužbie Savieta ministraŭ, urad Biełarusi paćviardžaje hatoŭnaść da praciahu pieramoŭ z uradam RF pa ŭmovach pastavak nafty z Rasii ŭ Biełaruś u poŭnaj adpaviednaści z damoŭlenaściami, dasiahnutymi kiraŭnikami dziaržaŭ na pasiadžeńni Vyšejšaha dziaržsavieta Sajuznaj dziaržavy Biełarusi i Rasii 10 śniežnia 2009 hoda ŭ Maskvie.
Biełaruski bok «hatovy pryniać usie nieabchodnyja dziejańni dla ŭzhadnieńnia i padpisańnia ŭ samyja karotkija terminy» nieabchodnych dapaŭnieńniaŭ da dziejnaha mižuradavaha pahadnieńnia ab mierach pa ŭrehulavańni handlova-ekanamičnaha supracoŭnictva ŭ halinie ekspartu nafty i naftapraduktaŭ ad 12 studzienia 2007 hoda. Usie adpaviednyja dakumienty, «zahadzia padrychtavanyja na ŭzroŭni ekśpiertaŭ dźviuch krain», pieradadzieny rasijskamu boku.
Biełaruski bok «zychodzić z taho, što
da momantu padpisańnia adpaviednych dakumientaŭ biaspošlinnyja pastaŭki nafty z Rasijskaj Fiederacyi ŭ abjomach unutranaha spažyvańnia Respubliki Biełaruś u studzieni—lutym 2010 hoda pavinny ažyćciaŭlacca ŭ adpaviednaści z damoŭlenaściami, dasiahnutymi raniej prezidentami». «Usie nieabchodnyja dla hetaha pravavyja padstavy jość, abjomy pastavak nafty zakantraktavanyja subjektami haspadarańnia dźviuch krain, biełaruskim bokam ažyćcioŭlena ich papiaredniaja apłata», — zajaŭlaje pres-słužba ŭrada.
U paviedamleńni adznačajecca, što padčas praviedzienych 30—31 śniežnia ŭ Maskvie pieramoŭ pa ŭmovach pastavak nafty «na členaŭ biełaruskaj delehacyi, skład i paŭnamoctvy jakoj byli paćvierdžanyja adpaviednaj pastanovaj Savieta ministraŭ Respubliki Biełaruś,
byŭ akazany biesprecedentny cisk, što, pavodle mierkavańnia biełaruskaha boku, źjaŭlajecca absalutna nieabhruntavanym i niedapuščalnym».
«Faktyčna biełaruskamu boku było prapanavana parušyć bazavy dahavor ab stvareńni adzinaj mytnaj terytoryi i farmiravańni Mytnaha sajuza, što byŭ padpisany kiraŭnikami troch dziaržaŭ — Biełarusi, Rasii i Kazachstana. Sychod ad hetych damoŭlenaściaŭ i vyviadzieńnie cełaha enierhietyčnaha siektara Biełarusi za miežy padpisanych dahavoraŭ pa stvareńni Mytnaha sajuza šmat u čym padarvali b usie dasiahnutyja damoŭlenaści pa dalejšaj intehracyi našych dziaržaŭ», — padkreślivaje pres-słužba Saŭmina.
Biełaruski bok «hatovy ŭ luby čas» adnavić pieramovy pa ŭmovach pastavak nafty «dla dasiahnieńnia ŭzajemaprymalnych vynikaŭ».
31 śniežnia pres-słužba ŭrada RF paviedamiła, što ŭrad «u poŭnaj adpaviednaści» z damoŭlenaściami, dasiahnutymi na pasiadžeńni VDS u Maskvie, zrabiŭ usio mahčymaje dla zaklučeńnia da nadychodu Novaha hoda mižuradavaha pahadnieńnia, što rehuluje pastaŭki rasijskaj nafty ŭ Biełaruś. Z hetaj metaj biełaruskamu boku byli pieradadzienyja prajekty adpaviednych dakumientaŭ.
«Z 10 pa 31 śniežnia štodnia vialisia pieramovy.
Na žal, damovicca ab padpisańni adpaviednych dakumientaŭ nie ŭdałosia», — adznačałasia ŭ paviedamleńni.
Rasijski bok «prainfarmavaŭ biełaruski bok ab pierachodzie z 1 studzienia da źbirańnia mytnych płaciažoŭ u poŭnym abjomie na naftu, što pastaŭlajecca».
Razam z tym, urad RF «paćviardžaje svaju hatoŭnaść biaspošlinna pastaŭlać naftu dla ŭnutranaha spažyvańnia Biełarusi z ulikam asablivaha charaktaru sajuźnickich adnosin va ŭzhodnienyja terminy i pry najaŭnaści dakumientaŭ, jakija stvarajuć dla hetaha pravavyja padstavy».
Z hetaj metaj «biełaruskim partnioram pieradadziena zaprašeńnie prybyć u Maskvu ŭ studzieni dla pieramoŭ z tym, kab vyjści na padpisańnie adpaviednych dakumientaŭ».
Rasijskija pastaŭščyki nafty «harantujuć vykanańnie svaich abaviazacielstvaŭ pa pastaŭkach u adpaviednaści ź dziejnymi kantraktami jak dla spažyŭcoŭ u Biełarusi, tak i ŭ Jeŭropie».
Raniej krynica ŭ rasijskaj delehacyi zajaviła, što takaja situacyja źviazanaja z «adsutnaściu nieabchodnych dyrektyŭ i paŭnamoctvaŭ u pradstaŭnikoŭ Respubliki Biełaruś».
Pavodle słoŭ krynicy, Minsk damahajecca biaspošlinnych pastavak usiaho abjomu syraviny.
«Sa škadavańniem davodzicca adznačyć, što biełaruski bok faktyčna pa-raniejšamu praciahvaje prytrymlivacca ničym nie abhruntavanaj zapytnaj pazicyi, pavodle jakoj Rasija, pa sutnaści, pavinna praciahvać subsidavańnie biełaruskaj ekanomiki, praciahvajučy, tym bolš va ŭmovach adsutnaści adpaviednaha mižuradavaha pahadnieńnia, biaspošlinnyja pastaŭki nafty nie tolki dla ŭnutranaha spažyvańnia, ale i na ŭvieś abjom rasijskaj syraviny, što pastaŭlajecca», — zajaviła krynica.
28 śniežnia vice-premjer rasijskaha ŭrada Ihar Siečyn paviedamiŭ, što pahadnieńnie ab časovych pastaŭkach nafty z Rasii ŭ Biełaruś u 2010 hodzie moža być padpisanaje 30—31 śniežnia. Kali hetaha nie adbudziecca, 1 studzienia 2010 hoda nabudzie moc zvyčajny režym pastavak enierharesursaŭ, jaki praduhledžvaje vypłatu 100% mytnych płaciažoŭ.
18 śniežnia Siečyn zajaviŭ, što Rasija prapanavała Biełarusi biaspošlinna pastaŭlać 5—6 młn. ton nafty dla ŭnutranaha spažyvańnia. Uvieś astatni abjom całkam budzie abkładacca ekspartnymi pošlinami. Z 2010 hoda pierastaje dziejničać panižalny kaeficyjent na pastaŭki nafty i naftapraduktaŭ u Biełaruś, jaki ciapier składaje 0,356, nahadaŭ Siečyn.
Kamientary