Taramaty ŭ biełaruskaj stalicy zjavilisia ŭ listapadzie 2023 hoda. I ŭ apierataraŭ, zdavałasia, byli vialikija płany pa ŭstanoŭcy takich pryład u mahazinach. Ale ciapier ich prybirajuć, piša Tochka.by.
Niekalki miesiacaŭ tamu vydańnie testavała ŭ stalicy cikavuju navinku — fandamat pa pryjomie blašanych słoikaŭ i płastykavych butelek.
Razumnaja technika prapanoŭvała spampavać mabilny dadatak u telefonie pad nazvaj Ecoplatform i praź jaho atrymlivać bonusy ŭ roznych kramach zamiest zdadzienaj tary.
Bolš za toje, u kampanii «A-100 Deviełapmient», jakaja finansavała ŭstanoŭku aparataŭ, paviedamlali, što ŭ bližejšyja miesiacy kolkaść fandamataŭ u Minsku dasiahnie 50, a da kanca 2024 hoda sietka razraściecca da 250 aŭtamataŭ.
Havaryłasia, što ŭsia sabranaja tara budzie pastupać naŭprost vytvorcam. Jaje chacieli vykarystoŭvać dla vypusku novych butelek, kantejnieraŭ i ŭpakovak.
PET-tara paśla pierapracoŭki taksama nabyvaje novaje žyćcio ŭ jakaści tekstylu, mebli i pradmietaŭ dla doma ci sadu.
Nie prajšło i hoda
Sudziačy pa ŭsim, z poŭnaj realizacyjaj idei niešta pajšło nie tak. Čytač partała Tochka.by dasłaŭ u redakcyju fatahrafii, zroblenyja ŭ HC «Karavan».
Na zdymku — adklučany aparat pa pryjomie tary. Akramia taho, na im raźmieščana apaviaščeńnie ad administracyi handlovaha centra: «Fandamat vyjšaŭ sa stroju i budzie nakiravany na ramont. Ustaloŭvacca paśla ramontu jon nie budzie».
Inšy čytač dasłaŭ voś takoje paviedamleńnie: «Pryjšło apaviaščeńnie na Ecoplatform, što zaraz taramaty prymajuć tolki płastykavyja butelki. Škada, viadoma», — napisaŭ jon.
Heta značyć blašanyja banki zdać bolš nie atrymajecca.
Partał Tochka.by źviarnuŭsia ŭ kampaniju «A-100 Deviełapmient», kab rastłumačyć situacyju z taramatami ŭ Minsku. Jak tolki atrymaje kamientar — abiacaje apublikavać.
Kali ŭviaduć depazitnuju sistemu
Taraamaty — heta, pa sutnaści, jašče adna sproba ŭvasobić u žyćcio depazitnuju sistemu zboru tary.
Masavaha ž ukaranieńnia takoj sistemy na dziaržuzroŭni pakul nie budzie.
Jak raniej paviedamili na pradpryjemstvie «Apieratar druhasnych materyjalnych resursaŭ», centralizavanaje ŭkaranieńnie depazitna-zakładnoj sistemy vyrašana adkłaści.
Pa słovach pradstaŭnika pradpryjemstva, heta zanadta zatratna. Sistema praduhledžvaje ŭzajemadziejańnie mnohich subjektaŭ: vytvorcaŭ tavaraŭ i tary, imparcioraŭ, handlovych sietak i centralizavanaha orhana, jaki b kaardynavaŭ hetu dziejnaść.
Dniami taksama stała viadoma, što papularnyja ŭ Jeŭropie paštamaty akazalisia niezapatrabavanyja ŭ Biełarusi.
Kamientary
A aluminijevyja blašanki pierastali prymać, dumaju, z taje pryčyny, što ŭ ich biełarusy šmat akurkaŭ i inšaha vykidajuć. Pry mnie supracoŭniki Susiedziaŭ pa śmietnicach źbirali taru i zdavali. Padazraju, što značnaja častka taho, što zdajuć u hetyja aparaty, — vyciahnutaja sa śmietnikaŭ i nie padrychtavanaja pa instrukcyi. Kaniešnie, tak i złamać aparat možna, kali zdavać aby-što. I śmiardzić ad fandamataŭ mocna, chacia ŭ instrukcyi napisana myć taru pierad zdačaj. Nie ŭmiejuć biełarusy vykonvać prostyja praviły, kali ich nie kantralujuć.