Brytanija zajaviła, što HRU zadoŭha da atručvańnia Julii Skrypal uzłamała jaje imejł
Za piać hadoŭ da zamachu na byłoha supracoŭnika HRU Siarhieja Skrypala rasijskaja vajennaja raźviedka ŭzłamała elektronnuju pryładu jaho dački Julii, jakaja padvierhłasia atručvańniu ŭ Sołśbiery ŭ 2018 hodzie razam z baćkam. Pra heta zhadvajecca ŭ abviestcy ŭrada Vialikabrytanii ab čarhovych sankcyjach suprać Rasii, piša Bi-bi-si.
U piatnicu ŭ brytanski sankcyjny śpis byli ŭniesieny try strukturnyja padraździaleńni HRU i 18 jaje aficeraŭ. U ich lik uvajšli Ivan Jermakoŭ, Alaksiej Łukašaŭ i 85-y hałoŭny centr śpiecyjalnaj słužby HU HŠ, jon ža v/č 26165, u jakoj, jak śćviardžajecca, słužać abodva zhadanyja supracoŭniki.
Jak skazana ŭ zajavie Ministerstva zamiežnych spraŭ Vialikabrytanii z hetaj nahody, «siońniašnija dziejańni taksama ŭdaryli pa aficerach vajennaj raźviedki HRU, adkaznych za minuły ŭzłom pryłady Julii Skrypal škodnasnym prahramnym zabieśpiačeńniem, viadomym jak X-Agent, za piać hadoŭ da niaŭdałaha zamachu ahientaŭ HRU na zabojstva Julii i Siarhieja Skrypaloŭ śmiarotnym niervova-paralityčnym jadam «Navičok» u Sołśbiery».
U zajavie nie ŭdakładniajecca typ uzłomanaj pryłady. U bolš padrabiaznaj daviedcy zhadvajecca, što ŭzłom u 2013 hodzie byŭ transhraničnym i zakranaŭ elektronnuju poštu Skrypal.
Zapisy pra Jermakova i Łukašava ŭ sankcyjnym śpisie niezvyčajna ścipłyja na padrabiaznaści, tam nie paznačany ich numary pašpartoŭ, adrasy i navat ruskaje napisańnie imionaŭ. Siarhiej Skrypal, asudžany ŭ Rasii za dziaržaŭnuju zdradu ŭ 2004 hodzie, u 2010 hodzie byŭ abmianiany na rasijskich špijonaŭ, aryštavanych u ZŠA, i abasnavaŭsia ŭ Sołśbiery na paŭdniovym zachadzie Anhlii. U sakaviku 2018 hoda jaho i dačku, jakaja pryjechała da jaho z Rasii, znajšli biez prytomnaści. Ułady Vialikabrytanii zajavili, što Skrypali padvierhlisia atručvańniu niervova-paralityčnym jadam «Navičok», jaki nanieśli na dźviarnuju ručku zasłanyja ahienty HRU. Taksama ad atručvańnia ŭ tyja dni paciarpieli palicejski i ludzi, jakija vypadkova padniali fłakon, u jakim znachodziŭsia jad, adna žančyna, Don Sterdžes, pamierła.
Sami Skrypali vyžyli, ale z momantu zamachu nie źjaŭlalisia na publicy, što tłumačycca zachavańniem pahrozy ich žyćciu. Na hramadskich słuchańniach ab akaličnaściach śmierci Don Sterdžes letaś Siarhiej Skrypal vystupiŭ ź piśmovymi pakazańniami.
Rasija šmat razoŭ admaŭlała svaju datyčnaść da taho, što adbyłosia ŭ Sołśbiery. Zajaŭ ab novych sankcyjach i ab uzłomie pryłady Julii Skrypal Maskva pakul nie rabiła.
Kamientary