«Niekalki hadzin kružyŭ pa Minsku, praviarajučy sačeńnie». Eks-dyrektaru Dobrušskaha farforavaha zavoda dali dzieviać hadoŭ
Asudžany za karupcyju i jaho brat.
Były dyrektar ZAT «Dobrušski farforavy zavod» Alaksandr Vinakuraŭ i jaho brat Siarhiej asudžanyja za karupcyjnyja złačynstvy. Prysud vyniesieny Centralnym rajonnym sudom Homiela, paviedamlaje pres-słužba Viarchoŭnaha suda.
Jany abvinavačvalisia ŭ atrymańni niezakonnaha ŭznaharodžańnia ad kamiercyjnaj arhanizacyi za vyhadnyja ŭmovy apłaty i bieśpierabojnuju pastaŭku pradukcyi z uznačalenaha Alaksandram Vinakuravym pradpryjemstva.
Bratoŭ Vinakuravych supracoŭniki HUBAZiK zatrymali ŭ vieraśni minułaha hoda. Tady milicyjanty zrabili spravazdaču, što Vinakuravych zatrymali niepasredna paśla pieradačy hrošaj:
«Ustanoŭlena, što złamyśnik prymaŭ miery kanśpiracyi: na sustrečy z chabaradavalnikam jon adpraŭlaŭ svajho brata. Paśla atrymańnia čarhovaha kanvierta apošni niekalki hadzin kružyŭ pa Minsku, praviarajučy najaŭnaść sačeńnia. Kali nie znajšoŭ jaho, adpraviŭsia da fihuranta dla abmierkavańnia vynikaŭ pieramovaŭ i pieradačy hrošaj. Paśla zakančeńnia sustrečy bratoŭ zatrymali», — havaryłasia ŭ paviedamleńni MUS.
Pavodle viersii śledstva, brat dyrektara zavoda Siarhiej Vinakuraŭ paznajomiŭsia z dyrektaram TAA «Snabaŭtadetal» — firmy, jakaja zajmajecca pieraprodažam pradukcyi farforavaha zavoda. Siarhiej Vinakuraŭ uładkavaŭsia na firmu namieśnikam dyrektara, dzie i prapracavaŭ z kastryčnika 2022 hoda pa lipień 2023 hoda.
U svaju čarhu, Alaksandr Vinakuraŭ «za spryjalnaje vyrašeńnie pytańniaŭ, jakija ŭvachodziać u jaho kampietencyju, vykanańnie ŭ intaresach K. [dyrektara TAA «Snabaŭtadetal»] i pradstaŭlajucca im subjektaŭ haspadarańnia dziejańniaŭ pa zabieśpiačeńni bieśpierabojnych pastavak pradukcyi ZAT «Dobrušski farforavy zavod», jaje pastaŭkach na vyhadnych dla K. umovach apłaty, pradastaŭleńni rynku zbytu pradukcyi dasiahnuŭ damoŭlenaści z K. ab vypłacie jamu hrašovaha ŭznaharodžańnia», — paviedamiŭ padrabiaznaści Homielski abłasny sud.
Zhodna z materyjałami suda, ź vieraśnia 2022 hoda da śniežnia 2023 hoda Alaksandr Vinakuraŭ, pry dapamozie brata — Siarhieja Vinakurava, atrymaŭ dla siabie i blizkich ad dyrektara firmy ŭ jakaści chabaru «hrašovyja srodki i nabyli vyhadu majomasnaha charaktaru na 63 245,31 rubla».
Abvinavačanyja, choć i nie admaŭlali ŭ sudzie fakty atrymańnia hrošaj ad pradstaŭnika firmy, svaju vinu ŭ atrymańni chabaraŭ nie pryznali.
Centralny rajonny sud Homiela prysudziŭ Alaksandra Vinakurava za atrymańnie chabaru da 9 hadoŭ uzmocnienaha režymu, sa štrafam 700 bazavych vieličyń (28 tysiač rubloŭ) i pazbaŭleńniem prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ, terminam na 5 hadoŭ.
Siarhiej Vinakuraŭ za dapamohu ŭ atrymańni chabaru atrymaŭ 7 hadoŭ uzmocnienaha režymu sa štrafam 500 bazavych vieličyń (20 000 rubloŭ).
Taksama bratam nieabchodna budzie vypłacić dziaržavie «ekvivalent biespadstaŭna nabytaj vyhady» ŭ pamiery 29 317 rubloŭ.
Biełarus žyvie ŭ domie, jaki pabudavaŭ z sałomy, piasku i hliny. Pry hetym jon — adziny žychar vioski. Jak adčuvańni?7
Kamientary