U trajnym skačku na Alimpijadzie pjedestał zaniali kubincy — i nivodzin ź ich nie pradstaŭlaje Kubu. Usie jany ŭciakli z krainy
Uradžency «Vostrava svabody» ŭ rozny čas uciakli ź jaho zbornaj i ciapier prynieśli ŭznaharody jeŭrapiejskim krainam.
Cikavaja situacyja skłałasia ŭ spabornictvach pa mužčynskim trajnym skačku na Alimpijadzie-2024 u Paryžy. Uvieś pjedestał zaniali vychadcy z Kuby, ale nivodzin ź ich za rodnuju krainu nie vystupaje.
Alimpijskim čempijonam staŭ Chardan Dyjas Fartun, jaki pradstaŭlaje Ispaniju. 23-hadovy ŭradženiec Havany ŭ składzie zbornaj Kuby braŭ zołata na junijorskim i maładziožnym čempijanatach śvietu. A ŭ 2021-m hodzie padčas zboraŭ u Ispanii jon źbieh z kamandy i paprasiŭ ispanskaje hramadzianstva pa karaniach.
Da vystupleńniaŭ za zbornuju Ispanii jaho dapuścili tolki ŭ 2024 hodzie. I atrymałasia ŭsio zvyšpaśpiachova: jon vyjhraŭ zołata čempijanatu Jeŭropy, a ciapier staŭ pieršym i na Alimpijskich hulniach — z vynikam 17.86 mietra.
Srebrany miedal Alimpijady zavajavaŭ pradstaŭnik Partuhalii Pabła Pičarda — čempijon minułych Hulniaŭ u Tokia. Jon naradziŭsia ŭ Sanćjaha-de-Kuba, vystupaŭ za rodnuju krainu da 2017 hoda. A potym źbieh z kamandy na zborach u Štutharcie, źjechaŭ u Partuhaliju i atrymaŭ hramadzianstva.
U składzie novaj kamandy jon staŭ alimpijskim čempijonam, čempijonam śvietu i Jeŭropy, a ciapier uziaŭ srebra Hulniaŭ. Byłomu suajčyńniku jon sastupiŭ tolki dva santymietry.
Na treciuju prystupku pjedestała ŭ Paryžy padniaŭsia jašče adzin havaniec Endzi Dyjas. Jon pakinuŭ zbornuju Kuby ŭ 2021 hodzie, kali prosta pierad Alimpijadaj u Tokia atrymaŭ traŭmu.
Na radzimu viartacca jon admoviŭsia, zamiest hetaha Dyjas adpraviŭsia ŭ Italiju, dzie ŭ 2023 hodzie atrymaŭ hramadzianstva. Alimpijskaja bronza z vynikam 17,64 — pieršy vialiki pośpiech 28-hadovaha skakuna.
Jašče adzin kubiniec u finale Alimpijady pradstaŭlaŭ usio ž rodnuju krainu — srebrany pryzior čempijanatu śvietu-2023 Łazara Marcines na Hulniach u Paryžy staŭ tolki vośmym (17,34).
Ucioki pierśpiektyŭnych spartsmienaŭ z Kuby ŭ ZŠA i krainy Jeŭropy ŭ pošukach lepšych umoŭ dla padrychtoŭki i bolš vysokaha ŭzroŭniu žyćcia — historyja vielmi raspaŭsiudžanaja. Kamunistyčnyja ŭłady Kuby robiać staŭku na raźvićcio amatarskaha i masavaha sportu. Prafiesijanały zarablajuć mała — kala 200 dalaraŭ. Da taho ž, dziaržava zabiraje ŭ ich častku pryzavych, zaroblenych na mižnarodnych startach.
Da apošniaha času kubinskija zakony naohuł zabaraniali spartsmienam źjazdžać vystupać za zamiežnyja prafiesijnyja kłuby. Zabaronu źniali tolki ŭ 2013 hodzie, ale vielmi ŭmoŭna — pierajezd treba ŭzhadniać z čynoŭnikami, praces moža zaniać praciahły čas. A tych, chto źjechaŭ biez dazvołu, karajuć: kubinskija fiederacyi pa vidach sportu damahajucca dyskvalifikacyi takich atletaŭ.
Za apošnija 25 hadoŭ z Kuby źbiehli 50 futbalistaŭ, bolš za 100 biejsbalistaŭ i vialikaja kolkaść atletaŭ inšych vidaŭ. Mnohija atlety «źnikajuć» na zamiežnych zborach, jość i tyja, chto na svoj strach i ryzyku płyvuć na łodkach u ZŠA.
Adzin ź lidaraŭ zbornaj Kuby pa valejbole Vilfreda Leon byŭ dyskvalifikavany za žadańnie vystupać u Jeŭropie. Paśla hetaha jon atrymaŭ hramadzianstva Polščy, ź jakoj dabraŭsia da finału Alimpijady ŭ Paryžy. Zaŭtra jon razam z kamandaj pazmahajecca za alimpijskaje zołata.
U 2022 hodzie ŭ ZŠA źbiehła viadomaja kidalnica dyska Jajmie Pieres — bronzavy pryzior Hulniaŭ u Tokia. U tym ža hodzie źbieh alimpijski čempijon — 2016 pa hreka-rymskaj baraćbie Ismael Barera. I heta tolki niekalki hučnych vypadkaŭ z mnohich.
Kamientary