Doktar-reanimatołah Uładzimir Martaŭ, były zahadčyk adździaleńnia aniestezijałohii i reanimacyi Viciebskaj balnicy chutkaj dapamohi, zmoh niadaŭna pakinuć Rasiju, dzie žyŭ apošnija dva z pałovaj hady. Ciapier jon znachodzicca ŭ biaśpiečnym miescy. Jahony blizki siabar i kaleha raspavioŭ pravaabaroncam «Viasny» padrabiaznaści pieraśledu doktara ŭ Rasii i akaličnaści evakuacyi Uładzimira.
Surazmoŭca Siarhiej, jaki ŭvieś čas kantaktuje z Martavym, adznačyŭ, što infarmacyja ab departacyi doktara z Rasii ŭ Viciebskaje SIZA nie adpaviadała rečaisnaści.
Sudzili za parušeńnie mihracyjnaha zakanadaŭstva, dali štraf
U sakaviku ŭ Biełarusi na Uładzimira zaviali kryminalnuju spravu pavodle č. 1 art. 361-4 KK. Padstavaj pasłužyła videaintervju «Radyjo Svaboda», jakoje było apublikavana jašče 20 červienia 2022 hoda.
Naprykancy śniežnia pačałosia śledstva pa spravie, a Martava abviaścili ŭ miždziaržaŭny vyšuk. I chacia pra kryminalny pieraśled jamu było viadoma, jon nie paśpieŭ źmianić miesca žycharstva i zastaŭsia ŭ horadzie Muryna pad Pieciarburham. 14 traŭnia tam jaho zatrymali apieratyŭniki, nadzieli kajdanki i pieradali ŭ adno z adździaleńniaŭ palicyi pa Usievałažskim rajonie.
Jak adznačaje siabar Uładzimira, palicyja pracavała karektna: nie było pahroz i źbićcia, u Martava nie zabirali telefon i dali mahčymaść źviazacca sa svajakami i siabrami, jakija infarmacyju pra zatrymańnie pieradali žurnalistam «Fantanki».
«Ciapier u Rasii zatrymlivajuć šmat nielehalnych mihrantaŭ z paŭdniovych krain, mnohija navat pa-rasijsku nie razmaŭlajuć. Ich paśla chutkaha suda masava departujuć na radzimu. Uładzimiru tut krychu paščaściła: u pamiaškańni adździełu palicyi dziasiatki tadžykaŭ, uźbiekaŭ, a tut jašče niejki biełaruski doktar… I što ź im rabić?» — raspaviadaje kaleha Martava.
Martava dastavili da prakurora, u jakoha była infarmacyja, što lekar znachodzicca ŭ miždziaržaŭnym vyšuku. Paśla apytańnia prakuror paviedamiŭ Martavu, što videakanał «Svaboda Premium», na jakim vyjšła intervju Martava, na terytoryi Rasijskaj Fiederacyi nie źjaŭlajecca «ekstremisckim» i tamu ŭ Rasii jon nie ździajśniaŭ złačynstva, ale pry hetym ździejśniŭ parušeńnie mihracyjnaha zakanadaŭstva — adsutnaść rehistracyi i praterminavany pašpart.
Paśla apytańnia Martava advieźli ŭ IČU, a na ranicu pryznačyli sud. U sudzie razhlad spravaŭ pa mihracyi vielmi chutki: dźvie-try chviliny i vynosicca pastanova ab departacyi. Martavu vynieśli pastanovu ab spahnańni štrafu ŭ pamiery 5 000 rubloŭ. I ŭsio. Adnak na vychadzie z suda paprasili zatrymacca. Palicejskija nie mahli pavieryć, što sprava skončyłasia tolki štrafam. Jany bolš hadziny telefanavali niekamu, niešta ŭzhadniali… Ale potym machnuli rukoj i adpuścili.
Prakuror pry hetym daŭ padpisać papieru, što Martaŭ źjavicca ŭ palicyju pa pieršym patrabavańni. Tak jon apynuŭsia na svabodzie.
«Ale Uładzimir razumieŭ, što zvanočak praźvinieŭ, i treba prymać rašeńnie. Jon źviazaŭsia z kalehami, a sam źjechaŭ u viosku.
U hety čas u niekatorych pablikach źjaviłasia infarmacyja, što Martava departavali ŭ viciebskaje SIZA, jamu stali telefanavać siabry, spraŭdžvać infarmacyju, prasili ŭklučyć videa, kab pierakanacca, što ŭsio ź im dobra, — raspaviadaje dalej Siarhiej. — Heta zatrymała evakuacyju Uładzimira amal na dva tydni».
Rašeńnie pakinuć Biełaruś było asensavanym
Uładzimira Martava pieršy raz zatrymali 22 lutaha 2022 hoda na jahonaj dačy pad Lepielem, doma zładzili pieratrus, a jaho advieźli ŭ rajcentr. Na druhi dzień u rajonnym sudzie Uładzimiru prysudzili siem sutak administracyjnaha aryštu nibyta za niezakonnaje pikietavańnie pavodle art. 24.23 KaAP (Parušeńnie paradku arhanizacyi abo praviadzieńnia masavych mierapryjemstvaŭ). Takim pryznali avatarku na fejsbuku, na jakoj uhledzieli BČB-stužačku. Ale, nasamreč, pryčyna była ŭ inšym.
«Jašče kali ja vyjšaŭ paśla siami sutak aryštu ź Lepielskaha IČU, to zrazumieŭ, što ŭłady razzłavalisia z-za majoj knihi «Viciebsk — Bierhama» i publikacyi pieršaj častki padkastu «Doktar Martaŭ. Na vajnie z COVID-19». 22 lutaha mianie zabrali ŭ Lepiel, zładzili pieratrus i dapytali. Pašancavała, što heta byŭ Lepiel, i tam jašče nie nadta źviartali ŭvahu na «palityku». Tamu praciahu nie było. Ja iznoŭ pajechaŭ u viosku, byŭ na padpolnym stanoviščy», — kazaŭ jon raniej žurnalistam.
Na nastupny dzień paśla vyzvaleńnia na lecišča da Martava pryjechaŭ rajonny prakuror i paprasiŭ napisać papieru, što jon bolš nie budzie krytykavać dziejańni ŭłady. Paśla da jaho pryjechali nieznajomyja mužčyny nibyta za kansultacyjaj i prapanavali za heta hrošy. Uładzimir zrazumieŭ, što heta była pravakacyja i adčuŭ, što ŭ spakoi jaho nie pakinuć. Heta była pomsta lekaru za praŭdu pra situacyju z epidemijaj COVID u Viciebsku. Na pracy dačakalisia, kali skončycca kantrakt i jaho bolej nie praciahnuli. Pracavać miedykam bolš nie vypadała, tamu Martaŭ pryniaŭ rašeńnie źjechać u Rasiju da svajakoŭ. Napačatku časta sustrakaŭsia ź siabrami i vučniami, haściavaŭ u ich, niekatory čas čytaŭ lekcyi, i kab nie ŭpaści ŭ depresiju, dapisvaŭ svaje raniejšyja knihi.
Ahułam u Rasii Martaŭ pražyŭ dva z pałovaj hoda, a kab nie «spalicca» z praterminavanym pašpartam — padčas pravierak dakumientaŭ pakazvaŭ paśviedčańnie invalida (Uładzimir maje surjoznyja prablemy sa zrokam). Tamu da zaviadzieńnia kryminalnaj spravy asabliva nie chvalavaŭsia.
Dziakujučy siabram i byłym kaleham-miedykam Uładzimir paśpiachova evakujavaŭsia ŭ adnu ź jeŭrapiejskich krain, dzie spakvala adaptujecca da novych umovaŭ žyćcia.
Kamientary