Čamu ŭ Biełarusi rastuć zarpłaty i ci nadoŭha zachavajecca tendencyja?
Siaredni zarobak za lipień na ruki pa krainie skłaŭ 2025 rubloŭ, što amal 640 dalaraŭ. U Minsku siaredni zarobak čystymi — kala 840 dalaraŭ. Jak doŭha zachavajecca tendencyja na rost zarobkaŭ?
Čamu zarobki rastuć?
U Biełarusi rastuć realnyja dachody nasielnictva. Siarod asnoŭnych pryčyn, čamu tak adbyvajecca, ekśpiert BEROC Anastasija Łuzhina nazyvaje niekalki faktaraŭ:
«Nazirajecca rost makraekanamičnych pakazčykaŭ, raście VUP, u tym liku za košt stanoŭčaj dynamiki ŭ pramysłovaści, sielskaj haspadarcy i inšych halinach. Kali ekanomika raście, joj nieabchodnyja resursy, u tym liku čałaviečy kapitał», — tłumačyć ekanamist.
Va ŭmovach składanaj demahrafičnaj situacyi i masavaj mihracyi pracazdolnaha nasielnictva pastajanna pavialičvajecca kolkaść vakansij. Kampanii i pradpryjemstvy adčuvajuć deficyt kadraŭ.
«Adpaviedna, kab pryciahnuć śpiecyjalistaŭ, jany vymušany padvyšać zarobak. Adekvatnaja reakcyja na deficyt čaho-niebudź — pavyšeńnie cany. U hetym vypadku ŭ jakaści cany vystupaje zarpłata», — kaža Łuzhina.
Upłyvaje nie tolki deficyt kadraŭ
Jašče adnym faktaram, čamu tak adbyvajecca, ekanamist nazyvaje dosyć miakkuju ekanamičnuju palityku dziaržavy.
«Adna ź jaje prajaŭ — dastupnaść kredytavańnia. Pradpryjemstvy aktyŭna hetym karystajucca. Dziakujučy kredytam pašyrajecca vytvorčaść, dla čaho nieabchodnyja resursy, u tym liku čałaviečy kapitał. Taksama realizujucca roznyja prajekty za košt biudžetnych srodkaŭ, tamu ŭ biudžetnikaŭ zarobki taksama rastuć».
Pry hetym ekśpiert źviartaje ŭvahu na toje, što rost realnaj zarabotnaj płaty apiaredžvaje rost pradukcyjnaści pracy.
Kali rost realnych zarobkaŭ pa vynikach paŭhodździa skłaŭ 13,3%, to rost pradukcyjnaści pracy — 6%.
U paraŭnańni z anałahičnym pieryjadam minułaha hoda razryŭ pavialičyŭsia.
U 2023 hodzie rost zarobkaŭ składaŭ 7,4%, a pradukcyjnaści pracy — 3,8%.
«Aptymalna ž, kali rost realnych zarobkaŭ i pradukcyjnaści pracy iduć sinchronna. U Biełarusi, na žal, zvyčajna adbyvajecca inakš.
Efiektyŭnaść vytvorčaści raście nie tak aktyŭna, jak zarpłata. Heta aznačaje, što rost zarobku kładziecca dadatkovaj nahruzkaj na pradpryjemstvy, niaredka sa škodaj ich finansavaj ustojlivaści», — tłumačyć ekanamist.
Čaho čakać u nastupnym hodzie?
Resurs kampanij i pradpryjemstvaŭ abmiežavany, tamu ŭ doŭhaterminovaj pierśpiektyvie zarobki nie mohuć doŭha raści z takim značnym apiaredžańniem rostu pradukcyjnaści.
Na dumku Anastasii Łuzhinoj, rost realnych zarobkaŭ u nastupnym hodzie zapavolicca.
«Adnak prynamsi da vybaraŭ dziaržava budzie staracca zachavać hetuju tendencyju, jak heta zvyčajna robicca.
Navat z ulikam aficyjnych prahnozaŭ, realnyja zarobki ŭ nastupnym hodzie pavinny pradoŭžyć raści, ale ŭžo bolš ścipłymi tempami. Da kanca nastupnaha hoda prahnazavany rost składaje 4,7%».
Rost realnych zarobkaŭ u 2025 hodzie moža zapavolicca i tamu, što čakajecca značnaje zapavolvańnie rostu VUP u Rasii.
«Šmat što zaležyć ad RF, a tam budzie naziracca zapavoleńnie rostu ekanomiki. Pa vynikach pieršaha paŭhodździa 2024 hoda, pryrost VUP Biełarusi i Rasii byli supastaŭnymi — 5% i 4,6% adpaviedna.
Na nastupny hod urad Biełarusi zapłanavaŭ rost VUP bolš, čym 4%, u Rasii ž, pavodle prahnozaŭ Centrabanka, prahnazavany rost VUP składzie 1-2%.
Zapavoleńnie da 1-2% adabjecca na popycie ŭ biełaruskich vytvorcaŭ z boku rasijan. Adpaviedna, kali źniešni popyt źnizicca, to heta pryviadzie da źnižeńnia tempaŭ rostu VUP u Biełarusi», — tłumačyć ekśpiert.
Ciapier čytajuć
Što kažuć Mackievič, Karpaŭ, Čarniaŭskaja i inšyja pra pres-kanfierencyju Babaryki i Kaleśnikavaj19
Što kažuć Mackievič, Karpaŭ, Čarniaŭskaja i inšyja pra pres-kanfierencyju Babaryki i Kaleśnikavaj
Babaryka i Kaleśnikava pahavaryli ź Inhaj Ruhinienie i zaklikali Litvu «dałučycca da dypłamatyčnych namahańniaŭ ZŠA» i «nie prapuścić akno mahčymaściej»2828
Kamientary