«Bajpoł»: Praz polskija barachołki pradajucca reštki majomaści, u jakoj niama patreby
Abjadnańnie siłavikoŭ adkazała na pretenzii internaŭtaŭ.
«Bajpoł» pasprabavaŭ patłumačyć, čamu majomaść arhanizacyi pradajecca na polskich anłajn-barachołkach.
Byłyja siłaviki raskazvajuć, što častku svajoj niepatrebnaj majomaści razdavali biaspłatna: «Častka była pieradadziena adnoj ź biełaruskich demakratyčnych arhanizacyj, jakaja pažadała zachavać svaju ananimnaść. Kamanda «Bajpoł» za pieryjad svajho isnavańnia biazvypłatna pieradavała vajskovuju ekipiroŭku ŭ Hdańskuju, Urocłaŭskuju, Biełastockuju, Varšaŭskuju, Vilenskuju charuhvu, padraździaleńniu «Atam», asobnym bajcam pałka imia Kalinoŭskaha i bataljona «Teror». Heta moža być paćvierdžana adpaviednymi dakumientami i śviedčańniami samich bajcoŭ».
Razam z tym «Bajpoł» pryznaje, što sapraŭdy pradaje techniku i vajennuju ekipiroŭku praz polskija servisy — ale, maŭlaŭ, tolki tuju, u jakoj niama patreby:
«Siarod vystaŭlenaha na prodaž, u tym liku majucca pradmiety vajennaj ekipiroŭki, jakija pryznačałasia i dla płana «Pieramoha» ŭ pieršym jaho varyjancie. U suviazi z tym, što hety varyjant płana nie prajšoŭ unutrany aŭdyt, byŭ raspracavany alternatyŭny prajekt, a nieabchodnaść u častcy majomaści i ekipiroŭki adpała».
Kudy pojduć zaroblenyja ad prodažu hrošy? Na dziejnaść «Bajpoła».
Kamanda Alaksandra Azarava nie ŭpuściła nahody, kab zajavić, što infarmacyju pra rasprodaž techniki «raspaŭsiudzili ahienty ŭpłyvu režymu i niekatoryja marhinalnyja błohiery». «Sproba chajpu, jak my bačym, akazałasia hučnaj, choć i niazhrabnaj. Ale, budziem spadziavacca, kuratary ź Minska aceniać chacia b hetyja starańni», — padsumoŭvaje «Bajpoł».
Kamientary
Ludy, pieriemohi nie bude. Nie bude pieriemohi u travni, ṕjatnaccatoho travnia.