Polski sud zavočna aryštavaŭ troch biełaruskich funkcyjanieraŭ pa spravie ab rejsie Ryanair
Akruhovy sud u Varšavie zavočna aryštavaŭ troch hramadzian Biełarusi pa spravie ab rejsie Ryanair Afiny — Vilnia, jaki byŭ pasadžany ŭ Biełarusi 23 maja 2021 hoda pad padstavaj najaŭnaści vybuchovaha prystasavańnia. Tady byli zatrymanyja Raman Pratasievič i Safija Sapieha.
Pastanova ab zavočnym aryšcie była pryniataja 4 vieraśnia. Jana tyčycca byłoha dyrektara «Biełaeranavihacyi» Leanida Čuro, načalnika źmieny kantrolu Jaŭhiena Cyhanova, a taksama nienazvanaha aficera KDB vysokaha ranhu, piša Reform.news.
Nacyjanalnaj prakuraturaj pradjaŭlena abvinavačańnie ŭ akcie teroru: uziaćcie padmanam pad kantrol samalota Ryanair (art. 166 KK Polščy) i niezakonnaje pazbaŭleńnie voli pasažyraŭ i členaŭ ekipaža (art.180 KK Polščy).
U publikacyi havorycca, što ŭstanavić abstaviny pasadki samalota dapamoh 42-hadovy dyśpietčar, jakija ŭciok u Polšču z kaštoŭnymi dokazami, u tym liku zapisami z Centra kantrolu za palotami, zroblenymi na telefon. Śledstva na praciahu troch hadoŭ viała Nacyjanalnaja prakuratura i Ahienctva ŭnutranaj biaśpieki.
U kancy 2021 hoda ŭ New York Times źjaviŭsia artykuł pra avijadyśpietčara Aleha Halehava, jaki pakinuŭ Biełaruś i daŭ pakazańni pa spravie ab samalocie Ryanair. Paśla hetaha Nacyjanalnaja prakuratura Polščy apublikavała pres-reliz, u jakim havaryłasia, što vyjaŭleny niepasredny śviedka ŭsich padziej. Prakurory tady paviedamili, što pryjšli da vysnovy, što 23 maja 2021 hoda ŭ dyśpietčarskaj u aeraporcie «Minsk» znachodziŭsia supracoŭnik KDB Biełarusi, jaki i pryniaŭ rašeńnie ab pasadcy samalota ŭ Minsku. Paviedamlajecca, što jon pry hetym byŭ na suviazi ź jašče adnym čałaviekam, jakomu dakładvaŭ ab usich dziejańniach. U rečaisnaści niebiaśpieka rejsu nie pahražała.
Paźniej Stanisłaŭ Žaryn, jaki na toj momant zajmaŭ pasadu pres-sakratara ministra — kaardynatara śpiecyjalnych słužbaŭ Polščy, apublikavaŭ prezientacyju pra polskaje rasśledavańnie incydentu.
Tady ŭ suviazi z pasadkaj samalota było nazvana imia kiraŭnika Biełaeranavihacyi Leanida Čuro. Pavodle viersii polskaha boku, Čuro pryjšoŭ u zału kantrolu z supracoŭnikam śpiecsłužbaŭ i pakinuŭ jaho. Supracoŭnik śpiecsłužby prainfarmavaŭ dyśpietčaraŭ, što na borcie samalota Ryanair znachodzicca bomba i jon pavinien sieści ŭ Minsku.
-
Kolki času zajmaje vydača pašparta novaj Biełarusi? Były kalinoviec raskazaŭ, jak atrymlivaŭ dakumient
-
U Mahilovie pradajuć 10 ton bulby ŭsiaho pa 60 kapiejek za kiło. Što ź joj nie tak?
-
«Ja jašče moh sumniavacca ŭ sabie. Ale kali Maša takoje zrabiła!» Nieviadomyja fakty pra Viktara Babaryku raskazała jaho advakatka Natalla Mackievič
Kamientary