Cichanoŭskuju ŭ ZŠA ŭznaharodzili premijaj u halinie pravoŭ čałavieka
Jana pryśviaciła jaje palitviaźniam i žurnalistam.
Padčas vizitu ŭ ZŠA Śviatłana Cichanoŭskaja atrymała premiju Lantos Human Rights Prize u Vašynhtonie. Štohadova hanarovy znak uručajecca za aktyŭnuju baraćbu za pravy čałavieka, paviedamlaje jaje pres-słužba.
U 2024-m uznaharodu atrymali Śviatłana Cichanoŭskaja i Jaŭhienija Kara-Murza za mužnaść i rašučaść u zmahańni suprać dyktatury na postsavieckaj prastory. Raniej łaŭreatami premii stanavilisia takija vybitnyja asoby jak Dałaj-łama, Chiłary Klintan, Šymon Pieres.
Paśla atrymańnia ŭznaharody Śviatłana Cichanoŭskaja źviarnułasia da aŭdytoryi, kab pra praciahłuju baraćbu biełarusaŭ za demakratyju i pra parušeńni pravoŭ čałavieka ŭ krainie. Asablivy akcent u pramovie lidarka zrabiła na losach tych, chto praciahvaje akazvać supraciŭ u Biełarusi, i tych, chto znachodzicca za kratami:
«Siońnia ja prymaju hetuju premiju nie za siabie, a za ŭsich tych, chto praciahvaje zmahacca za Biełaruś:
➖ Za našych žurnalistaŭ, vymušanych źjechać u vyhnańnie, ale jakija praciahvajuć danosić praŭdu da ludziej unutry krainy. I dla tych, chto znachodzicca za kratami. Dla takich, jak Ihar Łosik z Radyjo Svaboda, jaki parezaŭ sabie vieny ŭ znak pratestu suprać žorstkaści svaich turemščykaŭ.
➖ Za ŭsich našych biasstrašnych žančyn, takich jak Maryja Kaleśnikava, jakaja parvała svoj pašpart na kavałki, kab nie być departavanaj ź Biełarusi, i ciapier režym jaje pavolna zabivaje.
➖ Za pravaabaroncaŭ, takich jak naš łaŭreat Nobieleŭskaj premii Aleś Bialacki, jakomu prysudzili 10 hadoŭ za dapamohu represavanym i za zakliki da nacyjanalnaha dyjałohu.
➖ Za aktyvistaŭ, takich jak Palina Šarenda-Panasiuk, maci dvaich synoŭ, jakaja admoviłasia ad biełaruskaha hramadzianstva ŭ znak pratestu suprać niespraviadlivaha suda i ciapier padviarhajecca katavańniam u turmie.
➖ Za majho muža Siarhieja, jaki znachodzicca ŭ izalacyi ŭžo 500 dzion, adbyvajučy svoj 19-hadovy termin», — skazała jana.
Ciapier čytajuć
Žonka Arcioma, jaki emihravaŭ u Ispaniju ź siamjoj i zastaŭsia tam adzin, adkazała, čamu ŭ Baranavičach lepš, čym u Barsiełonie8
Kamientary