Leanid Kučma: «Łukašenka siońnia — nie samastojny, ale mocny hulec»

Adkazvajučy na pytańnie, ci mahčymyja paśla vajny ekanamičnyja kantakty Ukrainy z Rasijaj, Leanid Kučma adkazaŭ, što jany dla Ukrainy «nie tolki mahčymyja, a absalutna nieabchodnyja! Inakš jak my budziem atrymlivać reparacyi?» 

Paśla taho jamu zadali pytańnie adnosna Biełarusi i Łukašenki. Jak Ukrainie budavać adnosiny ź imi padčas vajny i paśla jaje zakančeńnia? I nakolki Łukašenka zastajecca samastojnaj fihuraj?

Na heta były prezident Ukrainy adkazaŭ tak:

«Ja dumaju, što ŭkrainskaje kiraŭnictva vielmi pravilna vybrała ciapierašniuju madel adnosin ź Biełaruśsiu. Niahledziačy na toje, adkul pačynałasia hetaja vajna i jak uvieś čas vykarystoŭvaje biełaruskuju terytoryju Rasija.

Usie ŭsio razumiejuć. Usie ŭsio bačać. Nichto ničoha nie zabyŭsia. Ale abodva baki robiać vyhlad, što dobrasumlenna vykonvajuć uzbrojeny niejtralitet. I na hety momant heta pravilna.

Mnie zdajecca, što ŭkraincy histaryčna byli hatovyja da taho, što našym adkrytym voraham stała Rasija. Zanadta šmat Maskovija rabiła ŭ dalokim i niadaŭnim minułym takoha, što dazvalała čakać hetaha. Ale Biełaruś raniej nikoli nie davała padstaŭ hladzieć na siabie jak na patencyjnaha voraha.

U adroźnieńnie ad ruskich, ź jakimi my pražyli ŭ adnoj dziaržavie tolki krychu bolš za try stahodździ, ź biełarusami my byli razam i ŭ Vialikim Kniastvie Litoŭskim, i ŭ staražytnaj Rečy Paspalitaj, a raźjadnalisia tolki z raspadam Savieckaha Sajuza.

Ja vyras na histaryčnym pamiežžy troch uschodniesłavianskich narodaŭ, i ŭ miašanaj movie majho dziacinstva byŭ značny biełaruski składnik, čaho ja tady jašče nie razumieŭ. A voś što ja razumieŭ ź pieršych dzion svajho palityčnaha žyćcia, dyk heta nieabchodnaść zachavańnia našaj blizkaści ź biełaruskim narodam.

Mienavita tamu, staŭšy prezidentam, ja ŭvieś čas padtrymlivaŭ vysoki ŭzrovień palityčnych i ekanamičnych adnosin ź Biełaruśsiu, niepasredna kantaktavaŭ z Łukašenkam.

U adroźnieńnie ad maich stasunkaŭ z [prezidentam Polščy] Kvaśnieŭskim, ź jakim ja sustrakaŭsia amal hetak ža časta, siabroŭstva pamiž mnoj i Łukašenkam nie było. Ja naohuł nie ŭpeŭnieny, ci jość u jaho siabry. Ale ja chacieŭ, kab siabravali našy narody i dziaržavy, i tady heta ŭdavałasia.

Łukašenka patrebny Pucinu. Biełaruś dla Pucina stratehična nieacennaja — i dla vajny suprać nas, i dla patencyjna niepaźbiežnaj kanfrantacyi z Zachadam. Łukašenka ž siońnia efiektyŭna kantraluje svaju krainu, dla čaho ŭ samoha Pucina nie chapiła b resursu. Tamu ja b skazaŭ, što Łukašenka siońnia — nie samastojny, ale mocny hulec.

Paradoks u tym, što Łukašenka dvojčy niesamastojny — jon zaležyć jašče i ad Kitaja, a nie tolki ad RF. Hetaki słuha dvuch panoŭ. Ale heta daje jamu mahčymaści manieŭravać, čas ad času vykarystoŭvajučy niesupadzieńnie intaresaŭ i supiarečnaści pamiž Piekinam i Maskvoj. Ci vialiki patencyjał u takoj hulni? Pahladzim.

Što ž tyčycca stasunkaŭ ź Biełaruśsiu paśla vajny. Tut, jak i ŭ mnohich inšych pytańniach, usio zaležyć ad taho, jak i kali skončycca hetaja vajna».

Leanid Kučma byŭ prezidentam Ukrainy ŭ 1994-2005 hadach. Pryjšoŭ jon da ŭłady va Ukrainie praktyčna ŭ toj ža samy čas, jak i Łukašenka ŭ Biełarusi, z roźnicaj faktyčna ŭ tydzień. Ale sistema, zbudavanaja im va Ukrainie, nie była režymam adnaasobnaj ułady, tamu paśla zakančeńnia dvuch adviedzienych Kanstytucyjaj terminaŭ prezidenctva jon musiŭ pajści ŭ adstaŭku, navat nie zdoleŭšy ŭ toj čas pieradać uładu svajmu pierajemniku — Viktaru Janukoviču. Paśla taho Kučma ŭ aktyŭnaje palityčnaje žyćcio, źviazanaje sa zmahańniem za ŭładu, nie viartaŭsia.

• 11
• 6
• 5
• 4
• 2
• 0
• 0
• 0