U Kalifornii vyłavili druhuju za paŭhoda trochmietrovuju «rybu Sudnaha dnia» — jana pradkazvaje biadu
Ličycca, što hetaja ryba źjaŭlajecca pradkazalnikam katastrof.
Instytut akijanahrafii Skrypsa pry Univiersitecie Kalifornii ŭ San-Dyjeha paviedamiŭ, što na minułym tydni adzin ź jaho aśpirantaŭ vyjaviŭ ekziemplar ryby daŭžynioj kala 3 mietraŭ na plažy ŭ Ensinitesie na poŭdni Kalifornii, piša The Guardian.
Hetyja istoty, jakija majuć doŭhija cieły ŭ formie stužak, zvyčajna žyvuć u hłybinnaj častcy akijana, viadomaj jak miezapiełahičnaja zona, kudy nie pranikaje śviatło.
Ich časam nazyvajuć «rybami kanca śvietu» z-za mifičnaj reputacyi pradkazalnikaŭ stychijnych biedstvaŭ abo ziemlatrusaŭ; 20 takich ryb byli znojdzieny na plažach Japonii za niekalki miesiacaŭ da ziemlatrusu 2011 hoda.
Novaje adkryćcio adbyłosia praź niekalki miesiacaŭ paśla taho, jak hrupa kajakieraŭ i nyrcoŭ kala ŭźbiarežža San-Dyjeha znajšła miortvaha sieladcovaha karala daŭžynioj 3,5 mietry.
Heta niezvyčajnaja źjava. Pavodle Bena Frebła, ekśpierta pa rybie ź Instytuta akijanahrafii Skrypsa, z 1901 hoda remień-rybu ŭ Kalifornii znachodzili na bierazie ŭsiaho 20 razoŭ. Jon vykazaŭ zdahadku, što źmianieńni ŭ akijanskich umovach i pavieličeńnie kolkaści takich ryb mohuć stać pryčynaj takich vypadkaŭ.
Daśledčyki źviazvajuć pavieličeńnie nazirańniaŭ s takimi źjavami, jak El-Nińjo i Ła-Nińja, ale ŭmovy, jakija vyklikajuć takija padziei, nie zaŭsiody vidavočnyja, i šmatlikija faktary mohuć pryvieści da vykidu ryby na bierah.
Daśledčyki ŭziali ŭzory i zamarozili rybu, znojdzienuju hetym tydniem, dla dalejšaha vyvučeńnia i zachavańnia ŭ marskoj kalekcyi pazvanočnych Instytuta. Navukoŭcy taksama vyvučyli rybu, jakaja vykinułasia ŭ žniŭni. Aŭtapsija dazvoliła daśledčykam praanalizavać jaje orhany i stvaryć «pieršy vysokajakasny hienom na ŭzroŭni chramasom».
Kamientary
Budzie ni sumna ..i ni śmiešna..
Maju nadzieju mienavita u Štatach...