«Paniki niama. Vorahi chłusiać». Jak asadaŭskaja prapahanda reahuje na pierśpiektyvu padzieńnia ŭłasnaha režymu ŭ Siryi
Naratyvy i sproby stvareńnia alternatyŭnaj realnaści ŭ asadaŭcaŭ vielmi padobnyja na pavodziny rasijskich i łukašenkaŭskich prapahandystaŭ, kali tyja sutykajucca ź nieabchodnaściu tłumačyć parazy Kramla va Ukrainie. Adnak u ciapierašnich realijach navat rasijskaja prapahanda paśmiejvajecca nad adčajnym aptymizmam siryjskaj.
Pačniem z taho, što siryjskaja ŭradavaja prapahanda pa prykładzie rasijskaj i biełaruskaj aktyŭna karystajecca telehramam i za apošnija hady zajmieła tam vialikuju i raznastajnuju sietku kanałaŭ, što naležać siryjskim dziaržinfarmahienctvam, vajskovym i siłavym strukturam, vajenkaram i hetak dalej (niekatoryja siryjskija prapahandysckija resursy majuć staronki navat u «Adnakłaśnikach»).
Tym časam asobnyja praŭradavyja miedyjnyja ekśpierty, pradstaŭniki sistemnaj intelehiencyi i bačnyja aktyvisty addajuć pieravahu fejsbuku.
Padziei apošnich dzion u Siryi, kali paŭstancy z poŭnačy krainy imkliva zajmali važnyja bujnyja harady, vajskovyja bazy i vielizarnyja terytoryi, što jašče niadaŭna kantralavalisia režymam Bašara Asada, šakavali rasijskich prapahandystaŭ i vajenkaraŭ, prymusiŭšy niekatorych ź ich rabić prahnozy pra chutki krach siryjskich uładaŭ.
A jak reahujuć sami asadaŭcy? «Naša Niva» razabrałasia ŭ pytańni i zrabiła padborku vykazvańniaŭ siryjskaj prapahandy.
«Usio chłuśnia. My nie adstupajem»
Asnoŭnyja siryjskija dziaržaŭnyja telekanały i radyjosłužby, takija jak SANA, «Alichbaryja», ORTAS (anałah biełaruskaj BT), Sham FM i inšyja, va ŭnison zajaŭlajuć pra nibyta zachavańnie kantrolu nad terytoryjami, jakija byli zachopleny paŭstancami, pra nibyta adsutnaść paniki na miescach i navat pra nibyta ŭcioki apazicyjnych siłaŭ pad naciskam uradavych vojskaŭ.
U dadatak da hetaha siryjskaja dziaržaŭnaja prapahanda pakazvaje kadry «spakojnych vulic» Damaska i inšych haradoŭ (častka ź jakich užo aktyŭna šturmujecca paŭstancami) i śćviardžaje, što ŭsie zamiežnyja resursy, akramia dziaržaŭnych, rasijskich i iranskich, «pakazvajuć fejki».
Voś jak heta vyhladaje (praz ubudavany ŭ telehramie pierakład na biełaruskuju movu).
«Na ŭskrainie Damaska dziejničaje vielmi mocnaje ačapleńnie, i nichto nie moža jaho prarvać», — piša siońnia ŭviečary dziaržaŭnaje ahienctva SANA sa spasyłkaj na kiraŭnictva MUS Siryi.
U toj ža čas adzin z bujnych rasijskich vajenkaraŭ nazvaŭ dopis SANA «tupoj kamičnaj zajavaj», napisaŭšy pra ŭvachodžańnie siryjskich paŭstancaŭ u paŭdniovyja pryharady siryjskaj stalicy.
«Ministr zamiežnych spraŭ Rasii Siarhiej Łaŭroŭ zajaviŭ, što RF praciahvaje padtrymlivać siryjskuju armiju ŭ likvidacyi terarystaŭ i vystupaje suprać sprobaŭ «Chajat Tachryr aš-Šam» [adna z hrupovak paŭstancaŭ] źmianić bałans sił na miescy», — cytuje Łaŭrova siryjski dziaržaŭny telekanał «Alichbaryja».
Pry hetym kanał praminuŭ toj fakt, što Łaŭroŭ padčas pres-kanfierencyi nazvaŭ siły paŭstancaŭ «zakonnaj apazicyjaj».
Tym časam aficyjny telehram-kanał kancylaryi premjer-ministra Siryi siońnia dniom piša pra toje, što siryjskaja armija kantraluje paŭdniovuju častku Siryi i nikudy nie vyvodziła adtul svaje siły, nazyvajučy paviedamleńni i videazapisy zachodnich ŚMI i paŭstancaŭ «fejkami».
Śćviardžeńni kancylaryi premjera tut ža vypadkova abviarhajucca dziaržaŭnym ahienctvam ORTAS, adnak toje zajaŭlaje, što siryjskaja armija nie adstupaje z poŭdnia krainy, a «ažyćciaŭlaje naturalnuju pieradysłakacyju i razhortvańnie ŭ adpaviednaści z płanami i zahadami vajskoŭcaŭ» (a pierad hetym u papiarednim dopisu pakazvaje kadry z vulic paŭdniovaha horada Der'a, dzie «ŭsio spakojna»)
Pa viersii kanałaŭ, blizkich da siryjskaha Minabarony, situacyja taksama vyhladaje kantralavanaj i aptymistyčnaj.
Adzin ź ich sa spasyłkaj na vajskovaje kamandavańnie piša, što «naša doblesnaja armija praciahvaje pravodzić svaje jakasnyja apieracyi suprać hrupovak terarystaŭ u kirunkach haradoŭ Chama, Choms i paŭnočnaj sielskaj miascovaści Der'a, u vyniku čaho terarysty hinuć sotniami, dziasiatki transpartnych srodkaŭ i mašyn źniščanyja, jak i ich štaby, składy zbroi i bojeprypasaŭ».
Kanał da taho ž publikuje fatahrafiju starejšaha syna prezidenta Siryi Bašara Asada Chafieza Al-Asada, jakoje było nibyta zroblena siońnia ŭviečary ŭ Damasku (sam 23-hadovy Chafiez Al-Asad jašče niekalki dzion tamu abaraniaŭ dysiertacyju ŭ Maskoŭskim dziaržaŭnym univiersitecie).
A voś jak vyhladaje aktualnaja karta bajavych dziejańniaŭ u Siryi, pavodle rasijskich vajenkaraŭ (čyrvonaje — terytoryja pad kantrolem urada, zialonaje — paŭstancy). Stalicu Damask z usich bakoŭ biaruć u abcuhi.
Jak Jadźvihin Š. smažyŭ u redakcyi skvarki i čamu łožak Kupały nahadvaŭ dochłaha viarbluda. Ivulin i Astapienia źniali zachaplalny film pra «Našu Nivu»88
Kamientary
- Heta nie Asad
- Heta nie švabra
- Dupa nie jaho
- Heta novy vid medytacyi, karysny dla zdaroŭja!