Hienieralny sakratar NATO paraiŭ Zialenskamu mienš krytykavać Šolca
Hienieralny sakratar NATO Mark Rute ŭ intervju ahienctvu DPA paviedamiŭ, što raiŭ prezidentu Ukrainy Uładzimiru Zialenskamu mienš krytykavać kanclera Hiermanii Ołafa Šolca. Rute ličyć takuju krytyku niespraviadlivaj: pavodle jaho słoŭ, mała chto z zachodnich sajuźnikaŭ Ukrainy zrabiŭ stolki dla padtrymki hetaj krainy, jak Šolc i jaho ŭrad, piša Radyjo Svaboda.
U toj ža čas Rute dadaŭ, što sam jon, u adroźnieńnie ad Šolca, vystupaje za pastaŭki Ukrainie niamieckich rakiet dalokaha radyusu dziejańnia Taurus. Admova Šolca nakiravać Ukrainie hetyja rakiety była adnoj z pryčyn krytyki ŭ adras kanclera z boku Zialenskaha. Inšaj pryčynaj stała niadaŭniaja telefonnaja razmova Ołafa Šolca z Uładzimiram Pucinym.
Mark Rute adznačyŭ taksama, što ŭ suviazi ź viartańniem na pasadu prezidenta ZŠA Donalda Trampa (jon pavinien prynieści prysiahu 20 studzienia), jon čakaje bolš strohaha padychodu Vašynhtona da pytańnia ab vydatkach sajuźnikaŭ pa NATA na abaronu.
«Tramp zachoča, kab my rabili bolš», — ličyć hiensak NATO.
Pavodle jaho słoŭ, ciapier jeŭrapiejskija členy NATO ŭ cełym traciać na abaronu bolš za 2% svajho sukupnaha VUP. Adnak, kali abjom hetych vydatkaŭ nie budzie pavialičvacca i dalej, praz 4-5 hadoŭ u sajuźnikaŭ mohuć uźniknuć prablemy sa strymlivańniem Rasii, papiaredžvaje Rute.
Kamientary