Žyvahłod pryznała rassyłku praz čat-bot «Sumlennych ludziej» karystalnikam u Biełarusi: Ale nie ŭ pracoŭny čas, paśla 18 hadzin
Prapahandysty kpiać z demakratyčnych sił, raskazvajučy, što praz apošniuju rassyłku bota «Sumlennych ludziej» u Biełarusi nibyta zatrymali bolš za dziasiatak čałaviek.
Prapahandysckija i blizkija da siłavikoŭ kanały śćviardžajuć, što bot «Sumlenny vybar», jaki byŭ stvorany ŭ 2022 hodzie, pravioŭ novuju rassyłku: «abviaščeńnie ad bota pryjšło prosta ŭ pracoŭny čas, za heta ŭžo zatrymana bolš za dziasiatak ludziej, jakija praviaduć Novy hod u izalatary».
U kamientary «Našaj Nivie» lidarka «Sumlennych ludziej» Alena Žyvahłod paćvierdziła fakt rassyłki 16 śniežnia, ale nie ŭ pracoŭny čas, a paśla 18-j hadziny.
«16 śniežnia my dasłali paviedamleńnie ŭ bot, kab raspavieści pra «vybary-2025». My aktyvizujem kamunikacyju ŭ bocie «Sumlenny vybar», bo na jaho dobraachvotna padpisalisia tyja, chto hetaj temaj cikavicca. My stvaryli jaho napiaredadni refierendumu-2022. Tam my źbirali realnyja prapanovy pa źmienie Kanstytucyi, tam ža raskazvali pra pracu fejkavych deputataŭ u 2023-m, a taksama pra tak zvanyja parłamienckija i miascovyja vybary ŭ lutym 2024-ha».
Alena kaža, što rassyłku jany praviali z žadańniem «sadziejničać raźvićciu palityčna hramadzianskaj supolnaści ŭ Biełarusi praz hramadzianskuju adukacyju», bo heta zastajecca ich misijaj.
Ale što nakont biaśpieki?
Kantent bota byŭ pryznany «ekstremisckimi materyjałami» ŭ sakaviku 2024-ha, a ŭsia arhanizacyja «Sumlennyja ludzi» atrymała status «ekstremisckaha farmavańnia» jašče raniej — u studzieni 2022 hoda, tamu ŭzajemadziejańnie ź inicyjatyvaj na siońnia niasie kryminalnuju adkaznaść.
«Što tyčycca našaj adkaznaści za kamunikacyju ŭ ekstremisckich kanałach, to dla nas heta sapraŭdy etyčna niaprostaje rašeńnie. Pamiž tym, kab kamunikavać u takich umovach ci nie kamunikavać naohuł, my vybrali pieršaje. Tak, za padpisku na bot «Sumlenny vybar», telehram-kanał i jutub-kanał «Sumlennyja ludzi» moža nastupić adkaznaść pa viersii łukašenkaŭskaha zakanadaŭstva. Ale roŭna jak za padpisku na luboje inšaje niezaležnaje vydańnie ci arhanizacyju. My chočam vieryć, što ludzi prymajuć rašeńnie padpisvacca ci nie, śviadoma, a taksama kłapociacca pra svaju biaśpieku».
Alena dadaje, što, dbajučy pra biaśpieku, jany ŭkaranili technałohiju, jakaja dazvalaje karystalniku pierajmienavać bot «sumlenny vybar» na svoj hust.
«Dla tych, chto choča praciahvać atrymlivać rassyłku, heta robić bot mienš zaŭvažnym u vypadku prahladu telefona siłavikami. Ale kali vy znachodziciesia ŭ Biełarusi i adčuvajecie niebiaśpieku, to vydalicie bot. I zrabicie heta pa instrukcyi. My dasyłali jaje razam z našym paviedamleńniem pra vybary, i jana taksama jość u hałoŭnym mieniu bota pa knopcy «Vydalić akaŭnt».
«Sumlennyja ludzi» dadatkova adznačyli, što im samim nieviadoma pra fakty aryštaŭ u Biełarusi za ich rassyłku.
«My dumajem (i nam tak chočacca vieryć), što paviedamleńni ŭ prarežymnych telehram-kanałach — heta praciah stratehii prapahandy: zapužać usich, chto praciahvaje atrymlivać niezaležnuju infarmacyju ŭ Biełarusi».
Raniej «Naša Niva» taksama publikavała artykuł pra toje, jak pačyścić telehram-boty, kab nie zastałosia nijakich śladoŭ — skarystajciesia hetaj instrukcyjaj, kali heta dla vas aktualna.
Ciapier čytajuć
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia8080
Kamientary