Stała viadoma, chto chavajecca za psieŭdanimam hałoŭnaj rasijskaj danosčycy Karabkovaj. Jana pisała danos na «Biełsat»
Dva hady tamu sacyjalny antrapołah Alaksandra Archipava daviedałasia, što na jaje napisała danos niejkaja Hanna Karabkova. Z tych časoŭ Karabkova zrabiła dziasiatki danosaŭ na inšych ludziej i dała intervju šmatlikim ŚMI, u jakich jana paŭstavała ŭ jakaści sieryjnaj danosčycy. Archipava ŭvieś hety čas sprabavała daviedacca, ci realny čałaviek Karabkova i chto za joj staić, kab zrazumieć, jak uładkovana sučasnaje danośnictva ŭ Rasii. Vynikami svajho rasśledavańnia antrapołah padzialiłasia ź Bi-bi-si.
Siarod šmatlikich danosaŭ Karabkovaj jość i danos na telebačańnie «Biełsat» i na redakcyju «Radyjo Svaboda».
U ruskamoŭnaj «Vikipiedyi» na staroncy pra Karabkovu byli apublikavany skany adkazaŭ rasijskich viedamstvaŭ, naprykład, listy z Hienprakuratury RF z anonsami pravierak hetych vydańniaŭ pa fakcie jaje zvarotaŭ, a taksama adrasavanyja joj spravazdačy Hienprakuratury ab pryznańni hetych vydańniaŭ niepažadanymi arhanizacyjami.
Sacyjalny antrapołah Alaksandra Archipava i linhvist Daniił Skarynkin zrabili svajo rasśledavańnie i śćviardžajuć, što pad imiem sieryjnaj danosčycy Hanny Karabkovaj chavajecca jekacierynburhski žurnalist, vikipiedyst Ivan Abaturaŭ.
Archipava i Skarynkin zaŭvažyli, što zapisy Karabkovaj padobnyja na natatki Abaturava na «Vikinavinach»: u ich vykarystoŭvajucca adnolkavyja maŭlenčyja abaroty, dapuskajucca adny i tyja ž pamyłki, taksama IP-adras, ź jakoha adpraŭlalisia danosy, u Karabkovaj i Abaturava supadaŭ. Hetyja i inšyja prykmiety, jakija jany pryvodziać u rasśledavańni, nie pakidajuć sumnievaŭ u tym, što heta adzin i toj ža čałaviek.
Raniej Ivan Abaturaŭ traplaŭ u publičnyja skandały, źviazanyja z danosami. U žniŭni 2022 hoda dyrektar vydaviectva «Niestar-Historyja» Siarhiej Erlich raspavioŭ, što ŭ ich ofis pryjšła palicyja pa danosie Abaturava Ivana Mikałajeviča, jaki ŭhledzieŭ u knizie vydaviectva ab Chałakoście ŭ Rumynii «łžyvyja źviestki ab dziejnaści SSSR u hady Druhoj suśvietnaj vajny».
Sam Abaturaŭ taksama nie chavaŭ prychilnaści da danosaŭ.
«Žurnalist pry Stalinie byŭ chadziačaj prakuraturaj. Ja taksama takim być chaču!» — pisaŭ Abaturaŭ u 2019 hodzie va «UKantakcie».
Na pytańnie karespandenta Bi-bi-si va «UKantakcie», ci sapraŭdy jon piša danosy pad imiem «Karabkovaj», Abaturaŭ koratka napisaŭ: «Dobry dzień. Vy pamylilisia». Paśla hetaha jon pierastaŭ adkazvać na paviedamleńni.
Filipienka raskazaŭ, ad kolkich svaich knih admoviŭsia b i čamu pradaŭ «Tesłu»2
Kamientary
… a jeŝie oni pro adinnarot pletut,m-da