Adzinaja hmina ŭ Polščy, dzie pieramoh Mencen, zasielenaja biełarusami. Ale hałasavali nie jany

Žurnalistka Paŭlina Siehień (Paulina Siegień) na staronkach vydańnia Krytyka Polityczna źviartaje ŭvahu na niečakany vynik pieršaha turu prezidenckich vybaraŭ u hminie Dubičy Carkoŭnyja, dzie jana žyvie. Pieramožcam tam staŭ ultrapravy kandydat Słavamir Mencen.

Pa słovach aŭtarki, u hetym niama nijakaj zahadki. Usio tłumačycca tym, što amal pałova vybarščykaŭ źjaŭlajucca vajskoŭcami.

Na troch vybarčych učastkach, raźmieščanych na terytoryi hminy, było vydadziena 1003 biuleteni. Ź ich 247 čałaviek prahałasavali pa śpiecyjalnych paśviedčańniach — heta značyć, jany nie žyvuć tut pastajanna, ale mieli dazvoł prahałasavać u hetym miescy. Akramia taho, jašče 206 čałaviek unieśli siabie ŭ vybarčyja śpisy pierad vybarami, choć raniej u ich nie byli zapisanyja. Heta razam daje 453 čałavieki, jakija nie źjaŭlajucca stałymi žycharami hminy. A heta — amal pałova ŭsich, chto prahałasavaŭ.

Pa vynikach hałasavańnia Mencen atrymaŭ 326 hałasoŭ, Tšaskoŭski — 205, Naŭrocki — 156, Braŭn — 98. Dubičy Carkoŭnyja stali adzinaj hminaj, dzie kandydat Kanfiederacyi ŭ pieršym tury pieramahaŭ.

Ale navat u takoj maleńkaj hminie bačnyja roźnicy ŭ raźmierkavańni hałasoŭ pamiž tryma ŭčastkami.

Tam, dzie hałasavali vajskoŭcy (ich masavuju prysutnaść paćviardžajuć členy kamisij), a mienavita ŭ samich Dubičach Carkoŭnych, Mencen atrymaŭ bolš hałasoŭ, čym Tšaskoŭski z Naŭrockim razam. Ale ŭžo ŭ Starym Korninie Rafał Tšaskoŭski apiaredziŭ Mencena na adzin hołas (37 suprać 36), a Hałoŭnia pieramoh Braŭna (24 suprać 21).

Na terytoryi treciaha ŭčastka ŭ Vojnaŭcy, jaki achoplivaje vioski niepasredna kala miažy ź Biełaruśsiu, situacyja taksama roźnicca ad dubickaj. Tam pieramoh Tšaskoŭski, za im Mencen, potym Hałoŭnia i Biejat, a paśla ich Karal Naŭrocki.

«Vojska choča zmahacca ź mihrantami, a nie z Pucinym», — bje tryvohu Paŭlina Siehień.

Jak zaŭvažaje aŭtarka, vyniki vybaraŭ u hminie Dubičy Carkoŭnyja mała havorać pra mierkavańni miascovych žycharoŭ, zatoje šmat — pra stan polskaha vojska. Choć Polšča maje najbujniejšuju armiju ŭ ES i vydatkoŭvaje najbolš ad VUP na abaronu, heta mała što značyć, kali ŭ samim vojsku panujuć, faktyčna, prarasijskija nastroi.

Pavialičyć

Vysoki ŭ Dubičach Carkoŭnych vynik Mencena ŭ spałučeńni z vynikam Braŭna pakazvaje, što mnohija vajskoŭcy — ludzi, jakija pavinny baranić dziaržavu, — na samoj spravie nastrojenyja suprać jaje asnoŭ. Sałdaty, jakija sami źjaŭlajucca častkaj biudžetnaj śfiery, padtrymlivajuć partyi, što vystupajuć za pryvatyzacyju, skaračeńnie dziaržaŭnych pasłuh i słabuju dziaržavu.

Choć Mencen u svajoj kampanii mała havaryŭ pra vajnu, armiju ci abaronu, jon jasna vykazvaŭsia za toje, kab ludzi sami płacili za achovu zdaroŭja i adukacyju. I kali tak — čamu b nie «pryvatyzavać» taksama i biaśpieku? Tym bolš što Kanfiederacyja vystupaje za toje, kab kožny moh svabodna vałodać zbrojaj. Pa sutnaści, heta aznačaje, na pohlad žurnalistki, pieradać funkcyju biaśpieki ŭ pryvatnyja ruki.

Urešcie, pra jakuju vajnu z Rasijaj havorka? Mencen adkryta zajaŭlaŭ, što Ukraina pavinna sastupić, a z Pucinym treba damaŭlacca. I, vidać, hetaja pazicyja padabajecca sałdatam, što stajać na miažy.

Pavialičyć

Im bližejšaja ideja «vajny ź mihrantami i pravaabaroncami», piša Siehień, čym supraćstajańnie aŭtarytarnym režymam. Ale ž, zaŭvažaje aŭtarka, kali Ukraina prajhraje ci budzie «mir z Pucinym», heta stanie realnaj niebiaśpiekaj dla Polščy — značna bolšaj, čym mihranty.

Takaja situacyja, na pohlad žurnalistki, śviedčyć pra «nizki ŭzrovień kłasavaj śviadomaści ŭ polskaj armii i słabaść palitrukoŭ».

Vyniki hałasavańnia ŭ Dubičach Carkoŭnych, davodzić Siehień, — «surjozny sihnał dla abiedźviuch partyj, što składajuć polski palityčny duapoł — kolki b ciopłych słoŭ pra hieraizm sałdat ni kazali były i ciapierašni premjer, kolki b ni ŭzdymali eha chłopcaŭ i dziaŭčat u formie ministry abarony, kolki b ni pavyšali zarobkaŭ i ni davali nadbavak, kolki b ni budavali płatoŭ i sistem «Uschodni ščyt» — u vyniku ŭsiu hetuju padtrymku sałdaty ŭsio roŭna «vypłačvajuć» hałasami za Mencena i Braŭna».

Varta adznačać, što vajskoŭcy ž nie hałasavali za Mencena niejak asabliva. Prosta ŭ ich uzrostavaj katehoryi — 18—39 — Mencen pieramahaŭ. Jany hałasavali tak, jak i ŭsie inšyja maładziejšyja palaki.

Pavialičyć

Bolš čytajcie pra heta ŭ našym artykule: Što za Mencen i Zandbierh i čamu maładyja palaki masava hałasavali za ich?

• 4
• 0
• 5
• 13
• 6
• 0
• 1
• 0