Nie mienš za 30 tysiač žycharoŭ štataŭ Techas, Džordžyja, Arkanzas i Misury zastalisia biez elektryčnaści paśla mahutnaha śniehapadu, jaki ŭ asobnych rajonach stvaryŭ śniežnyja hurby, što pieravysili amal try hadavyja normy
Pra heta piša RTVi sa spasyłkaj na Associated Press (AP).
U horadzie Litł-Rok (štat Arkanzas) vyšynia śniehu dasiahnuła 10 calaŭ (250 mm) pry hadavoj normie ŭ 3,8 cali (97 mm). Na poŭnačy Techasa, u Akłachomie i kala aeraporta Miemfisa (štat Tenesi) hety pakazčyk skłaŭ bolš za 7 calaŭ (180 mm), choć u Miemfisie zvyčajna fiksujuć nie bolš za 2,7 cali śniehu (69 mm) u hod, adznačaje AP.
Horad Birminhiem u štacie Ałabama pabiŭ rekord za 11 hadoŭ — dla hetaha chapiła ŭsiaho 2 calaŭ śniehu (50 mm), dadaje ABC.
Mietearołahi raniej papiaredzili 20 štataŭ ad Techasa da Dełavera pra niebiaśpieku śniežnaj bury. Ułady jak minimum šaści rehijonaŭ, uklučajučy Techas, Paŭdniovuju Karalinu i Ałabamu, abviaścili režym nadzvyčajnaj situacyi. Pavodle sajta Flightaware, u subotu ŭ ZŠA admianili nie mienš za 842 avijarejsy, a dniom raniej — 3537. CNN adznačaje, što minułaja piatnica stała samym niespryjalnym dniom dla avijapieralotaŭ u ZŠA ź lipienia.
Śniehapad i ledziany doždž zrabili niebiaśpiečnymi aŭtamabilnyja darohi, dadaje AP. U Atłancie (štat Džordžyja) miascovaja kamanda Atlanta Hawks pieraniesła matč z Houston Rockets praz hałalod, a ŭ Ałabamie nie vyklučajuć, što ŭ paniadziełak dzieci nie pojduć u škołu. U Akłachomie patrulnyja zafiksavali bolš za 500 darožnych zdareńniaŭ, 85 ź jakich skončylisia traŭmami.
Adklučeńnie elektryčnaści ŭ Virdžynii pryviało da prablem ź miascovaj sistemaj vodazabieśpiačeńnia, z-za čaho žycharam časova rekamiendavali kipiacić vadu pierad užyvańniem. Ciapier heta papiaredžańnie źniata, a elektrazabieśpiačeńnie pastupova adnaŭlajecca va ŭsich paciarpiełych štatach.
Elektrazabieśpiačeńnie moža stać krytyčna važnym z-za arktyčnych marazoŭ, jakija pryjšli ŭ rehijon razam ź niepahadździu. Ułady Džordžyi adkryli pa ŭsim štacie aciaplalnyja stancyi, niekatoryja ź jakich užo pierapoŭnienyja tymi, chto choča sahrecca, adznačaje ABC.
Kamientary