Eks-supracoŭnic Tut.by Łojku, Taŭkačovu i Tkačenku, jakija vyjechali ź Biełarusi, vyrašyli sudzić zavočna

Byłych supracoŭnic Tut.by— hałoŭnuju redaktarku palityka-ekanamičnaha błoka Tut.by Volhu Łojka, redaktarku adździeła nieruchomaści Alenu Taŭkačovu i jurydyčnuju kansultantku Kaciarynu Tkačenku — abvinavačvajuć pavodle čatyroch «palityčnych» artykułaŭ Kryminalnaha kodeksa RB:

• č. 3 art. 130 (raspalvańnie inšaj sacyjalnaj varožaści ci varažniečy),
• č. 2 art. 243 (u staroj redakcyi KK — uchileńnie ad vypłaty padatkaŭ),
• č. 1 art. 342 (arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich),
• č. 3 art. 361 (zakliki da mier abmiežavalnaha charaktaru (sankcyj), inšych dziejańniaŭ, nakiravanych na pryčynieńnie škody nacyjanalnaj biaśpiecy).

Sudździoj pa spravie źjaŭlałasia Valancina Ziańkievič, jakaja ŭ 2023 hodzie pryhavaryła hałoŭreda TUT.by Marynu Zołatavu i hiendyrektara TAA «Tut baj Miedyja» Ludmiłu Čekinu da 12 hadoŭ pazbaŭleńnia voli.

Zaraz vieści praces pryznačanaja sudździa Alena Šylko, sud nad supracoŭnicami Tut.by budzie zavočnym, bo abvinavačanyja znachodziacca pa-za miežami Biełarusi.

Letam 2024 hoda, pierad mierkavanym pačatkam sudovaha pracesu, Volha Łojka zajaviła «Radyjo Svaboda», što ŭ sud u Biełarusi, jak i dla ŭdziełu ŭ pracesie praz skajp, jaje nie zaprašali.

«Adnosna pracesu mnie skazać niama čaho — nie ŭdzielničaju, mianie nichto nie infarmavaŭ i ja advakata nie brała. Heta ichny praces, nie budu im dapamahać. Unutry krainy zastałosia šmat ludziej, kamu patrebna jurydyčnaja dapamoha, nie budu adciahvać na siabie resursy», — skazała Volha Łojka.

Pra vysunutyja abvinavačańni Łojka skazała, što nie moža «kamientavać tryźnieńni i absurd, jakija nie majuć da jaje adnosin».

«Da vypłaty padatkaŭ kampanijaj žurnalist nie maje dačynieńnia, prychilnicaj sankcyj ja nikoli nie była, adpaviedna nie źbirałasia da ich zaklikać. Razumieju tak, što mašyna represij i absurdu prosta nie moža spynicca. Ale tym vidavočniej heta dla navakolnych ludziej. I navat dobra, što tam niama tarmazoŭ, — chutčej usio zavieršycca», — zaznačyła žurnalistka.

10 krasavika 2023 hoda Minski haradski sud aštrafavaŭ na 500 bazavych vieličyń kožnaha paručyciela Taŭkačovaj i Łojki, jakija pakinuli Biełaruś paśla vyzvaleńnia ź SIZA. Paručycielami Taŭkačovaj źjaŭlalisia palitołah Jaŭhien Prejhierman i na toj momant deputat Pałaty pradstaŭnikoŭ Valeryj Varaniecki, Łojki — staršynia Respublikanskaha sajuza pramysłoŭcaŭ i pradprymalnikaŭ Alaksandr Šviec.

U kastryčniku 2022 hoda Zołatavu, Čekinu, Łojku i Taŭkačovu KDB unios u pieralik asob, «datyčnych da terarystyčnaj dziejnaści».

Partał TUT.by byŭ razhromleny ŭładami ŭ traŭni 2021 hoda. Častka kamandy, jakaja zastałasia na voli, vymušana pakinuła krainu i ŭ lipieni 2021-ha stvaryła prajekt zerkalo.io. U Biełarusi jaho kantent pryznany «ekstremisckimi materyjałami».

U červieni 2023 hoda Volha Łojka zasnavała ŭ emihracyi aŭtarski miedyjaprajekt Plan B, jaki aśviatlaje padziei ŭ Biełarusi.

• 0
• 0
• 1
• 2
• 0
• 0
• 2
• 0