Čarhovy antyrekord. Źjaviłasia śviežaja statystyka pra naradžalnaść biełarusaŭ
U Biełarusi ŭsio jašče nie publikujuć dadzienyja ab kolkaści naradžeńniaŭ i śmierciaŭ, heta pierastali rabić jašče ŭ 2020 hodzie. «Lusterka» pry dapamozie BELPOL atrymała śviežyja niepubličnyja dadzienyja Ministerstva achovy zdaroŭja, jakija pakazvajuć situacyju z naradžalnaściu ŭ krainie.
Ź niepubličnaha dakumienta Ministerstva achovy zdaroŭja vynikaje, što naradžalnaść u Biełarusi praciahnuła padzieńnie, raspačataje jašče niekalki hadoŭ tamu.
U 2023 hodzie ŭ krainie naradziłasia 64 605 dziaciej, a ŭ 2024-m — tolki 58 993 (heta značyć na 8,7% mienš).
Z ulikam hetych źviestak dynamika kolkaści narodžanych dziaciej u Biełarusi vyhladaje tak.
Kolkaść naradžeńniaŭ (2012-2024)
A ŭ bolš šyrokaj pierśpiektyvie — tak.
Novyja ličby — čarhovy antyrekord. Kolkaść dziaciej, jakija naradzilisia ŭ Biełarusi, znoŭ stała samaj nizkaj za ŭsiu historyju statystyčnaj spravazdačnaści ŭ Biełarusi — z 1950 hoda.
Kolkaść naradžeńniaŭ (1950-2024)
— Źnižeńnie naradžalnaści moža ŭkazvać na doŭhaterminovyja demahrafičnyja i sacyjalna-ekanamičnyja tendencyi, uklučajučy źmianieńnie struktury nasielnictva, uzrovień dabrabytu i sacyjalnyja pryjarytety, — havorycca ŭ dakumiencie Ministerstva achovy zdaroŭja.
Što adbyłosia z aficyjnaj statystykaj?
Infarmacyju pa naradžalnaści i śmiarotnaści Biełstat apošni raz abnaŭlaŭ u mai 2020 hoda. Z taho času arhanizacyja pierastała publikavać hetyja dadzienyja (i nie tolki ich).
Apošni «Demahrafičny štohodnik» viedamstva vypuściła pa vynikach 2019 hoda. Paśla hetaha Biełstat spraŭna abnaŭlaje infarmacyju ab nasielnictvie Biełarusi ŭ cełym, vypuskaŭ štohadovyja zborniki z mnostvam pakazčykaŭ. Ale kolkaść narodžanych i pamierłych tam nie ŭkazvali, jak i pakazčyki mihracyi.
Sa statystyki AAN u siaredzinie 2020-ha stała viadoma, što śmiarotnaść pa vynikach pieršaha paŭhodździa pabiła piacihadovy rekord — 66,9 tysiačy pamierłych, u toj čas jak na praciahu čatyroch hadoŭ da hetaha pakazčyk nie pieravyšaŭ 62,5 tysiačy śmierciaŭ. Z tych ža dadzienych vynikała, što ŭ červieni 2020-ha kolkaść śmierciaŭ na 3753 vypadki pieravysiła pakazčyk za toj ža miesiac 2019 hoda.
Paśla taho jak biełaruskija miedyi źviarnuli ŭvahu na hetuju statystyku, u bazie danych AAN pakazčyki pa našaj krainie taksama pierastali abnaŭlacca.
Sa zdabytych źviestak vynikaje, što naradžalnaść u Biełarusi ŭ pieraliku na 1000 žycharoŭ ciapier znachodzicca prykładna na takim ža ŭzroŭni, jak naradžalnaść va Ukrainie vajennaha času. Va Ukrainie ŭ 2024 hodzie naradziłasia 177 tysiač dziaciej, što składaje 6 na 1000 žycharoŭ. U Biełarusi — 59 tysiač dziaciej, što składaje prykładna 6,6 na 1000 žycharoŭ.
Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»7
Kamientary